Juan 3:1-36 in Achi

¹ ʼO jun achi, ma Nicodémo u bi, nim u patan chiquixol i aj Israel winak. Ire cachiʼil i aj Fariséo.

² I ma Nicodémo-le, xa ʼe lapan ruʼ i Jesus chaʼab, y xu bij che: —Nim laj Tijonel, ketaʼam chi Dios at u takom lok, col a cʼutu chake. Ketaʼam ile man niʼpa i ca ʼano, mi jun ca tiqui chu ʼonquil we n-ti u choʼab i Dios ruʼ —xu bij.

³ Are ʼuri i Jesus xu bij che: —Sak laj tzij quin bij chawe: are i n-calax ta chic julaj chic, n-coc ta ʼuri che u ʼatbal tzij i Dios.

⁴ I ma Nicodémo xu bij che: —¿Wach u ʼonquil ʼuri chi jun achi, nim chic, calax tan chic u camul? ¿Xataba ca tiqui tan chic che i oquic pu chʼacul u chuch, y calax tan chic? —xcha.

⁵ I Jesus xu bij che: —Katzij quin bij chawe: mi jun coc che u ʼatbal tzij i Dios we n-alaxnak ta jun u cʼaslemal ruʼ ya, xak rumal i u Tewal i Dios.

⁶ Jun, we xui alaxnak che u chuch u kajaw, toʼ winak ʼuri alaxnak; jun ʼut, we alaxnak u cʼaslemal rumal u Tewal i Dios, ʼo u cʼaslemal ʼuri ruʼ i Dios.

⁷ Mat oc ʼil che iri chi xin bij chawe: ʼo u chac ʼis que alax tan chic julaj chic.

⁸ I tew xa ipa quicʼaw wi; yet ca ta are quicʼawic, péro n-awetaʼam taj pa ca pe wi, xak n-awetaʼam taj pa ca ʼe wi. Xak queje coʼon ile chique niʼpa i que alax tan chic rumal i u Tewal i Dios (ʼalaj chi cʼacʼ chic qui cʼaslemal, péro n-awetaʼam taj wach mer u ʼonquil) —xu bij i Jesus che.

⁹ I ma Nicodémo xu bij chic: —N-quin ta tu be wach u ʼonquil ile.

¹⁰ I Jesus xu bij che: —Yet, chi at nim laj tijonel que i aj Israel winak, ¿n-ca ta tu be i quin bij chawe-ri?

¹¹ Sak laj tzij quin bij chawe: yoj caka bij niʼpa i ketaʼam; caka bij wach i kilom, y yix n-qui coj taj wach i caka bij.

¹² We n-qui coj taj wach i quin bij chiwe re i cʼaslemal waral chuwach i jyub taʼaj, ¿wach u cojic ʼuri qui ʼano we quin lap chiwe wach usucʼ i cʼaslemal re aj chicaj?

¹³ Mi jun aj waral chuwach ulew ʼelnak bi chicaj; xui i jun chi kajnak lok rilom i chila chicaj. Ire-le are i Achi aj Chicaj.

¹⁴ I mam Moises ujer, are je ʼo che i jyub tzʼinilic, xu ʼan jun u qʼuexwach cumatz xu yac ʼan chicaj chiquiwach i winak. Xak queje ile ʼo ni u chac chi i Achi aj Chicaj ca yactaj ni chicaj chiquiwach i winak.

¹⁵ ʼO ni u chac, man queje ile, pachin jun cu cuba u cʼux che, n-ca sachsax tu wach, are, ca yaʼ u cʼaslemal chi n-ca qʼuis ta chic.

¹⁶ I Dios lic cʼax xe u na i winak chuwach i jyub taʼaj, rumal-i xu tak li u Cʼojol, chi xa jun ruʼ; queje ile xu ʼano man pachin jun cu cuba u cʼux che, n-ca sachsax tu wach, cu rik u cʼaslemal chi n-ca qʼuis ta chic.

¹⁷ I Dios xu tak li u Cʼojol chuwach i jyub taʼaj, ʼelsabal-que i winak chupam i qui mac. Are rumal-i xu tak li u Cʼojol, n-are ti yabal tojbal mac piquiwi.

