Juan 20:7-28 in Ixil

⁷ Loqꞌ aatz u bꞌuꞌj vaꞌl bꞌachichku iviꞌ u Jesuus, yitꞌ atich koj ok xoꞌl qꞌu liikin bꞌuꞌj. Pek paarten tek bꞌochichku bꞌen.

⁸ Ech okoꞌp u chusulibꞌ tu u jul majte, vaꞌl bꞌaxal oponi. Utz tila aas yeꞌkanich tek u Jesuus. Ech nal tek inima vaꞌl alax te.

⁹ Tan yeꞌsajich tel itxumbꞌal tu u yol tzꞌibꞌamalka aas ministeer saqꞌaavitzꞌpu u Jesuus xoꞌl qꞌu kamnaj.

¹⁰ Ech qꞌaavtekbꞌen qꞌu chusulibꞌ tu tatibꞌal.

¹¹ Pek aatz u Liꞌ, nichtoqꞌ tziꞌ u jul aal teluꞌl. Utz ikꞌoꞌbꞌaꞌ kuꞌ tibꞌ, sajin okoꞌp tu u jul, tuul nichtoqꞌeꞌ.

¹² Utz til kaꞌvaꞌl aanjel; saj oksaꞌm. Kꞌujlich maꞌl tiviꞌ vaꞌl atichku vichiꞌl u Jesuus utz; vaꞌt tu tajan.

¹³ Ech tal tu u Liꞌ ech tzaꞌ: —Ixoj, ¿kantuꞌ nooqꞌeꞌ?— Texh teꞌleꞌ. Tal u Liꞌ ech tzaꞌ: —Nivoqꞌeꞌ tan, iqꞌol ibꞌen vunBꞌaal. Utz yeꞌ vootzaj til ex aqꞌlojka.— Texhtuꞌ.

¹⁴ Taꞌxh veet tal u kam tziꞌ, sajin tiꞌ iqul. Utz aꞌ tek tila atich u Jesuus tziꞌ. Loqꞌ yeꞌich tootzaj oj u Jesuusich.

¹⁵ Uncheeꞌ tal u Jesuus te ech tzaꞌ: —Ixoj, ¿kantuꞌ nooqꞌeꞌ? ¿Abꞌil nachokeꞌ?— Texh te. Aatz u Liꞌ tan, aꞌ titzꞌa aas u xeen chikobꞌeꞌm vaꞌl nichqꞌilan. Tal te ech tzaꞌ: —Bꞌaal nitxaꞌ, untzꞌoj axh vetiqꞌon bꞌen vunBꞌaal, al ve til ex aaqꞌva. Ech seꞌnviqꞌo.— Texh te.

¹⁶ Tzaqꞌbꞌel tu u Jesuus ech tzaꞌ: —¡Liꞌ!— Texh te. Ipilqꞌu tek tibꞌ u Liꞌ. Utz tal te ech tzaꞌ: —¡Raboni!— Texh te. “Chusul” chu u tokebꞌal tu u yolbꞌal hebreo.

¹⁷ Tal u Jesuus te ech tzaꞌ: —Chajpuꞌin. Tan yeꞌsaj unbꞌenjeꞌ xeꞌ vunTat tu Amlika. Pek kuxh xeꞌ qꞌu vitzꞌin vatzik, qꞌul unchusulibꞌ utz, al te ech tzaꞌ: «Maꞌtjeꞌin xeꞌ vunTat, ayaꞌ u kuTat; xeꞌ vunTioxh, ayaꞌ u kuTioxh. Chia.» Chajaxh te.— Texh te.

¹⁸ Ech ibꞌen u Liꞌ, u aa Magdala utz, ex tal u bꞌaꞌnla yol tu qꞌu chusulibꞌ aas maꞌtich tiltu u kuBꞌaal. Utz tal te kam tal u Jesuus te.

