3 Jabi nohiria bo oriquino tsi quiha oriquiti ibobá jënëria binianiquë rë. Jato jënë ja paisacaquë tsi quiha, —Yama xo jato jënë rë —i quiha Jesu qui jahuë jahëhua niquë.
4 Jatsi Jesú quëbiniquë: —Huënayamahuë, caí. Jamëri tsi xo toa mi shinahaina pë. Jari tsëquëyamahi quiha noho yonocoti xabaca ra —i quiha jahuë jahëhua qui Jesu niquë.
5 Jama, toá ca yonati bo qui jahuë jahëhua chaniniquë: —Mato ja yoahai ca acahuë —iquiina.
6 Jabi toá tsi quiha seis maxax ca chomo bo nii ini quiha; naa Jodiobá chocohati jabi quëshpi na. Jabi pistiama naa chomo bo icani quiha.
7 Jatsi, —Chomo bo tsi jënëpaxa rëatsacana —i yonati bo qui Jesu niquë. Jatsi quiha ja rëacaniquë jahuë quëbichí no.
8 Rëajahuacaquë tsi quiha, —Huëtacahuë. Oriquiti ibo qui bocahuë —i jato qui Jesu niquë. Huëtaxo tsi quiha jënëria ibo qui yonati bá boniquë.
