JUAN 21:7-19

⁷―¡Pedr! ―rep naa―. ¡Bina gaṉle, xmaistr ne i goṉ! Zeeṉe bin Pedra, lëëlëd wbix Pedr xab Pedr, biab Pedr lo nis; psilo Pedr bzhoobnis Pedr brieequia Pedr ro nis.

⁸Laa no biaaṉ leṉ barcw ga; nole bdziṉniew zaatne nac ro nis. Maase tapgaḻtsii metr sca bdioobniu no guiex co lo nis.

⁹Zeeṉe briee no leṉ barcw, bdzioṉ no laa gui noyecle, laa tib meḻ zhooble lo gui co, ye guietxtil ne.

¹⁰Dzigo në Jesús lo no: ―Goḻtënie bla meḻ ne blozh bnaaz to i nu dieṉ.

¹¹Dzigo güey Pedr biep me leṉ barcw, güeyxadz me guiex ne no meḻ ga; dzigo bdobniu mew bdziṉnie mew haxta zaatne nacpaa ro nis. Meḻ tafa, niapse ma mbeew, zeeṉe bgab ma rgaa ma tib gayoo chooptsiiptsoṉ lo grë ma; niicle scataa nzian ma, per blëb guiex co, briezda.

¹²Blozh ga, bredz me no, në me: ―¡Goḻtë na, zeeṉa gowxeren to! Ni tib no bnabdiidzd lo me dieṉ pe nli mew; sac, ¡rieṉpaa no ne nli mew!

¹³Dzigo wbig me bdiiz me guietxtil co lo no, bzheṉ me meḻ ne, bneedz me ma lo no.

¹⁴Ga bioṉ vuelt brieequia me lo no wlal ne brieeban me.

¹⁵Blozhse bdioowxeren no, bredz Jesús Pedr, psilo zho bzë zho grop zho; dzigo rëb me lo Pedr: ―Simón (xingan Jonás), ¿pe nli dzigo rleynieraa luu naa que grë zha qui? ―Nquialadz naa luu ―rëb Pedr―, ni naṉlegaa luuw gaṉle. ―Pteedlo grë xpëcwxiil win naa sca ―rëb me.

¹⁶Wbiire me, rëb me lo Pedr: ―Simón (xingan Jonás), ¿pe nlipaa dzigo rleynie luu naa? ―Nquialadz naa luu ―rëb Pedr. Dzigo rëb me: ―Pquianap xpëcwxiil naa sca.

¹⁷Wbiireque me stib rëb me lo Pedr: ―Simón (xingan Jonás), ¿pe nlipaa nquialadz luu naa? Zeeṉe bin Pedr sca rëb me, mban goc zdoo Pedr; sac gale rac tsoṉ vuelt zinabdiidz me lo Pedr, dzigo rëb Pedr: ―Luu nac meṉ ne rnabey, luu naṉa grësew, naṉ luu gaṉle nquialadz naa luu. Dzigo rëb me: ―Teḻne nli nquialadz luu naa, yquiaanap luu xpëcwxiil naa sca.

¹⁸’Zeeṉe goṉ bii nguieg luu, led rsoladz luu gaṉle luuzhal racw xab luu, rrieelo rie luu zaatne racladztaa luu; per zeeṉe goṉ laa luu gac meṉgolraa, loxaque nia luu glis luu zhaale zha ne ygacwxab luu, ni zienie zho luu zaatne ni racladzd luu.

¹⁹Zeeṉe znu rëb me lo Pedr, ga bzeet me zha nac guieḻgut ne ygaa Pedr, ni ga glu Pedr gaṉle pa lotaa meṉ nroob nac Dios. Blozhse ga, rëbchaa me: ―¡Dënaḻ zhits naa!