¹⁹ Uncheeꞌ ankoꞌxh tu u bꞌaxa qꞌii tetz u xhemaana tziꞌ, sotzsaj tekuꞌen, katxꞌumich tibꞌ qꞌu chusulibꞌ tu vaꞌl molichku tibꞌ. Tan aꞌ nichixoꞌva qꞌu qꞌesal uqꞌaybꞌal. Utz ¡aꞌ texh til txaklich u Jesuus tixoꞌl! Tal ech tzaꞌ: —¡Atoj paas tetaanima!— Texhtuꞌ.

²⁰ Ech taꞌxh veet tal u kam tziꞌ, ikꞌuch qꞌul iqꞌabꞌ te tuchꞌ u txala tuul vaꞌl akꞌoni. Ech motx chit txuqꞌtxun qꞌu chusulibꞌ aas tiltu u kuBꞌaal tziꞌ.

²¹ Utz tal paj u Jesuus te ech tzaꞌ: —¡Atoj paas tetaanima! Utz kaniꞌch michajtukꞌasuꞌlin vunTat, echat echajax bꞌen nunbꞌaneꞌ.— Texh te.

²² Taꞌxh veet taltu u kam tziꞌ, ixuli ok kajiqꞌ kꞌatza. Utz tal te ech tzaꞌ: —Kꞌultaj u Tioxhla Espiiritu.

²³ Utz abꞌil sekuy ipaav, sakuylu vipaav. Pek abꞌil aꞌ yeꞌk sekuy ipaav, yeꞌk sakuyax majte.— Texhtuꞌ.

²⁴ Pek aatz u Maxh, yeꞌkich xoꞌl qꞌu chusulibꞌ aas opon u Jesuus bꞌaxa. Ayaꞌ maꞌl tu kabꞌlaal qꞌu chusulibꞌ vaꞌl Diidimo ibꞌii majte.

²⁵ Ech alax te tunjot qꞌu chusulibꞌ ech tzaꞌ: —¡Vetqillu u kuBꞌaal!— Texh te. Pek tal ech tzaꞌ: —Yitꞌ saꞌkojunnima aas qꞌaav itzꞌpia, untzꞌoj yeꞌk savil qꞌu echlal tiqꞌabꞌ u tokebꞌal qꞌu laauxh utz, savoksa viꞌ unqꞌabꞌ tuul. Saꞌkojunnima oj yeꞌk savaqꞌ okoꞌp u viꞌ unqꞌabꞌ tu u txala tuul vaꞌl tzokꞌli.— Texhtuꞌ.

²⁶ Uncheeꞌ vaaxajilich tek qꞌii tuul, atich paj qꞌu chusulibꞌ toꞌotzotz. Utz atich tek u Maxh tixoꞌl. Tuul aqꞌbꞌu u Jesuus kꞌuxh jupich otzotz. Utz toksa tibꞌ tixoꞌl. Tal te ech tzaꞌ: —¡Atoj paas tetaanima!— Texhtuꞌ.

²⁷ Tal tek tu u Maxh ech tzaꞌ: —Il qꞌul unqꞌabꞌ tzaꞌ. Oksa u viꞌ aqꞌabꞌ tu u bꞌenabꞌal laauxh. Utz aqꞌ okoꞌp vaqꞌabꞌ tu u tzokꞌbꞌeꞌm txala vuul. Ech yeꞌ koꞌxh kaꞌtziiunaxh. Pek nima aas qꞌaavitzꞌpꞌin.— Texh te.

²⁸ Uncheeꞌ tzaqꞌbꞌu tek u Maxh utz, tala: —¡Noj peꞌxh axh, unBꞌaal, unTioxh!— Texhtuꞌ.

⁷ tukꞌ u suꞌteꞌ uveꞌ bꞌochlukat viviꞌ u Jesús. As vaꞌlen bꞌalqꞌumalikkat veꞌt kan u suꞌteꞌ.

