Juan 21:6-22 in San Blas Kuna

⁶ Geb Jesús amarga sogded: —Be saki ur-argan-nuedsik mimar, geb bemar ua gamaloed. Geb degi, saki-mismargua, ua-bukidar-gasmalad. A-ular, geg saki onakguarmalad.

⁷ Geb degi, Jesús-na-nue-sapin-sabesailadid, Pedroʼga sokalid: —¡We, anmar-Dummad-Jesús gudiid! Simón-Pedro itoargu, we Dummad-Jesúsʼye, e-mordummad yosa imaksad. Ar ade, mor-esus gunaid, geb Jesúsʼse-naega demargi yog-argwannar imaksad.

⁸ Jesús-sapingan-baigandi urgi armalad, saki ua-ena ebipiarmalad, ar ade, dogdar mata-gakagi dikasur gunaisurmalad, unnila mor-suar dulataled-wilub-bangu (100) gunanaid.

⁹ Jesús-sapingan gakase aidenonimargu, soo gasii daknonimalad. Geb ua, degi, madu, soo-birgi-mai dakarmalad.

¹⁰ Jesús amarga sogded: —Emisgwa be ua-gasmalad wis-sedamar.

¹¹ Simón-Pedro urgi nakwisad. Geb saki ua-dummagan-ena-bukwa mata-gakase ebipialid. Ua-dummagan uka-dulagugle-gakambe-gakapaa (153) gasmalad. Ua ichesur-inigwele, saki gwen achirmaksasulid.

¹² Jesús e-sapinganga sogded: —Dagmar, mas gundamar. Ar e-sapingan-wargwensaar gwen wis-ese-egisbi itossurmalad, ¿be doaye? Ar ade, wismalad, we e-Dummadid.

¹³ Geb Jesús madu-susgua, e-sapinganga madu uksad, degi, ua-susbargu, e-sapinganga uksabalid.

¹⁴ Jesús gannar-durgusad-sorba, wesega, ilapaagus e-sapinganse magarogusad.

¹⁵ Mas-guchamargua, Jesús, Simón-Pedroʼga sogded: —Jonás-machi-Simón, be wemarba, ¿bur bule be an-sabe? Pedro, abin-sogded: —Eye, Dummad. Ar be wisid an be-sabed. Geb Jesús ega sogdesun: —Degirdi, an-dulamar-sibad-wawaad-mimmiganyob-gudiid nue be anga sedii imako.

¹⁶ Irbogwadgi gannar Jesús sogdebalid: —Jonás-machi-Simón, ¿be an-sabe? Pedro, abin-sogded: —Eye, Dummad. Be wisid an be-sabed. Geb Jesús, abin-sogded: —Degirdi, an-dulamar-sibad-wawaadyob-gudiid nue be anga akwedii imako.

¹⁷ Gannar irbaagwadgi Jesús sogdebar: —Jonás-machi-Simón, ¿be an-sabe? Pedro, Jesús ega gannar-gannar irbaagus-soge-itogedba bukib-ito naded. Ega soggu: “¿Be an-sabe?” Pedro, abin-sogded: —Dummad, bela ibmar be wisid. An nue-be-sabed be wisid. Jesús ega sogded: —Degirdi, an-dulamar-sibad-wawaadyob-gudiid nue be anga sedii imako.

¹⁸ Jesús Simón-Pedroʼga sogdebar: —Napira an bega soged, be sapingwaunni, wargwengi be mor yodaed, degi, bia-be-nabiedba be naddaed. Ar be seredgusardi, bega argan onakmaloed, degi, bega mor yomarbaloed, degine, be nabisulidba be-sedmaloed.

¹⁹ Jesús degisogsadi, sogsagusdo, Pedroʼde igi-burgoe, degi, igi Bab-Dummad-nug odummogoe. Jesús weyob-sogsagu, Pedroʼga sogdebar: —Anba be dage.

²⁰ Pedro aibiriargu, dakalid, Jesús-na-nue-sapin-sabedi, Jesúsʼba, degi, eba daniki. A-sapinde napi-sedomas-gunbukwa-gusmargu, Jesús-e-dikarba-sii gusadid. Weyob Jesúsʼse-egichii gusadid, dummad, ¿doa darba be ukoye?

²¹ Pedro a-daksagu, Jesúsʼga sogded: —Dummad, ¿we-duledina?

