29 Se meama peipiden, yan se tekingan te bayi. Meneng se sigalak te meama peipiden, yan se megtagad kandin aw menenalan heman kandin, aw meluba se pedowan din te pegdineg din te kagi te sigalak din peipiden. Iling a heman kenyan, so nesikop den se keluba te pedowan ko te pegdineg ko te medita se otaw egtaking ki Jesus.
30 Keilangan megkedakel se dengeg i Jesus, aw metostos se kanak dengeg.”
31 Se insogò dini lekat te langit, yan se ontò melangkaw diyà te kedita. Meneng se otaw dini te tanà, yan se otaw lekat dini te tanà, aw lekat heman te tanà se ipegtoladà din. Meneng se insogò dini lekat te langit, yan se ontò melangkaw diyà te kedita.
32 Eg-indan sikandin te benal kinità din aw dinineg din kidoen te langit, meneng pilabok se egpenenalan te kagi din.
33 Meneng se otaw memenal te kagi din, yan se otaw megpetaga-taga te benal se kagi te Timanem.
34 Eg-ikagi se insogò te Timanem te kagi lekat te Timanem, so tigkan imbegay te Timanem se Espiritu Santo diyà kandin.
35 Ontò dakel se pedowan te Timanem Amay diyà te Batà din, aw insalig din diyà kandin se peglowan diyà te kedita.
36 Se otaw memenal diyà te Batà te Timanem, yan se otaw doen kaling pedowan wedad temanan. Meneng se otaw eked tolò te kagi te Batà te Timanem, yan se otaw eked begayi te kaling pedowan, meneng detengan dan te pelumun te Timanem te wedad temanan.