⁸ As ok veꞌt vimool u Luꞌeꞌ uvaꞌ oon bꞌaxa tziꞌ u juleꞌ. As tul til naj uveꞌ yeꞌlik veꞌt u Jesús tu u juleꞌ, as yak kuxh inima veꞌt naj uvaꞌ maꞌtik tul taama Aak,

⁹ tan yeꞌxnik pal chajnaj stuul tiꞌ uveꞌ tzꞌibꞌamal kan uvaꞌ la ul taama u Jesús unpajte.

¹⁰ As qꞌaav veꞌt kaꞌvaꞌl vichusulibꞌ Aakeꞌ kꞌatz unqꞌa imooleꞌ.

¹¹ As bꞌiilik kuxh stuul, as oon veꞌt u Maꞌleꞌ uveꞌ aa Magdala tziꞌ u juleꞌ unpajte. As vaꞌlik chit toqꞌ ixoj. As tul nikat toqꞌ ixoj, as kꞌoebꞌ veꞌt ixoj tiꞌ isajit ok tuul u juleꞌ.

¹² As til veꞌt ok ixoj kaꞌvaꞌl unqꞌa ángel uvaꞌ vaꞌlik chit ipolal unqꞌa toksaꞌmeꞌ. Xonlik umaꞌl u ángel viꞌ u sivaneꞌ uveꞌ atikkat bꞌen iviꞌ u Jesús. As xonlik umaꞌte uveꞌ atikkat bꞌen u toj Aakeꞌ tu uveꞌ mujlukat Aak.

¹³ As ech tal veꞌt unqꞌa ángel ileꞌ te u Maꞌleꞌ: —¿Ixoj, kam nooqꞌle?— tiꞌk unqꞌa ángel. Ech tal veꞌt u Maꞌl ileꞌ: —Ni voqꞌeꞌ, tan tiꞌ uveꞌ kat eqꞌoliy veꞌt u Kubꞌaal Jesús. As yeꞌ vootzaj katil kat eqꞌolkat,— tiꞌk ixoj.

¹⁴ As tul kuxh tal ixoj u yoleꞌ, as isuchqꞌi tibꞌ ixoj. Til veꞌt ixoj uvaꞌ txaklik veꞌt ok u Jesús kꞌatz ixoj. As jit texhla ixoj Aak.

¹⁵ As ech tal veꞌt Aak ileꞌ: —¿Ixoj, kam nooqꞌle? ¿Abꞌil nachukeꞌ?— tiꞌk Aak. Ech tal veꞌt ixoj ileꞌ: —Pap, asoj axh kat eqꞌon, as al sve katil bꞌex aaqꞌkat. As la bꞌen veqꞌo,— tiꞌk ixoj, tan kamal u xeen tetz unqꞌa chikoeꞌ u najeꞌ uvaꞌ nik tal ixoj.

¹⁶ As ech tal veꞌt u Jesús ileꞌ: —¡Maꞌl!— tiꞌk Aak. As isuchqꞌi veꞌt tibꞌ ixoj. As ech tal veꞌt ixoj ileꞌ tu yolbꞌal hebreo: —¡Raboni!— tiꞌk ixoj. As aꞌ isuuchil u yoleꞌ Raboni uvaꞌ Chusul qetz tu kuyolbꞌal.

¹⁷ As ech tal veꞌt u Jesús ileꞌ: —Chajpu in, tan yeꞌ bꞌenoj in kꞌatz vunBꞌaaleꞌ. Pet kuxh al te unqꞌa eetz chusulibꞌeꞌ, tan bꞌen veꞌt in kꞌatz vunBꞌaaleꞌ uvaꞌ eBꞌaal, as vunTiixheꞌ uvaꞌ eTiixh,— tiꞌk Aak.

¹⁸ As bꞌex veꞌt ixoj unpajte kꞌatz unqꞌa tetz chusulibꞌeꞌ. As bꞌex tal veꞌt ixoj uvaꞌ maꞌtik tilat ixoj Aak. As tal veꞌt ixoj kam uvaꞌ kat tal Aak te ixoj.

