Juan 6:17-65

¹⁷Ña tuta­iaska ka­ura, Jesús manara pai­kuna­pagma chaiag­riska karka. Chi­manda, kanua­pi iai­kus­paka, kucha sug ladu chimba rii kalla­rir­ka­kuna, Kafar­naum pui­bluma chaiag­rin­ga­pa.

¹⁸Pai­kuna chimba­na­ku­uraka, iapa sin­chi waira, ata­rispa, iakuta wagta­chii kalla­rirka.

¹⁹Pai­kuna ña mai pichka u sugta chunga kuadra­sina iakupi ri­na­ku­ura, Jesús, chi iakupi awalla chaki­wa saruspa saruspa, pai­kuna­pagma kailla­ia­kugta kawar­ka­kuna. Chasa kawas­paka, ajaimi mancha­rir­ka­kuna.

²⁰Jesuska nir­ka­kunata: —Nukami kani. Mana mancha­na­kui­chi.

²¹Chasa uias­paka, alli iuia­chi­rispa, paita: —Kanuama samui— nir­ka­kuna. Chasa ni­na­kug­lla­pi, mai­ma ri­na­kuska­ma chaiag­rir­ka­kuna.

²²Kaiandika, tukui runa­kuna chi kucha sug ladu kag­kuna iuia­rir­ka­kuna, kaina suglla kanua chipi tiaska kagta; Jesusta kati­raiag­kunalla chi kanuapi iai­kuspa rigta­kuna; Jesús chipi pai­kuna­wa manima iai­kuspa rigta.

²³Chi­kama sug­kunaka, Tiberias pui­blu­manda sug kanua­kunapi chi ladumalla chaiag­rir­ka­kuna; mai­pi­mi kikin Iaia Jesús, Taita Diusta: “Pai Siñur” nispa, tanda miku­chirka: chi ladumalla.

²⁴Chi­pika, Jesusta ñi paita kati­raiag­kunata manima tarig­rir­ka­kuna. Chasa kawas­paka chi runa­kuna, chi chusa kanua­kunapi iai­kuspa, sug ladu chimba Kafarnaumma maskan­ga­pa rir­ka­kuna.

²⁵Chaiag­ris­paka, Jesusta tarig­rir­ka­kuna. Nis­paka tapur­ka­kuna: —Iacha­chig taita, ¿ima­uratak kaima chaia­murkangi?

²⁶Jesuska ainirka: —Kasami nuka nii­ki­chita: mana maska­wa­na­kun­gi­chi­chu, ima­ura­pas mana kawaska­sina kam­kunapa ñawipi rurag­manda. Kam­kuna sagsagta mikuska­manda­mi mas­ka­wa­na­kun­gi­chi.

²⁷Tuku­ri­diru mikui­ta mana maska­na­kui­chi. Mas­kai­chi mana puchuka­ri­diru mikui­ta; chasaka, dil­tudupa kaug­san­ga­pa. Chi mikuita, kai Runa Tukuska­mi kam­kunata karan­ga­pa kai­ki­chita. Chasa­pa­mi Taita Dius kikin nukata aglla­warka.

²⁸Chi­ura tapur­ka­kuna: —¿Imasatak nukan­chi rura­sun­chi, Taita Dius imasa muna­kuska­sina paita kawa­chin­ga­pa?

²⁹Chi­ura, Jesuska ainirka: —Pai nukata kacha­mu­wagka, kam­kuna­manda muna­kumi, nuka­manda suma iuia­wan­ga­pa.

³⁰Chi­ura, Jesusta tapur­ka­kuna: —¿Imasatak nukan­chita kawa­chin­kangi; chasaka, nukan­chi kamta suma iuia­rin­ga­pa? ¿Ima­ura­pas mana kawaska­sina ruraspachu kawa­chin­kangi?

³¹Nukan­chipa ñug­pa­manda taita­kuna, chusa sitaska alpapi kaug­sa­na­ku­ura, “maná” suti suma luar­manda mikui­ta­sik miku­dur kar­ka­kuna. Chasa­lla­ta­mi ñugpa­manda li­bru­pi willa­raiá, kasa nispa: “Suma luar­manda tandami mikun­ga­pa kara­murka”.