¹⁸ Pachin jun cu cuba u cʼux che Ire, n-cril ti tojbal mac, péro pachin jun n-cu cuba tu cʼux che, ʼo chic i tojbal mac ca pe puwi. Ca pe puwi man nu cubam tu cʼux che u Cʼojol i Dios, chi xa jun ʼolic.

¹⁹ I qui mac i winak are iri: are xcʼun i sak chuwach i jyub taʼaj, i winak n-xcaj ta xe qʼuiji pa sak, mas kus xquil i ʼekum chuwach i sak, man niʼpa i quiqui ʼano, xui i mac atzalal.

²⁰ Niʼpa i quiqui ʼan i n-ʼus taj, tzel quiquil i sak, xak n-cacaj ta que oc pa sak, man n-cacaj taj ca ʼiltajic chi n-ʼus ti quiqui ʼano.

²¹ Niʼpa i quiqui ʼan i ʼutz sucʼulic chuwach i Dios, que tejeb che i sak; ca ʼalijin ʼuri chi niʼpa i que tijin chu ʼanic are i Dios que tow chu ʼonquil.

²² Xoʼon panok i Jesus xa ʼe cuʼ u tijoxelab pa tak jyub re i Judéa. Chila xe najtin jubiʼ, quiqui kajsabej ya piquiwi i winak.

²³ Xak queje i ma Wan ca tijin chu kajsaxic ya piquiwi i winak, chila che i jyub Enon, chu nakaj i jyub Salim. Chila xoʼon wi, man qʼui ʼo wi i ya pa jyub-le. I winak, chila que upon wi ruʼ, man ca kajsax ya piquiwi.

²⁴ Queje ile xqui ʼano are cʼa maja ca tzʼapix i ma Wan pa cárcel.

²⁵ I aj Israel winak, ʼo usucʼ chiquiwach quiqui ʼan i rawasil, chʼajbal quib chuwach i Dios. I u tijoxelab i ma Wan, xak juban aj Israel, xe oc chu chapic quib chi tzij puwi i costúmbre-le.

²⁶ Teʼuri xe ʼe ruʼ i ma Wan, y xqui bij che: —Tijonel, ¿ca cʼun cha cʼux i achi chi xupon awuʼ are at ʼo chʼaka ya Jordan? Are i jun chi xa lap chake wach u patan. Chatapeʼ, ire xak cu kajsaj ya piquiwi i winak, y conojel i winak lic que upon ruʼ —xqui bij che. (Ile are i Jesus chi xqui lapo.)

²⁷ I ma Wan xu bij chique: —Mi jun ca tiqui che i patan-le we n-yatal ta che rumal i Dios

²⁸ Lic i tom chic yix are xin bij chi n-yin ti in Crísto; yin xa in taktal li nabe chuwach ire.

²⁹ Xa in aj cojol u tzij chiquiwach i winak. In queje pacha i ramig i achi chi ca cʼuliʼic. Jun achi, we ca cʼuliʼic, re ire i ixok chi ca cʼuli ruʼ. I ramig chi aj cojol u tzij, ca taqʼui chucʼulel chu tayic; are cu ta u chʼawbal, ca quicot rumal. Queje ile quin ʼan yin woʼor, mas quin quicot rumal (man mas que upon i winak ruʼ i Jesus chuwach i wuʼ yin.)

³⁰ I Jesus, ʼo u chac chi ire mas cocsax u ʼij, xak ʼo u chac chi yin coqʼuil ca sach in ʼij —xu bij i ma Wan chique.

³¹ I Jun chi petnak chicaj, mas nim u ʼij chiquiwach conojel i winak. I jun chi toʼ winak aj chuwach jyub taʼaj, xa re u wach i jyub taʼaj, xak xui i ʼo chuwach i jyub taʼaj cu lapo. Are i petnak ruʼ i Dios, nim u ʼij chiquiwach conojel i winak.

³² Ire cu bij niʼpa i rilom, niʼpa i u tom chila ruʼ i Dios, xui-ri, n-conojel taj quiqui coj u tzij.

³³ We jun cu coj u tzij ire, ʼalaj ʼuri chi cu coj u tzij i Dios.

³⁴ Are i u takom li Dios, cu bij u tzij i Dios, man ʼo i u Tewal i Dios ruʼ. I Dios, are cu ya u Tewal che, n-cu paj taj; lic nim cu yaʼo.

