Juan 1:10-47 in San Blas Kuna

¹⁰ We-gwallu-meegwad we-napneggi gudigusad. Ar we-napneg a-sogedba nagus-inigwele, degite, dulemar-we-napneggi-bukmalad akudaksamalad.

¹¹ We-gwallu-meegwad e-dulemarse nonikinad, e-dulemar gwen abingassurmalad.

¹² Ar bela dulemar we-Gayaburba-abingasmaladdi, e-nuggi-bengussurmaladba, amarga Bab-Dummad-e-mimmiganga-guega igar-uknonikid.

¹³ We-dulemala, Bab-Dummad-Burba-Isligwaledba gwalulenonimalad. Dulemar-sogedba gwalulessurmalad, dulemar-igarginsulid, dulemar-binsaedginsurbalid. Wemar Bab-Dummad-sogedba Bab-Burba-Isligwaledgi gwalulenonimalad.

¹⁴ We-Gayaburba, anmaryobi sanale san-nika gunonimogad, degine, anmar-abargi sanale gudigusmogad. Anmar e-gangued-yeerdakleged daksamalad. Unnila Bab-Machi-Wargwenna-Gued-e-gangued-yeerdakleged anmar daksamalad. We-dule, nue-dulemar-sabe nanadii gusad. Degine, igar-napiragwadgi nanadii gusbalid.

¹⁵ Diigi-dule-oged-Juan a-dulegi sunmaksagusad, sogdegusad, deun binnasur gotegusgu: “An a-dulegi bemarga sunmaksa gusmalad: ‘Dule-wargwen an-sorba-danikoedi, a, an-iduedid, ar a-inse an-idu gudiguad.’ ”

¹⁶ Ar a-dule, bela-bela anmargi nued binsamaisoggu, belagwapa ibmar-nikadba ibmar-nuegan anmarga ukmaiguad.

¹⁷ Ar Bab-Dummad Moisésʼba dulemarga igar mesisad, dulemar igi nanaergebe. Ar Bab-Dummad na e-nue-sabeddi, degi, e-igar-napiragwaddi, Jesucristoʼba anmarga uknonikid.

¹⁸ Dule gwen Bab-Dummad dakdisulid. Unnila Bab-Dummad-Machi-Wargwennagwad, e-Babba-mesa-gudiid, a, anmarga Bab-Dummad-osanalononikid.

¹⁹ Diigi-dule-oged-Juan weyobi Jesúsʼgi sunmaksagusgu, weyob gusdo. Deunni, Judíoʼmar-dummagan Jerusalén-akar dule-irwa-Bab-Dummadse-gormalad, degi, a-bendakmalad-Levitaʼmar barmiargusad, Juanʼse-egismalaga: —¿Be doa-dulesunna?

²⁰ Juan gwen yapa-soge gussulid. Innikigwadba sogsad: —Ani an Cristoʼsulid.

²¹ Degi, gannar Juanʼse egichidmarbalid: —Degite, ¿be doa-dulesunna? ¿Be Elías? Juan, abin-imaksad: —Suli, an a-dulesurbali. Juanʼga sogdemarbarsunnad: —Degite, ¿be Bab-Dummad-gayaburba-barsoged anmar edarbediiddi? Juan, abin-imakdebalid: —Suli, an a-dulesuli.

²² Degi ega sogdemarsunnad: —Degite, ¿be doa-dulesunna? Ar anmar dule-anmar-barmialidga sogergebed, be doa-dule. Degite, ¿doa-duleye na be sogsunna?

²³ Juan, abin-sogdegusad: —Bab-Dummad-gayaburba-barsoged-Isaías sogsa gusad: ‘Dule-wargwen nega-dulesulidganba binnasur sunmaknonikoed, dulemarga sognonikoed: Dule-Dummad-idu igar mayemar, igar swilidik mesmar.’ Isaías 40:3 Ani an a-duledo.

²⁴ Dulemar-Juanʼse-barmilear-gusadi, Fariseo-sapingan gumalad.

²⁵ Amar Juanʼse egichiarmalad, ega sogdemalad: —Ar bede Cristo-sulidde, degi, Elías-surbalidde, degine, Bab-Dummad-gayaburba-barsoged-anmar-edarbediid-surbalidde. Ar degite, ¿ibiga be Bab-Dummad-diigi-ogleged-igar imakdisunna?

²⁶ Juan, amar-abin-imakdegu, sogded: —Andi Bab-Dummad-diigi-ogleged-igar-imakedi, unnila diigi dule-ogdiid. Ar bemar-abargi dule-wargwen-gudiiddi aku be dakmalad.