²² Jesús ega sogded: —We-dule an-gannar-dagedse amba dula-gudii an abegele, ¿be anga akar sogosi? Geg be anga akar soged. ”Bedi be anba dage.”

⁶ Geb Jesús amarga sogded: —Be saki be ur-argan-nuedsik mimar, geb agi bemar ua gamaloed. Geb degi saki mismargua, ar ua-bukidarad-ular, saki bene onakguarmalad.

⁷ Geb degi Jesús-sapin-wargwen, na e-sapin-nue-sabedi, Pedroga sokalid: —¡Be dake, we Dummad-Jesús gudiid! Simón-Pedro itoargu, we Dummadye, e-mor-aski-yoleged yosaa imaksad, ar ade na mor esus-gunaid, geb degi Jesússe-naega demargi yog argwannar imaksad.

⁸ Ar Jesús-sapingan-baigandi urgi armalad, saki ua-ena ebipiarmalad, ar ade dogdar mata-gakagi dikasur gunaisurmalad, unnila mor-suar dulataled-irgwen-wilub-bangu gunanaid.

⁹ Jesús-sapingan gakase aidenonimargu, daknonimalad soo gasii, ua soo-birgi mai, degi, madu maibar.

¹⁰ Jesús amarga sogded: —Emi be ua-gasmalad wis sedamar.

¹¹ Simón-Pedro urgi nakwisad, degi saki, ua-dummagan-ena ebipialid, mata-gakase. Ua-dummagan dulagugle-gakambe-gakapaa (153) gasmalad. Ua ichesur-inigwele, saki gwen achirmaksasulid.

¹² Jesús na e-sapinganga sogded: —Dagmar, mas gundagmar. Ar e-sapingan-wargwensaar gwen wis ese egisbi itossurmalad: “¿Be doa?” Ar ade wismalad, we Dummad-gudiid, Jesús.

¹³ Geb Jesús madu susgua, e-sapinganga madu uksad, degi ua-susbargu, ua e-sapinganga uksabalid.

¹⁴ Ar Jesús burgwisgu, gannar-durgusad-sorba deun ilapaagus e-sapinganse na magaroed.

¹⁵ Mas guchamargua, Jesús, Simón-Pedroga sogded: —Simón, be Jonás-machi, ¿be bur-bule wemarba be an-sabe? Pedro, abin-sogded: —Eye, Dummad, ar be wisid an be-sabed. Geb Jesús ega sogdesun: —An-dulemar sibad-wawaad-mimmiganyobid be anga akwena.

¹⁶ Irbogwadgi gannar Jesús sogdebalid: —Simón, be Jonás-machi, ¿be an-sabe? Pedro, abin-sogded: —Eye, Dummad, be wisid an be-sabed. Geb Jesús, abin-sogded: —An-dulemar sibad-wawaadyobid nue be anga ako.

¹⁷ Gannar irbaagwadgi Jesús sogdebar: —Simón, be Jonás-machi, ¿be an-sabe? Pedro bukib-ito naded, gannar irbaagus ega sogedba: “¿Be an-sabe?” Pedro, abin-sogded: —Dummad, ar bela ibmar be wisid, ar be wisid, an be-sabed. Jesús ega sogde: —An-dulemar sibad-wawaadyobid be anga akwena.

¹⁸ Jesús Simón-Pedroga sogdebar: “Napira an bega soged, be sapingwaunni, na be wargwen mor yo-daed, degi, bia-be-nabiedba na be nad-daed. Ar be sered gusardi, bega argan onakmaloed, degi, bega mor yomarbaloed, degine, be-sedmaloed, be nabisulidba.”

¹⁹ We Jesús degi-sogsadi, sogsa-gusdo, we igi Pedro oburgomaloedgi, Bab-Dummad-nug odummogoed. Weyob Jesús sogsagu, Pedroga sogdebar: —Anba be naiguo.

²⁰ Pedro aibiriargu, dakar, Jesús-sapin-wargwen Jesús-na-nue-sabedi, igid napi sedo mas gunsigu e-dikarba sii-gusad, ese egichisad: “Dummad, ¿doa darba be ukoe?”

²¹ Pedro a-daksagu, Jesúsga sogded: —Dummad, ¿we-duledina?

²² Jesús ega sogded: —Ar we-dule an gannar-dagedse amba dula gudii an abegele, ¿ar be akar sogode? Ar bedi anba dage.