³⁵ I Ta chicaj lic cʼax cu na u Cʼojol, xak u yom puʼab ronojel niʼpa i ʼolic.

³⁶ Pachin i cu cuba u cʼux che u Cʼojol i Dios, ʼo ʼuri u cʼaslemal chi n-ca qʼuis ta chic; pachin i n-cu cuba tu cʼux che u Cʼojol i Dios, n-ta ʼuri u cʼaslemal-le; lic cu rik ni tojbal re u mac rumal i Dios. (Queje ile xu bij i ma Wan chique u tijoxelab.)

¹ Kꞌo jun achi Nicodemo rubꞌiꞌ; rire e kukꞌil ri fariseos yey e jun aj wach ke raj judiꞌabꞌ.

² Rire xeꞌbꞌina rukꞌ ri Jesús chaqꞌabꞌ y xubꞌiꞌij che: —Lal tijonel, lik qꞌalaj lal taqom lo la ruma ri Dios re koꞌlkꞌutun la chiqawach, ma na jinta junoq kaꞌanaw janipa wa kꞌutubꞌal kaꞌan la, we na jinta ri Dios rukꞌ —xchaꞌ.

³ Ekꞌu ri Jesús xubꞌiꞌij che: —Paqatzij wi kambꞌiꞌij cheꞌla: E junoq we na kalax ta tanchik, riꞌ na kayaꞌtaj ta che kok chupa rutaqanik ri Dios —xchaꞌ.

⁴ Ri Nicodemo xutzꞌonoj che: —¿Suꞌanik kꞌu riꞌ kalax junoq e laꞌ nim chik? ¿Utz nebꞌa laꞌ kamatzex tanchi ruma ruchu chaꞌ kalax tanchik? —xchaꞌ.

⁵ Ri Jesús xukꞌul uwach: —Paqatzij wi kambꞌiꞌij cheꞌla: China ri na kalax ta rukꞌ yaꞌ y rukꞌ ri Ruxlabꞌixel ri Dios, riꞌ na taqal ta che kok chupa rutaqanik ri Dios.

⁶ E junoq kalax kuma ruchu-uqaw, riꞌ lik rewi e jun tikawex; noꞌj ri kalax ruma ri Ruxlabꞌixel ri Dios, riꞌ kꞌo ukꞌaslemal chwach ri Dios.

⁷ Makam kꞌu animaꞌ la che wa ximbꞌiꞌij cheꞌla: “Lik chirajawaxik chike konoje ri tikawex kebꞌalax na tanchik.”

⁸ E pachaꞌ ri tew xa tobꞌ pa kawelel wi, xew kata la kajuxuxik, pero na etaꞌam ta la pa kape wi y pa kumaj wubꞌi. Jekꞌulaꞌ ri kebꞌalax ruma ri Ruxlabꞌixel ri Dios na kilitaj taj suꞌanik ri Dios kuya ri kꞌakꞌ kikꞌaslemal —xchaꞌ.

⁹ Ekꞌu ri Nicodemo xutzꞌonoj tanchik: —¿Suꞌanik kuꞌana waꞌ? —xchaꞌ.

¹⁰ Ri Jesús xukꞌul uwach: —Lal tijonel chikiwach raj Israel, ¿yey na etaꞌam tane la waꞌ?

¹¹ Paqatzij wi kambꞌiꞌij waꞌ cheꞌla: Riꞌoj e kaqatzijoj janipa ri qetaꞌam y ri qilom; na rukꞌ ta kꞌu riꞌ, ralaq na kakoj ta alaq saꞌ ri kantzijoj che alaq.

¹² We na kakoj ta alaq echiriꞌ kintzijon puwi taq ri xa re ruwachulew, ¿saꞌ kꞌu uꞌanik riꞌ kakoj alaq echiriꞌ kintzijon chiwach alaq puwi taq ri re ri Dios kꞌo chilaꞌ chikaj?

¹³ Na jinta junoq bꞌenaq chilaꞌ chikaj, xew ri jun petinaq chilaꞌ, waꞌ e Ralaxel Chikixoꞌl Tikawex.