²⁷ A-dule an-sorba-danikidi, we an-iduedid. Ar anba bur dule-dummadsoggu, e-sapat-dubse-bakar geg an ei esiked.

²⁸ We-degigusadi, Betania-neg-nugadgi, Jordán-diwar-obakar, bia Juan Bab-Dummad-diigi-ogleged-igar-imaknai, agi deyob gusdo.

²⁹ A-banedgine, Juan, Jesús-ese-dani-dakargua, sogded: “Be dakmalana, we-dule, Bab-Dummad-Sibad-Wawaad-E-Mimmid, bela dulemarga we-napneggi isgued-osulogedid.

³⁰ We-dulenik an sogsagusad: ‘Dule-wargwen an-sorba danikid, a-dule an-iduedid, ar ade, a-inse an-idu gudiguad.’

³¹ Aku a-dule an dakmoganad. A-ulale, Bab-Dummad-diigi-ogleged-igar an imaknonikid. Adi, Israel-dulemar Bab-Dummad-epenne-barmidagoye-sogsad-dule magar dakmalagar.”

³² Juan, Jesúsʼnik sogsagusbalid: “Nibneg-akar Bab-Dummad-Burba-Isligwaled nuuyobi aidedani, an daksad. Degi, a-dulegi signoni an daksad.

³³ An a-dule akudakmoganad. Ar Bab-Dummad E-diigi-ogleged-igar-imakega-an-barmialidi, anga sogsad: ‘Dule-wargwengi Bab-Dummad-Burba-Isligwaled nuuyob-aidedani, degi, egi signoni, be daksale, we-dule, Bab-Dummad-Burba-Isligwaledgi dulemar-ogoed-duledo.’

³⁴ We deyob an daksad. Degisoggu, an sogdo, we-dule, nue-Bab-Dummad-Machi-sunnadye.”

³⁵ A-banedgine, Diigi-dule-oged-Juan, degine, e-sapingan-warbogwadmala iduar-gudigusadgi gannar gudiid.

³⁶ Deunni dakalid, Jesús e-walik gudii. Geb Juan sogded: —Be dakmalana, we-dule, Bab-Dummad-Sibad-Wawaad-E-Mimmid.

³⁷ Juan-e-sapingan-warbogwad degi-soge-itosgu, Jesúsʼba nadegusmalad.

³⁸ Jesús sorba-atakdegu, dule-warbogwad eba-dani-dakargu, amarga sogded: —¿Ibu be amimala? Amar, abin-sogdemalad: —Rabí, ¿bia be mai? (Rabí sogleged, odurdaked-sailaye).

³⁹ Jesús amarga sogded: —Be dagmar. Degi, be dakmaloed bia an mai. Amar Jesúsʼba nadegusmalad, degi, daksamalad bia Jesús mai. A-ibagi Jesús-walik osedosmalad, ar ade, bato sedosad.

⁴⁰ Dule-warbogwad Juan-sunmak-itosgu Jesúsʼba nadegusmaladi, wargwenadi Andrésʼye-nugad, Simón-Pedro-e-urbad.

⁴¹ Andrésʼde, e-ia-Simón-inse aminaded. Simón-amisgu, ega sogded: —Anmar Mesías-amisad. (Mesías sogleged, Cristoʼye).

⁴² Geb degi, Andrés, Jesúsʼse e-ia-Simón-senonikid. Jesús, Simón-nuu-dakdegu, ega sogded: —Be, Simón Jonás-machi, emigindi, Cefasʼye be nugguoed. (A sogleged, Pedroʼye).

⁴³ A-banedgine, Jesús Galileaʼse naesokargu, Felipe-dakalid, ega sogded: —Anba be dage.

⁴⁴ Felipe, Betsaida-neggweburginedid. Andrés, degi, Pedro, a-neggweburginmarmogadid.

⁴⁵ Felipe, Natanael-aminaded. Amisgu, ega sogded: —Anmar dule-wargwen amisad. Igi Moisés e-Igar-Mesisadgi-narmaksagusa, degi, igi Bab-Dummad-gayaburba-barsogmalad narmaksagusmarmoga, yoedse dule-wargwen danikoye, a-dule anmar amisad. A-dule, Jesúsʼye-nugad, Nazaretʼginedid, José-machid.

⁴⁶ Natanael, abin-sogded: —¿Ar Nazaret-neggweburgi sunna ibmar-nued nodasi? Felipe, abin-sogded: —Be anba dage, adi, be-sunnad be dakoed.

