27 Penga niyan, minikagi heman si Jesus diyà te sìyan tinoledaan din, “Sìyà den se inay nikaw.” Lekat te aldaw sìyan, impeogpà te tinoledaan sìyan se inay i Jesus kidoen te balay din.
28 Penga niyan, netegahan i Jesus te nepenga din den se kedita te insogò te Amay din kandin, aw minikagi, “Nelao a.” Pineokit kenyan, netoman se pakang tepad kandin tapay insolat diyà te kagi te Timanem.
29 Doen sibolan sinolan te bino sinengedan te wayeg. Inagem dan se ispongha intangen diyà te panga te kayo hisopo, aw impesopsop dan iyan ki Jesus.
30 Penga te pegsopsop din, minikagi, “Nepenga den.” Penga niyan, timikelong sikandin aw nematay.
31 Nayan, neinang iyan te meapon te aldaw te pegtegilan dan te Pista te Peglaklak. Ibeg te menge obanen te Judiyo, meabat lekat te kros se lawa te otaw nematay te eked pa sallep se aldaw, so se keeldawan niyan, yan se Sebado ontò melangkaw aldaw diyà te menge Judiyo. Yan se doun te nemoyò dan ki Pilato te pentigen te sondalo se benis te menge otaw inlansang diyà te kros amon ayas dan matay.
32 Yan insogò din se menge sondalo, aw pigpantig dan se benis te sebad otaw inlansang diyà te tangkil i Jesus, aw penga niyan diyà heman te sebad tangkil din.
33 Meneng pegdateng dan doton ki Jesus, kinità dan te nematay den sikandin, aw yan se doun te wedà dan pentigi se kandin benis.
34 Meneng doen sebad sondalo nenogseng te kilid din te dilek, aw yan dimelog se dipanog aw wayeg lekat te kilid din.
35 Kinità ko se kedita nini in-indan ko den kenyo, aw benal se kagi ko. Netegahan ko te benal iyan neinang, aw ibeg ko memenal kaw heman.
36 Peg-inang te menge sondalo kenyan, netoman se pakang tapay insolat diyà te kagi te Timanem, “Wedad palos tòlan din pentigen.”
37 Doen heman doma pakang tapay insolat diyà te kagi te Timanem tepad te menge Judiyo, “Kitaen dan sikandin tapay dan dogsengen.”
38 Nayan, doen sebad otaw si Jose tege Arimatiya timaking ki Jesus, meneng mig-eles-eles te pegtaking din kandin so nelemitan sikandin te menge obanen te Judiyo. Dimoton si Jose ki Pilato aw mig-insà aw mepakay aw ebaten din se lawa i Jesus lekat te kros amon ilebeng din. Mepakay iyan diyà ki Pilato, aw yan dimoton aw inabat din se lawa.
39 Doen heman timaking kandin si Nicodemo. Sikandin se dimoton ki Jesus kedengan te delem. Inibing din heman se menge keliman kilo bebolong metinadeg iningedanan mira aw alos pigsanged.
40 Inibing dan se lawa i Jesus, aw ginakes dan iyan te sapot sipat te metinadeg, so yan se ketanem te menge Judiyo aw ilebeng se lawa te nematay.
41 Doen kekeyowan medapag te bontod linensangan ki Jesus. Doen lebeng kidoen kaling inewangan diyà te pangpang, aw wedad pa palos inlebeng.
