Juan 20:7-28 in San Blas Kuna

⁷ Degine, mor-Jesús-nonogi-obirmaklesad bukwa daksabalid. We-mor-Jesús-nonogi-obirmaklesad atued-sibu-walik buksulid. Nue-obipirmakar bachikii bukwad.

⁸ Geb degi, Juan, we-inse neg-uanse nonigusadi, neg-uan-yaba dogsamosunnad. A-sapin, deyob ibmar-gusad-daksagu, Jesús-durgusadgi bengussulid.

⁹ Ar ade, amba akusunna Bab-Dummad-Garda-narmakaled itomalad. Agi sognaid, Jesús burgwisar, gannar durguergebye.

¹⁰ Geb, wemar-Jesús-sapingan-warbogwad gannar e-negse nadmarsunnad.

¹¹ Ar María-Magdalenaʼdi neg-uan-dikarba, neg-magaba bogwichid. Bogwichidgine, neg-uanyaba nue-atakegala, dulluu imaksad.

¹² Geb agine, María baliwiturmar-warbo mor-sibu-yoyoi-sii dakalid. Baliwitur-wargwen Jesús-e-nono-megisadgi siid. Baiddi, e-mali-duku-megisadgi siid.

¹³ Baliwiturmar Maríaʼga sogded: —Omegwa, ¿ibiga be boe? María, abin-sogded: —An-ibe an-Dummad sesmalad. An wissulid, bia an-ibe mesismala.

¹⁴ María degisogsagu, aibiridgu, dakalid, Jesús e-walik-gwichi. Degi-inigwele, María wissulid, dule-e-walik-gwichidi, we, Jesúsʼdeeye.

¹⁵ Jesús ega sogded: —Omegwa, ¿ibiga be boe? ¿Doa be amie? Ar María, we-dule dule-nainu-akwedye-bisoggu, ega sogded: —Dule, ar mui be sesale, anga be soge, bia be mesisa, adi, an ase aminaoed.

¹⁶ Jesús ega sogded: —¡María! María Jesúsʼsik-aibiris-imasgu, binnasur sogded: —¡Raboni! (Arameo-gayaba sogleged, Odurdaked-Saila).

¹⁷ Jesús Maríaʼga sogded: —Mer be an-gae, ar amba yoo an-Babse an nakwed. Degi-inigwele, be an-gwenadganse nae, amarga be sogna: ‘An-Babse an nae sokarye. A-Baba, bemar-Babmogad, ase an nasokarye. An-Bab-Dummadse an nae sokarye. A-Baba, bemar-Bab-Dummadmogad, ase an nasokarye.’

¹⁸ Geb María-Magdalena, Jesús-sapinganse gayaburba sognadsunnad: “An Dummad-Jesús-daksaye.” Degine, María bela-Jesús-ega-ibmarsogsadi, amarga sogdapid.

¹⁹ Gebe-itoged-iba-nagudedgi, mutikusgu, Jesús-sapingana Judíoʼmar-dobed-ular, bela yawagak atibukwa, neg-gwagwengi na danar ambikusmalad. Agi-bukwa Jesús nonikid. Geb amar-abargi-gwisgunoniki, ega sogded: —¡Na, degite! Ulubgi-bogidik be itomarsun.

²⁰ Jesús deyob e-sapinganga sogsagu, e-argan, degi, e-dikar amarga oyoded. Geb e-sapingan e-Dummad-dakarmargu, bela weligwar-ito nadmalad.

²¹ Degi, gannar Jesús e-sapinganga sogdebalid: —Ulubgi-bogidik be itomarsun. Ar igi Bab an-barmiali, deyobi an bemar-barmidmogad.

²² Ar Jesús amarga degisogsagu, e-burba amargi buu imaksad, geb amarga sogded: —Bemar Bab-Burba-Isligwaled nikumarsun.

²³ Ar bemar doamarga isgued-osuloye-sogele, amar isguedsuli gunonikoed. Ar bemar doamarga isgued-osulosulile, amarga isgued osulolegosulid.

²⁴ Tomásʼdi, e-sapin-ambe-gakabogwad-wargwenadid, Dídimoʼye nugbalid. A-dule, Jesús-nonigusgu, deun Jesús-sapinganba sisurgusad.

²⁵ Degisoggu, Jesús-sapingan-baigan ega sogsamalad: —Anmar, Dummad-daksamalad. Tomás, abin-sogded: —An Jesús-argangi esgoro-yolesad-e-wilubgan an daksulile, degi, an-goo an agi odosulile, gege an itoged. Deginbali, an-argan e-dikargi an odosurbalile, gege an itobalid.

²⁶ Itoged-irgwenad-nasad-sorba, gannar Jesús-e-sapingan negyaba bukwamalad, agi Tomás emarba sii gusmogad. Deun, bela yawagakmar atibukwa-inigwele, Jesús dognonikid. Geb amar-abargi-gwisgunoniki, ega sogded: —¡Na, degite! Ulubgi-bogidik be itomarsun.

²⁷ Geb degi, Jesús Tomásʼga sogded: —Wegi be-goo be odoge, an-argan be dake. Be-argan be seda, an-dikargi be ododage. Mer be an-bengue. An-gannar-durgusad mer be bengue.