⁴⁷ Jesús, Natanael-ese-warmakdani-dakargu, Natanaelʼgi sogded: —Wedi, Israel-dule-sunnadid, dule-nuedid. We-dule, e-gwagegi emar-yardaked gwen naisulid.

¹⁰ A-gwallu-meegwad we-napneggi gudigusad, ar we-napneg a-sogedba nagus-inigwele, degite, dulemar-we-napneggi-bukmalad aku daksamalad.

¹¹ We-Gaya-Burba-Nued na e-dulemarse nonikinad, e-dulemar gwen abingassurmalad.

¹² Ar bela dulemar a-Gaya-Burba-Nued-abingasmaladdi, e-nuggi-bengussurmaladba, amarga Bab Dummad igar-uknonikid, na e-mimmiganga-gued-igar.

¹³ A-Gaya-Burba-Nuedgi-bensurmalad, Bab Dummad Burba Nuedba gwalulenonimalad, dulemar-sogedbarsulid, dulemar-igarginsulid, dulemar-binsaedginsurbalid. Suli, degisuli. A-dulemar Bab-Dummad-sogedba E-Burba-Nuedgi gwalulenonimalad.

¹⁴ We-a-Gaya-Burba-Nued, anmargii sanale san-nika-gunonimogad, degine, anmar-abargi sanale gudigusmogad. Anmar e-gandik-gaed daksamalad, unnila Bab-Dummad-Machi-Wargwenna-Gued e-gandik-gaed. A-dule ibibayobi dulemar-sabgue-wilubsulinad, degite, nue dulemar-sabe nanadii-gusad, degine, igar-napiragwadgi nanadii-gusbalid.

¹⁵ Juan-Bautista a-dulegi sunmaksa-gusad, sogde-gusad, deun binnasur gote-gusgu: —We-dulegi an bemarga sunmaksa-gusmalad: Dule-wargwen an-sorba-danikoedi, we an-iduedid, ar we-inse an-idu gudiid.

¹⁶ Ar a-dule bela-bela anmargi nued binsamaisoggu, belagwapa ibmar-nikadba ibmar-nuegan anmarga ukmaiguad.

¹⁷ Ar Bab Dummad Moisésba dulemarga igar-mesisad, dulemar igi nanaer-gebe. Ar Bab-Dummad-anmargi-nued-binsaeddi anmarga uklege-wilubsulinad na e-anmarga-ukbiedba anmarga ukmaid, degi, igar-napiragwaddi Jesucristoba anmarga uknonikid.

¹⁸ Dule gwen Bab-Dummad-dakdisulid. Unnila Bab-Dummad-Machi-Wargwennagwad, na e-Babba-mesa gudiid, a anmarga Bab-Dummad-osanalononikid.

¹⁹ Juan-Bautista Jesúsgi sunmaksa-gusgu, weyob gusdo. Deunni Judiomar-dummagan Jerusalén-akar dule-irwa-Bab-Dummadse-gormalad, degi, a-bendakmalad-barmiar-gusmalad, Juanse egismalagar: —¿Be doa-dule-sunna?

²⁰ Juan na dukin sogsa-gusad, gwen yapa sogsasulid: —Ani an Cristosur.

²¹ Degi gannar Juanse egichidmarbalid: —Degite, ¿be doa-dule-sunna? ¿Be Elías? Juan, abin-imaksad: —Suli, an a-dulesur. Juan-Bautistaga sogdemarbarsun: —Degite, ¿be Bab-Dummad-gaya-burba-berbeged anmar edarbediiddi? Juan, abin-imakebar: —Suli, an a-dulesur.

²² Degi ega sogdemarsun: —Degite, ¿be doa-dule-sunna? Adi dummaganga anmar sogega, be doa-dule. Degite, ¿doa-duleye na be sogsunna?

²³ Juan, abin-sogde-gus: —Isaías, Bab-Dummad-gaya-burba-berbeged sogsa-gusad: Dule-wargwen nega-dule-sulidganba binnasur sunmaknonikoed, dulemarga sognonikoed: Dule-Dummad-idu igar mayemar, igar-swilidik mesmar. Is. 40:3 Ani an a-duledo.

²⁴ Dulemar-Juanse-barmilear-gusmaladi, Fariseo-sapingan gumalad.

²⁵ Juanse egichiarmalad, ega sogdemalad: —¿Ar degite, ibiga be Bab-Dummad-digi-ogleged-igar imakdisunna, ar bede Cristosulid, degi, Elíassurbalid, degine, Bab-Dummad-gaya-burba-berbeged anmar edarbediidsurbalid?