¹⁴ Ma jelaꞌ pachaꞌ xuꞌan ri Moisés echiriꞌ xuyak jun kumatz chutzaꞌm jun cheꞌ pa ri luwar katzꞌintzꞌotik; jekꞌulaꞌ lik chirajawaxik wi Ralaxel Chikixoꞌl Tikawex kayakiꞌ chwa jun cheꞌ

¹⁵ chaꞌ china ri kakubꞌiꞌ ukꞌuꞌx rukꞌ Rire, na kasach ta uwach, ma kꞌo ukꞌaslemal na jinta utaqexik.

¹⁶ »Ri Dios lik kꞌax xebꞌunaꞌ ri e kꞌo che ruwachulew; y ruma kꞌu waꞌ, xutaq lo Rukꞌajol, ri lik xew Ukꞌajol riꞌ, chaꞌ china ri kakubꞌiꞌ ukꞌuꞌx rukꞌ Rire na kasach ta uwach, ma kꞌo ukꞌaslemal na jinta utaqexik.

¹⁷ Ma ri Dios na xutaq ta lo Rukꞌajol che ruwachulew re koluꞌqꞌata tzij pakiwi ri tikawex; ri xutaq wuloq e chaꞌ kebꞌoluꞌkolobꞌej.

¹⁸ China kꞌu ri kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ri qꞌatbꞌal tzij re ri Dios puwiꞌ; noꞌj china ri na kakubꞌiꞌ ta ukꞌuꞌx rukꞌ, riꞌ kꞌo chi ri qꞌatbꞌal tzij re ri Dios puwiꞌ ruma na xukoj ta rubꞌiꞌ Rukꞌajol ri Dios, ri lik xew Ukꞌajol riꞌ.

¹⁹ Yey ri qꞌatbꞌal tzij kuꞌan ri Dios e ruma waꞌ: Ri Qꞌijsaq re ri Dios xkꞌun che ruwachulew, pero taq ri tikawex e más xukꞌul kikꞌuꞌx ri qꞌequꞌmalil re ri mak chwa ri Qꞌijsaq; ma ri ketajin che uꞌanik, lik na chom taj.

²⁰ Konoje ri kakiꞌan ri na utz taj, tzel kakil ri Qꞌijsaq y na keqibꞌ ta rukꞌ chaꞌ na kaqꞌalajin ta ri na utz taj ketajin che uꞌanik.

²¹ Noꞌj konoje ri kakitijoj kibꞌ che jun saqil bꞌinik silabꞌik, riꞌ keqibꞌ chwach ri Qꞌijsaq chaꞌ kaqꞌalajinik, ri ketajin che uꞌanik e ri karaj ri Dios chike —xchaꞌ.

²² Tekꞌuchiriꞌ, ri Jesús junam kukꞌ rutijoꞌn xebꞌek Judea; ukꞌiyal qꞌij xkꞌojiꞌ chiriꞌ kukꞌ y kuya ri bautismo chike ri tikawex.

²³ Ekꞌu ri Juan katajin che uyaꞌik ri bautismo pa ri tinamit Enón chunaqaj Salim, ma chilaꞌ lik kꞌo yaꞌ. Kebꞌopon kꞌu ri tikawex rukꞌ chaꞌ kakikꞌul ri bautismo.

²⁴ Ri Juan xuꞌan waꞌ echiriꞌ kꞌamajaꞌ kayaꞌiꞌ pa cárcel.

²⁵ Ekꞌuchiriꞌ, jujun chike rutijoꞌn ri Juan kukꞌ jujun e aj judiꞌabꞌ xkijeq kechꞌaꞌt chwi taq ri taqanik chwi ri kijosqꞌikil chwach ri Dios.

²⁶ Xebꞌek kꞌut xeꞌkibꞌiꞌij che ri Juan: —Lal tijonel, tape la, e ri jun xopon ukꞌ la chꞌaqa yaꞌ che ri nimayaꞌ Jordán, ri xqꞌalajisan la puwiꞌ, woꞌora katajin che uyaꞌik ri bautismo y konoje ri tikawex eteran chirij —xechaꞌ.

²⁷ Ekꞌu ri Juan xubꞌiꞌij chike: «Na jinta kꞌo kukꞌul junoq we na e ta ri Dios chilaꞌ chikaj kayaꞌw re che.