³²Jesuska ainirka: —Kasami nuka nii­ki­chita: Moiseska, chi suma luar­manda tandata mana pai­kunata kara­murkachu. Nuka­pa Taita­mi kai mana wañu­diru tanda kam­kunata suma luar­manda karamú.

³³Chi Taita Dius kara­muska tanda ni­raianmi suma luar­manda urai­ku­mug, kai alpa­manda runa­kunata dil­tudupa kaug­sai karan­ga­pa.

³⁴—Taita waugki, ima­ura­pas mana sakispa­lla chi tandata nukan­chita kara­mui— nir­ka­kuna.

³⁵Jesuska ainirka: —Nukami kani mana wañu­diru tanda. Mai­kan nuka­wa samug­kuna, mana iarkai iukan­ga­pa kan­kuna­chu. Chasa­lla­ta, nukata suma iuia­wag­kuna mana ima­ura­pas iaku­naiai iukan­ga­pa kan­kuna­chu.

³⁶Chasa nispa­pas, ñami nirkai­ki­chita: ña nukata kawa­waspa­pas, chara manara suma iuia­wan­gi­chi­chu.

³⁷Tukui nuka­pa Taita aglla­puas­ka­kuna, nuka­wa­mi samun­ga­pa kan­kuna. Mai­kan­pas nuka­wa samus­ka­kunaka, mana kanchama llugsi­chii tukun­ga­pa kan­kuna­chu.

³⁸Nukaka, suma luar­manda mana urai­ku­murka­nichu, nuka­pa iuiai­lla­wa ima­pas ruran­ga­pa. Imasa kacha­mu­wag muna­kuska­sina ruranga­pa­mi samurkani.

³⁹Kasa­mi kacha­mu­wag muná: pai agllaska nuka­wa samug­kuna, ñi sug mana nuka­wa chinga­chii tukun­ga­pa. Puchuka­rii punchaka, tukui pai­kunata nuka kaug­sa­chinga­pa­mi muná.

⁴⁰Kasa­mi nuka­pa Taita muná: mai­kan­pas pai­pa wam­brata rigsi­waspa suma iuia­wag­kuna, mana puchuka­ri­diru kaug­sai­ta­mi iukan­ga­pa kan­kuna. Pai­kuna­ta­mi, puchuka­rii puncha, nuka kaug­sa­chin­ga­pa kani.

⁴¹Jesús niska karka: “Nuka­mi kani suma luar­manda urai­ku­muska tanda”. Chi­manda judiu­kuna, mana alli iuiai­wa pai­manda rima­na­kurka,

⁴²kasa nispa: —Kai runa, ¿manachu ka Josepa wam­bra Jesús? Paipa taita i maman­di­ta­pas, nukan­chi rig­sin­chimi. Nig­pika, ¿ima­wan­tak ni­ku: “Suma luar­manda­mi urai­ku­muska kani”?

⁴³Jesuska nir­ka­kunata: —Kam­kuna­pura jiru iuiai­wa mana rima­na­kui­chi.

⁴⁴Nuka­pa Taita kacha­mu­wag mana agllag­pi­ka, ñi pipas mana nuka­wa samun­ga­pa pudin­kuna­chu. Agllas­ka­kuna­lla­ta­mi, puchuka­rii puncha, nuka kaug­sa­chin­ga­pa kani.

⁴⁵Santu Ispi­ri­tu­wa rimag­kuna willa­raiaskapi, kasa­mi ni­raiá: “Tukui­kunata, Dius kikin­mi iacha­chin­ga­pa ka”. Mai­kan­pas nuka­pa Taitata uiaspa, pai imasa iacha­chiska­sina iachai­kug­kuna, nuka­wa­mi samun­ga­pa kan­kuna.

⁴⁶—Ñi mai­kan, nuka­pa Taitata mana kawaska kan­kuna­chu. Pai­pag­manda samuska kag­lla­mi paita rigsí.

⁴⁷Kasa­mi nuka nii­ki­chita: mai­kan­pas suma iuia­wag­kuna, mana puchuka­ri­diru kaug­sai­ta­mi iukan­kuna.

⁴⁸—Nukami kani mana wañu­diru tanda.

⁴⁹Kam­kunapa ñugpa­manda taita­kuna, chusa sitaska alpapi “maná” suti mikuita mikus­pa­pas, wañur­ka­kunami.