²⁶ Juan, amar-abin imakdegu, sogsa-gus: —Andi Bab-Dummad-digi-ogleged-igar-imakedi, unnila digi an ogdiid, ar bemar-abargi dule-wargwen-gudiiddi aku be dakmalad.

²⁷ A-dule an-sorba-danikidi, we an-iduedid. Ar anba bur dule-dummadsoggu, gege e-sapat-dub esik an itoged.

²⁸ We degi-gusadi, bia Juan Bab-Dummad-digi-ogleged-igar imaknai, Jordán-diwar-obakar, Betania-neg-nugadgi, agi deyob gusa-gusdo.

²⁹ A-banedgine, Juan Jesús-ese-dani dakargua, sogded: —Be dakmalana, we-dule, Bab-Dummad-Sibad-Wawaad-E-Mimmid, bela dulemarga-we-napneggi-iskued osulogedid.

³⁰ We dule-nik an sogsa-gusad: ‘Dule-wargwen an-sorba danikid, ar a-dule an-iduedid, ar ade a-inse an-idu gudiid.’

³¹ Aku a-dule an dakmoganad. A-ulale, Bab-Dummad-digi-ogleged-igar an imaknonikid, adi Israel-dulemar mag dakega, doa Bab-Dummad-epenne-barmidagoye-sogsad-dule.

³² Juan Jesús-nik sogsa-gusbalid: —Nibneggi Bab Dummad Burba Nued nuuyobi aidedani, degi, a-dulegi nagunoni an daksad.

³³ An aku a-dule-dakmoganad, ar Bab Dummad digi-ogleged-igar-imakega an-barmialid, a anga sogsad: ‘Dule-wargwengi Bab Dummad Burba Nued aidenoni, degi, egi nagunoni be daksale, we a-duledo, Bab Dummad Burba Nuedgi dulemar-ogoed-duledo.’

³⁴ We deyob an daksad, degisoggu, nue an sogsundo, we-dule, Bab-Dummad-Machi-sunnadye.

³⁵ A-banedgine, gannar Juan-Bautista, degine, e-sapingan-warbo walik gudiid,

³⁶ dakarmalad, Jesús e-walik gudii. Juan sogded: —Be dakmalana, we-dule, Bab-Dummad-Sibad-Wawaad-E-Mimmid.

³⁷ Juan-e-sapingan-warbogwad degi-soge itosgu, Jesúsba nade-gusmalad.

³⁸ Jesús sorba atakdegu, dule-warbogwad-eba-dani dakargu, amarga sogded: —¿Ibu be amimala? Amar, abin-sogdemalad: —Rabí, ¿Bia be mai? (Rabí sogleged, odurdaked-sailaye.)

³⁹ Jesús amarga sogded: —Bemar dagmar. Degi be dakmaloed bia an mai. Amar Jesúsba nade-gusmar, degi, daksamar bia Jesús maid. A-ibagi Jesús-walik osedosmalad, ar ade bato sedosad.

⁴⁰ Emi dule-warbogwad Juan-sunmak-itosad, Jesúsba-nade-gusmalad, wargwen Andrésye-nugad, Simón-Pedro-e-urba.

⁴¹ Andrésde e-ia-Simón-inse aminaded. Simón-amisgu, ega sogded: —Anmar Mesías-amismalad. (Mesías sogleged, Cristo.)

⁴² Geb degi Andrés, e-ia-Simón Jesússe senonikid. Jesús, Simón-nuu-dakdegu, ega sogded: —Be Simón, Jonás-machi, emigindi Cefasye be nugguoed. (A sogledo, Pedro.)

⁴³ A-banedgine, Jesús Galilease naesokargu, agi Felipe-dakar, ega sogded: —Anba be dage an-sapinga guegar.

⁴⁴ Felipe, Betsaida-neggweburginedid. Andrés, degi, Pedro, a-neggweburginmarmogadid.

⁴⁵ Felipe, Natanael-aminad. Amisgu, ega sogde: —Moisés e-igar-mesisadgi igi narmaksa, degi, Bab-Dummad-gaya-burba-berbemalad egi narmaksamarmoga, yoedse dule-wargwen danikoye, a-dule anmar amisad. A-dule, Jesús, José-machi, Nazaretginedid.

⁴⁶ Natanael, abin-sogded: —¿Ar Nazaret-neggweburgi sunna ibmar-nued nodasi? Felipe, abin-sogde: —Be anba dage, adi be-sunnad be dakoed.

⁴⁷ Jesús, Natanael-ese-warmakdani dakargu, Natanaelgi sogded: —Wedi Israel-dule-sunnadid, dule-nuedid, we-dule gwagegi emar-yardaked gwen naisulid-duled.