²⁸ Riꞌix xinito echiriꞌ ximbꞌiꞌij chiwe: Riꞌin na in ta Ruchaꞌoꞌn lo ri Dios, xa in jun qꞌalajisanel intaqom lo nabꞌe chwach Rire.

²⁹ »E pachaꞌ pa juna kꞌulanikil. Ri lik kꞌo uwach na e ta ri ramigo rala, e rala kakꞌuliꞌik ma e ukꞌaꞌyom re rali. Yey ri ramigo kꞌo putzal rala, e lik kakiꞌkot che utayik ri kubꞌiꞌij rala. Jekꞌulaꞌ riꞌin woꞌora lik kinkiꞌkotik ma ya xkꞌun ri Cristo.

³⁰ Lik kꞌu chirajawaxik más kanimarisax uqꞌij rire, chwa ri kanimarisax nuqꞌij riꞌin.

³¹ »Ri jun kape chilaꞌ chikaj, e más nim uwach uqꞌij chikiwa konoje. Ekꞌu junoq na re ta chilaꞌ chikaj, e re ruwachulew y e kachꞌaꞌt puwi taq ri re ruwachulew. Noꞌj ri jun kape chilaꞌ chikaj, e más lik nim uwach uqꞌij chikiwa konoje.

³² Yey rire e kuqꞌalajisaj saꞌ ri rilom y saꞌ rutom che ri Dios; na rukꞌ ta kꞌu riꞌ, taq ri winaq na kakikoj taj.

³³ Yey we kꞌo junoq kakojow ri kuqꞌalajisaj rire, riꞌ kujikibꞌaꞌ uwach lik qatzij ri kubꞌiꞌij ri Dios.

³⁴ Ma ri jun taqom lo ruma ri Dios, e kutzijoj ri kubꞌiꞌij ri Dios. Ma ri Dios na xuxuꞌyaj ta ri Ruxlabꞌixel uyaꞌom che; e uwariꞌche, xaqi kꞌo ri Ruxlabꞌixel rukꞌ.

³⁵ Ri Dios lik kꞌax kunaꞌ Rukꞌajol yey uyaꞌom puqꞌabꞌ rire ronoje ri kꞌolik.

³⁶ China kꞌu ri kakubꞌiꞌ ukꞌuꞌx rukꞌ Rukꞌajol ri Dios, kꞌo ukꞌaslemal na jinta utaqexik; noꞌj china ri na karaj taj kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ukꞌaslemal rukꞌ ri Dios yey qꞌatom chi tzij puwiꞌ ruma ri Dios» xchaꞌ.

¹ Cꞌo jun achi Nicodemo rubiꞌ; rire e cuqꞌuil ri fariseos yey e jun aj wach que raj judiꞌab.

² Rire xeꞌbina rucꞌ ri Jesús chakꞌab y xubiꞌij che: —Lal tijonel, lic kꞌalaj lal takom lo la ruma ri Dios re coꞌlcꞌutun la chikawach, ma na jinta junok caꞌanaw janipa wa cꞌutubal caꞌan la, we na jinta ri Dios rucꞌ —xchaꞌ.

³ Ecꞌu ri Jesús xubiꞌij che: —Pakatzij wi cambiꞌij cheꞌla: E junok we na calax ta tanchic, riꞌ na cayaꞌtaj ta che coc chupa rutakanic ri Dios —xchaꞌ.

⁴ Ri Nicodemo xutzꞌonoj che: —¿Suꞌanic cꞌu riꞌ calax junok e laꞌ nim chic? ¿Utz neba laꞌ camatzex tanchi ruma ruchu chaꞌ calax tanchic? —xchaꞌ.

⁵ Ri Jesús xucꞌul uwach: —Pakatzij wi cambiꞌij cheꞌla: China ri na calax ta rucꞌ yaꞌ y rucꞌ ri Ruxlabixel ri Dios, riꞌ na takal ta che coc chupa rutakanic ri Dios.

⁶ E junok calax cuma ruchu-ukaw, riꞌ lic rewi e jun ticawex; noꞌj ri calax ruma ri Ruxlabixel ri Dios, riꞌ cꞌo ucꞌaslemal chwach ri Dios.