²⁸ Geb degi, Tomás, abin-imakde, sogded: —¡An-Dummad, an-Bab-Dummad!

⁷ degine, daksabalid, mor-Jesús-nonogi-obirmaklesad atued-sipu-walik buksuli, nue-obipirmakar bachik bukwa.

⁸ Geb degi Jesús-sapin-baid iduar-nonigusad, neg-uan-yaba dogsamosunnad. A-sapin daksagu, Jesús-mui sate, gwen bengussurmogad, Jesús gannar durgusad.

⁹ Ar ade Bab-Dummad-Gardagi-narmakaled amba yo nue mag itomalad, we-Jesús-burgwisad gannar durguer-gebye.

¹⁰ Degi, wemar-Jesús-sapingan-warbogwad gannar negse nadmarsunnad.

¹¹ Ar Maríadi neg-uan-dikarba, neg-magaba bogwichid. Ar bogwisgua, nue neg-uan-yaba atakegala, dulluu imaksad.

¹² María dulluu imaksagu, dakalid, angermar-warbo mor-sibu yoyoi, wargwen bia Jesús-megisad e-nono-inik sii, baiddi e-mali-duku-inik simogad.

¹³ Angermar Maríaga sogdemalad: —¿Omegwa, ibiga be boe? María, abin-sogded: —Ar an-Dummad an-ibe sesmalad, emigindi an wichulid, bia an-ibe mesismala.

¹⁴ María degi-sogsagua, aibiriargu, Jesús-e-walik gwichi dakalid. Ar ome wichursunnad, we Jesús e-walik gwichid.

¹⁵ Jesús ega sogded: —¿Omegwa, ibiga be boe? ¿Doa be amie? Ar ome, we dule-nainu-akwedye bisoggu, Jesúsga sogded: —Dummad, ar dule be sesale, anga be soge, bia be mesisa, adi an na sedegar.

¹⁶ Jesús ega sogded: —¡María! María Jesússik aibiris imasgu, ega sogded: —¡Raboni! (A sogleged, Odurdaked-Saila.)

¹⁷ Jesús Maríaga sogded: —Mer be an-ebu, ar amba yo an-Babse an nakwed. An-gwenadgansedi be nae, amarga be sogna: ‘An-Babse, degi bemar-Babse an nakwe-sokalid, an-Bab-Dummadse, degi, bemar-Bab-Dummadse.’

¹⁸ Degi María-Magdalena nadsun, Jesús-sapinganga sognaded: —Dummad an daksaye. Degine, igi Jesús ega sogsa-gusa, María bela amarga sogsabalid.

¹⁹ A-ibagi mutikid-nagunonigu, gebe-itoged-iba nagudedgi, Jesús-sapingana na danar bukwa-gusmalad. Judiomar-dobed-ular bela yawagak-atibukwad. A-abargi Jesús ukiar magargunonikid. Jesús na e-sapinganga sogded: —¡Na, degite! Ulubgi bogidikid bemar itomarsun.

²⁰ Ar Jesús e-sapinganga degi-sogsagu, emarga e-argan, degi, e-dikar oyoded. E-sapingan na e-Dummad-dakarmargu, bela weligwar ito nadmalad.

²¹ Degi, gannar Jesús na e-sapinganga sogdebalid: —Ulubgi bogidik bemar itomarsun. Ar igi Bab an-barmiali, deyob an bemar-barmidmogad.

²² Ar Jesús emarga degi-sogsagu, e-burba amargi buu imaksagu, amarga sogdesun: —Bab Dummad Burba Nued bemar abingamarmosun.

²³ Ar doamarga bemar iskued-osuloye sogele, amar iskued-suli gunonikoed. Ar doamarga bemar iskued-osulo-sulile, amar-iskued ega osulolegosurmogad.

²⁴ Ar Tomásdi, e-ambe-gakabogwad-wargwen, Dídimoye-nugbalid, a-dule, Jesús nonigu, deun emar e-ambe-gakabogwadba sisulid.

²⁵ Jesús-sapingan-baigan ega sogsamalad: —Anmar-Dummad, anmar daksamarye. Tomás, abin-sogded: Ar Jesús-argangi eskoro-yolesad-e-wilubgan an-sunnad an daksulile, degi, an-goo an agi odosulile, deginbali, an-argan e-dikargi an odosurbalile, gege an itoged.

²⁶ Itoged-irgwenad-sorba, Jesús-e-sapingana neg-yaba bela gannar bukwamaladgi Tomás eba sii-gusmogad. Deun bela yawagak-atibukwad-abargi Jesús ukiar na e-sapinganse magargunonikid. Amarga sogded: —¡Na, degite! Ulubgi bogidik bemar itomarsun.

²⁷ Geb degi Jesús Tomásga sogded: —Wegi be-goo be odoge, an-argan be dake. Degine, be-argan be seda, an-dikargi be ododage. Be an-bengusulir-gebed. An gannar durgusad mer be an-bengue.

²⁸ Geb degi Tomás, abin-imakde, sogded: —¡An-Dummad, degine, an-Bab-Dummadbar!