⁵⁰Kai tandami ni­raiá suma luar­manda urai­ku­muska. Mai­kan­pas kai tandata mikug­kuna mana dil­tudupa wañun­ga­pa kan­kuna­chu.

⁵¹Nuka­mi kani chi mana wañu­diru tanda suma luar­manda urai­ku­muska. Mai­kan­pas kai tandata mikug­kuna, ima­ura­pas kaug­sa­na­kunga­pag­lla­mi kan­kuna. Chi nuka karan­ga­pa tandaka ni­raianmi nuka kikinpa aicha, kai alpa­manda runa­kuna alli suma kaug­saita iukan­ga­pa.

⁵²Chi­ura judiu­kunaka, kikin­pura tapu­ri­na­kurka, kasa nispa: —Kai runa, ¿imasatak paipa aicha­ta karan­ga­pa ka, nukan­chi mikun­ga­pa?

⁵³Jesuska nir­ka­kunata: —Kasami nuka nii­ki­chita: kai Runa Tukuskapa aichata mana mikug­ka, nuka­pa iawarta chasa­lla­ta mana upiag­pika, alli suma kaug­saita mana iukan­ga­pa kan­gi­chi­chu.

⁵⁴Mai­kan­pas, nuka­pa aicha­ta mikuspa, nuka­pa iawarta upiaspa kag­kunaka, mana puchuka­ri­diru suma kaug­sai­ta­mi iukan­kuna. Pai­kuna­ta­mi, puchuka­rii puncha, nuka kaug­sa­chin­ga­pa kani.

⁵⁵Nuka­pa aicha kanmi sutipa mikui. Nuka­pa iawarpas, sutipa­mi upia­diru ka.

⁵⁶Mai­kan­pas, nuka­pa aichata mikuspa, nuka­pa iawarta upiaspa kag­kuna, nuka­pi­mi kan­kuna. Nuka­pas, pai­kuna­pi­mi kani.

⁵⁷—Nukata kacha­mu­wag kaug­sa Taita­manda­mi nuka kaug­sai iukani. Chasa­lla­ta mai­kan­pas nukata miku­wag­kuna, nuka­manda­mi kaug­sai iukan­ga­pa kan­kuna.

⁵⁸Kai­mi ka suma luar­manda urai­ku­muska tanda. Chi “maná” suti tandata, ñugpa­manda taita­kuna mikuspa­pas wañur­ka­kunami; chi tanda­sina mana kanchu. Kai tandata mai­kan­pas mikus­paka, ima­ura­pas kaug­sa­lla­mi kan­ga­pa kan­kuna.

⁵⁹Kafarnaum pui­blu­pi­mi Jesús chasa nirka, judiu­kuna tanda­ri­diru wasi ukupi iacha­chi­kuspa.

⁶⁰Achka Jesusta kati­raiag­kuna, chasa uias­paka, nir­ka­kuna: —Chi rimai­kuna, iapa mana uianga­sina­mi ka. ¿Pi­sik chasa uian­ga­pa munanga?

⁶¹Paita kati­raiag­kuna chasa mana alli iuiai­wa pai­manda rima­na­kuskata iachas­paka, Jesuska nirka: —Chasa uias­paka, ¿nuka­manda mana allichu uiarí?

⁶²Kai Runa Tu­kus­ka ñugpata kaska­ma, chima­lla­tata sika­kuskata kam­kuna kawas­paka, ¿imasatak iuiantran­gi­chi?

⁶³Santu Ispi­ri­tu­lla­mi alli suma kaug­saita kará. Aichaka mana balinchu. Chi rimai­kuna nuka kam­kunata rimaskaka kanmi Ispi­ri­tupi kaug­sai.

⁶⁴Chasa kag­pi­pas, mai­kan­kunaka mana nuka­wa iuia­na­kun­gi­chi­chu—. Ñugpa­manda­ta­mi Jesús iacharka, pi­kuna mana paita iuiag kag­kuna­manda. Chasa­lla­ta, pi paita api­chin­ga­pa kag­ta­pas­mi iacharka.

⁶⁵Kasa­pasmi nirka: —Chi­mandami nirkai­ki­chita: “Nuka­pa Taita mana agllag­pika, ñi pipas mana nuka­wa samun­ga­pa pudin­kuna­chu”.