⁷ Macam cꞌu animaꞌ la che wa ximbiꞌij cheꞌla: “Lic chirajawaxic chique conoje ri ticawex quebalax na tanchic.”

⁸ E pachaꞌ ri tew xa tob pa cawelel wi, xew cata la cajuxuxic, pero na etaꞌam ta la pa cape wi y pa cumaj wubi. Jecꞌulaꞌ ri quebalax ruma ri Ruxlabixel ri Dios na quilitaj taj suꞌanic ri Dios cuya ri cꞌacꞌ quicꞌaslemal —xchaꞌ.

⁹ Ecꞌu ri Nicodemo xutzꞌonoj tanchic: —¿Suꞌanic cuꞌana waꞌ? —xchaꞌ.

¹⁰ Ri Jesús xucꞌul uwach: —Lal tijonel chiquiwach raj Israel, ¿yey na etaꞌam tane la waꞌ?

¹¹ Pakatzij wi cambiꞌij waꞌ cheꞌla: Riꞌoj e cakatzijoj janipa ri ketaꞌam y ri kilom; na rucꞌ ta cꞌu riꞌ, ralak na cacoj ta alak saꞌ ri cantzijoj che alak.

¹² We na cacoj ta alak echiriꞌ quintzijon puwi tak ri xa re ruwachulew, ¿saꞌ cꞌu uꞌanic riꞌ cacoj alak echiriꞌ quintzijon chiwach alak puwi tak ri re ri Dios cꞌo chilaꞌ chicaj?

¹³ Na jinta junok benak chilaꞌ chicaj, xew ri jun petinak chilaꞌ, waꞌ e Ralaxel Chiquixoꞌl Ticawex.

¹⁴ Ma jelaꞌ pachaꞌ xuꞌan ri Moisés echiriꞌ xuyac jun cumatz chutzaꞌm jun cheꞌ pa ri luwar catzꞌintzꞌotic; jecꞌulaꞌ lic chirajawaxic wi Ralaxel Chiquixoꞌl Ticawex cayaquiꞌ chwa jun cheꞌ

¹⁵ chaꞌ china ri cacubiꞌ ucꞌuꞌx rucꞌ Rire, na casach ta uwach, ma cꞌo ucꞌaslemal na jinta utakexic.

¹⁶ »Ri Dios lic cꞌax xebunaꞌ ri e cꞌo che ruwachulew; y ruma cꞌu waꞌ, xutak lo Rucꞌajol, ri lic xew Ucꞌajol riꞌ, chaꞌ china ri cacubiꞌ ucꞌuꞌx rucꞌ Rire na casach ta uwach, ma cꞌo ucꞌaslemal na jinta utakexic.

¹⁷ Ma ri Dios na xutak ta lo Rucꞌajol che ruwachulew re coluꞌkꞌata tzij paquiwi ri ticawex; ri xutak wulok e chaꞌ queboluꞌcolobej.

¹⁸ China cꞌu ri cacubiꞌ ucꞌuꞌx rucꞌ Rucꞌajol ri Dios, riꞌ na jinta ri kꞌatbal tzij re ri Dios puwiꞌ; noꞌj china ri na cacubiꞌ ta ucꞌuꞌx rucꞌ, riꞌ cꞌo chi ri kꞌatbal tzij re ri Dios puwiꞌ ruma na xucoj ta rubiꞌ Rucꞌajol ri Dios, ri lic xew Ucꞌajol riꞌ.

¹⁹ Yey ri kꞌatbal tzij cuꞌan ri Dios e ruma waꞌ: Ri Kꞌijsak re ri Dios xcꞌun che ruwachulew, pero tak ri ticawex e más xucꞌul quicꞌuꞌx ri kꞌekuꞌmalil re ri mac chwa ri Kꞌijsak; ma ri quetajin che uꞌanic, lic na chom taj.

²⁰ Conoje ri caquiꞌan ri na utz taj, tzel caquil ri Kꞌijsak y na quekib ta rucꞌ chaꞌ na cakꞌalajin ta ri na utz taj quetajin che uꞌanic.

²¹ Noꞌj conoje ri caquitijoj quib che jun sakil binic silabic, riꞌ quekib chwach ri Kꞌijsak chaꞌ cakꞌalajinic, ri quetajin che uꞌanic e ri caraj ri Dios chique —xchaꞌ.