¹⁹ As an chit tu u bꞌaxa qꞌiieꞌ tu u xhemaanaeꞌ, as molik veꞌt tibꞌ unqꞌa ichusulibꞌ Aakeꞌ tul uvaꞌ maꞌtik itzꞌotin veꞌteꞌ. As kolimalik u kabꞌaleꞌ, tan nikat ixoꞌv chajnaj vatz unqꞌa iqꞌesal unqꞌa tenameꞌ. As ul veꞌt u Jesús txakebꞌoj xoꞌl chajnaj. As ech tal veꞌt Aak ileꞌ: —As bꞌaꞌnoj etatin sevatzaj sekajayil,— tiꞌk Aak.

²⁰ As tul tal Aak u yoleꞌ, as ikꞌuch veꞌt Aak viqꞌabꞌeꞌ tukꞌ u txala tuuleꞌ te chajnaj. As vaꞌlik chit itxuqꞌtxun veꞌt chajnaj tul til chajnaj Aak.

²¹ As ech tal veꞌt Aak ileꞌ te chajnaj unpajte: —Aꞌ vibꞌaꞌnil u Tiixheꞌ la atin sexoꞌl. As tuk unchaj bꞌen ex tiꞌ talax vunyoleꞌ echeꞌ kat ibꞌan u Kubꞌaal Tiixheꞌ sve, tan kat ichaj tzan in Aak tiꞌ talax viyoleꞌ sexoꞌl,— tiꞌk u Jesús.

²² As tul tal u Jesús u yoleꞌ, as ixuli bꞌen Aak vixeveꞌ. As ech tal Aak ileꞌ: —Ekꞌultaj u Tiixhla Espíritu,

²³ tan abꞌil uvaꞌ la etal isotz ipaav, as la sotz ipaav. Pet abꞌil uvaꞌ yeꞌ la etal isotz ipaav, as yeꞌl ipaav la sotzi,— tiꞌk Aak te unqꞌa ichusulibꞌeꞌ.

²⁴ As u Maxh uvaꞌ Xuꞌm chꞌelel uvaꞌ atik ok xoꞌl kabꞌlaval unqꞌa ichusulibꞌ u Jesús, as yeꞌlik naj tul ikꞌuch tibꞌ u Jesús xoꞌl unqꞌa ichusulibꞌeꞌ bꞌaxa.

²⁵ As tul ul veꞌt naj, as ech tal veꞌt ok unqꞌa imool naj ileꞌ ste: —Kat qillu veꞌt u Kubꞌaal Jesús,— tiꞌk chajnaj. As ech tal veꞌt u Maxh ileꞌ: —Lanal vil u tokebꞌal unqꞌa laavuxheꞌ tu viqꞌabꞌeꞌ, as lanal voksa u viꞌ unqꞌabꞌeꞌ stuul as tukꞌ u txala tuul Aakeꞌ uveꞌ qopel, as aꞌn la unnimaeꞌ,— tiꞌk naj.

²⁶ As ech vaaxit qꞌii stuul, as jupik tibꞌ unqꞌa ichusulibꞌ u Jesús tu u kabꞌal unpajte. As atik u Maxheꞌ xoꞌl chajnaj. As aat kuxh til chajnaj uvaꞌ txaklik veꞌt ok Aak xoꞌl chajnaj. As ech tal veꞌt Aak ileꞌ: —Aꞌ vibꞌaꞌnil u Tiixheꞌ la kaa sexoꞌl,— tiꞌk Aak.

²⁷ As ech tal veꞌt Aak ileꞌ te u Maxheꞌ: —Oksa u viꞌ aqꞌabꞌeꞌ tu uveꞌ kꞌaxbꞌinale. As oksa viꞌ aqꞌabꞌeꞌ tu u txala vuuleꞌ unpajte. As yeꞌ kuxh kaꞌkabꞌin aama. Pet kꞌujbꞌaꞌ akꞌuꞌl sviꞌ,— tiꞌk Aak.

²⁸ As ech tal veꞌt u Maxh ileꞌ: —Kubꞌaal Jesús, as axheꞌ vunTiixheꞌ,— tiꞌk naj.