²² Tecꞌuchiriꞌ, ri Jesús junam cucꞌ rutijoꞌn xebec Judea; uqꞌuiyal kꞌij xcꞌojiꞌ chiriꞌ cucꞌ y cuya ri bautismo chique ri ticawex.

²³ Ecꞌu ri Juan catajin che uyaꞌic ri bautismo pa ri tinamit Enón chunakaj Salim, ma chilaꞌ lic cꞌo yaꞌ. Quebopon cꞌu ri ticawex rucꞌ chaꞌ caquicꞌul ri bautismo.

²⁴ Ri Juan xuꞌan waꞌ echiriꞌ cꞌamajaꞌ cayaꞌiꞌ pa cárcel.

²⁵ Ecꞌuchiriꞌ, jujun chique rutijoꞌn ri Juan cucꞌ jujun e aj judiꞌab xquijek quechꞌaꞌt chwi tak ri takanic chwi ri quijoskꞌiquil chwach ri Dios.

²⁶ Xebec cꞌut xeꞌquibiꞌij che ri Juan: —Lal tijonel, tape la, e ri jun xopon ucꞌ la chꞌaka yaꞌ che ri nimayaꞌ Jordán, ri xkꞌalajisan la puwiꞌ, woꞌora catajin che uyaꞌic ri bautismo y conoje ri ticawex eteran chirij —xechaꞌ.

²⁷ Ecꞌu ri Juan xubiꞌij chique: «Na jinta cꞌo cucꞌul junok we na e ta ri Dios chilaꞌ chicaj cayaꞌw re che.

²⁸ Riꞌix xinito echiriꞌ ximbiꞌij chiwe: Riꞌin na in ta Ruchaꞌoꞌn lo ri Dios, xa in jun kꞌalajisanel intakom lo nabe chwach Rire.

²⁹ »E pachaꞌ pa juna cꞌulaniquil. Ri lic cꞌo uwach na e ta ri ramigo rala, e rala cacꞌuliꞌic ma e ucꞌaꞌyom re rali. Yey ri ramigo cꞌo putzal rala, e lic caquiꞌcot che utayic ri cubiꞌij rala. Jecꞌulaꞌ riꞌin woꞌora lic quinquiꞌcotic ma ya xcꞌun ri Cristo.

³⁰ Lic cꞌu chirajawaxic más canimarisax ukꞌij rire, chwa ri canimarisax nukꞌij riꞌin.

³¹ »Ri jun cape chilaꞌ chicaj, e más nim uwach ukꞌij chiquiwa conoje. Ecꞌu junok na re ta chilaꞌ chicaj, e re ruwachulew y e cachꞌaꞌt puwi tak ri re ruwachulew. Noꞌj ri jun cape chilaꞌ chicaj, e más lic nim uwach ukꞌij chiquiwa conoje.

³² Yey rire e cukꞌalajisaj saꞌ ri rilom y saꞌ rutom che ri Dios; na rucꞌ ta cꞌu riꞌ, tak ri winak na caquicoj taj.

³³ Yey we cꞌo junok cacojow ri cukꞌalajisaj rire, riꞌ cujiquibaꞌ uwach lic katzij ri cubiꞌij ri Dios.

³⁴ Ma ri jun takom lo ruma ri Dios, e cutzijoj ri cubiꞌij ri Dios. Ma ri Dios na xuxuꞌyaj ta ri Ruxlabixel uyaꞌom che; e uwariꞌche, xaki cꞌo ri Ruxlabixel rucꞌ.

³⁵ Ri Dios lic cꞌax cunaꞌ Rucꞌajol yey uyaꞌom pukꞌab rire ronoje ri cꞌolic.

³⁶ China cꞌu ri cacubiꞌ ucꞌuꞌx rucꞌ Rucꞌajol ri Dios, cꞌo ucꞌaslemal na jinta utakexic; noꞌj china ri na caraj taj cacubiꞌ ucꞌuꞌx rucꞌ Rucꞌajol ri Dios, riꞌ na jinta ucꞌaslemal rucꞌ ri Dios yey kꞌatom chi tzij puwiꞌ ruma ri Dios» xchaꞌ.