Juan 19:14-39 in San Blas Kuna

¹⁴ Deunni, a-ibagi Oburgwilegoenad-Iba-idu guagwar ibmar imaklenaid, yorukugubinned. Geb degi, Pilato Judíoʼmarga sogdesun: —Emigi, we-dule bemar-e-Rey be dakmarsun.

¹⁵ Ar Judíoʼmardi oimakarmalad: —¡Oburgwe! ¡Oburgwe! ¡Nakrusgi bioke! Pilato, abin-imakde, sogded: —¿An, bemar-e-Rey nakrusgi biokode? Dule-irwa-Babse-gormalad-e-dummagan, abin-sogdemalad: —Anmar rey-baid sulid, unnila Césarʼbi anmar-e-reyd.

¹⁶ Degisoggu, Pilato a-dulemarga Jesús-nakrusgi-biokega uksasunnad. Geb Roma-sordamar Jesús-sesmarsunnad.

¹⁷ Geb degi, Jesús Dule-Nonogarye-neg-nugadse, na dukin e-nakrus-semai nadsunnad. A-neg Hebreo-gayagindi Gólgotaʼye-bileged.

¹⁸ Agi Roma-suar-ibmala nakrusgi Jesús-bioksamalad. Eba dule-walabo, e-dikarba bioksamarmogad. Jesúsʼdi amar-negabargi bioklegar gwisgusad.

¹⁹ Pilato Jesús-nakrus-birgi-nasikega nug-narmaksad. Weyob nug-narmakar sognaid:

²⁰ Judíoʼmar-bukidar weyob-narmakar-naid absosmalad. Ar ade, Jesús-nakrusgi-bioklesad, neggwebur-walikagwad. Nug-narmakar Hebreo-gayaba, Griego-gayaba, degi, Latín-gayaba naid.

²¹ Judíoʼmar-irwa-Babse-gormalad-e-dummagan Pilatoʼga sogdemalad: —Mer be narmake: ‘We, Judíoʼmar-e-Reyye.’ Be narmake: ‘Ede Judíoʼmar-e-Reyye-sogye.’

²² Pilato, abin-sogded: —An-narmaksadi, bato an narmaksado. An-narmaksad, an ogwaosulid.

²³ Roma-suar-ibmala Jesús-nakrusgi-bioksamargu, e-mor susmalad, geb a-mor esirmaksamalad. Geb dule-warbake-wilub mor-danar-danar urbismalad, adi, sordamar na egad-egad sumalagar. Degine, e-mor-asgi-yolegeddi, unnila irgwen-matar-dummadsoggu,

²⁴ na sokarmalad: —Mer we-mor esirmakmalo. Anmar wilubdakmaloed, ar doagadga we-mor guodibe. Weyob gusdo, ar adi, Bab-Dummad-Gardagi-narmakar-naidba guegar. Ar Bab-Dummad-gardagi weyob sognaid: “An-mormar mimismarsunnad, degi, an-mor-suega, egi wilubdaknanai gusmalad.” Salmo 22:18 Ar weyob Roma-suar-ibmala imaksamardo.

²⁵ Jesús-nakrus-walik omegan-bukwagusmaladi, wemalad: E-nan, e-ammor e-nansikid, Cleofas-ome-María, degi, María Magdalena.

²⁶ Jesús e-nan-dakargu, degi, e-sapin-na-nue-sabed-dakargu, e-nanga sogded: —Omegwa, we, be-machiga guoed.

²⁷ A-sorba, Jesús e-sapinga sogdemogad: —We, be-nanga gumogoed. A-ibagi, we-sapin e-negse María-yogsear imaksad.

²⁸ A-sorbali, Jesús bela na e-igargan bergunoni wissoggu, Bab-Dummad-gardagi-narmakar-naidba-guega sogdesunnad: —An uku-uku itoged.

²⁹ Nakrus-dikarba noggi vino-gagbid siid. Degi geb agi dulemar ibmar-buta-butad vino-gagbid owardikusad. Geb hisopo-suargi-edichagu, Jesús-gayagi nasiksamalad.

³⁰ Jesús a-vino-gagbid-gobsagu, sogded: —Bergussun. Geb degi, Jesús nono-dukin-nadgu, burgwided.

³¹ Deunni, a-ibagi, Israel-Dulemar-Oburgwilegoenad-Iba-iduar guagwar-ibmar-imakleged-iba naid. Judío-dummagan melle banedgi, obunnoged-ibagi, muimar nakrusgi-nanai abesurmalad. Ar we-obunnoged-iba, iba-dummadid. Agala, Pilatoʼgi wilenaigusmalad, dulemar-nakrusgi-nanaid-ibe e-dua bisgeye, adi, gwae burgwemalagar. Geb degi, muimar-nakrusgi-nanaid odemalagar.

³² Geb degi, Roma-suar-ibmala nadmarsunnad, Jesúsʼmala dule-bioklesad-ibe dua bichismalagar. Geb sorbali, dule-baid-bioklesmogad-ibe, dua bichismarbalid.

³³ Ar Jesúsʼse warmaksamargudii, dakarmalad bato Jesúsʼdi-burgwar-nai, degisoggu, bar e-ibe dua bichissurmalad.

³⁴ Suar-ibed-wargwendi es-suidgi Jesús-dikar-sikaa imaksad, geb agi, abe, degi, dii, yog-aryoar gusad.

³⁵ Dule we-ibmar-daksadi, bemarga soged. A-ibmar-sogedi napiragwadid, gakansasulid. Ar we-dule na wisid, ede napiragwadba ibmar sogye, adi, bemar mer bengumalagarmo.

³⁶ We-ibmar deyob gusad, adi, Bab-Dummad-Gardagi-narmakar-maidba guegar: “E-gar bipisaale gwen bisgelegosulid.”

³⁷ Deginbali, baidgi narmakar naibalid: “Dulemar-eswargi-ewarismalad a-dule-dakmaloed.”

³⁸ Bela-wegigusad-sorbali, José, Arimateaʼgined, Pilatoʼse nonikid. José Pilatoʼse Jesús-mui-sedega wilenaigusad. We-Joséʼde, Jesús-sapin-wargwenadmogad. Degi-inigwele, Judíoʼmar-dobedbali gwen-bakar-buud sogsasulid, ede Jesúsʼba naimoye. Geb Pilato Joséʼga igar-uksasunnad, Jesús-mui-sedegar. Geb degi, José, Jesús-nakrusgi-naidse nadsunnad, geb Jesús-e-mui-neg-uanse-dignaega sessunnad.

³⁹ Nicodemo nonimogad. We-dule, ibagwengi Jesúsʼse mutik nonigusadid. Nicodemo nibir-dulataled-aidiku (100) sapi-gunnugiid-wawad-mirra, áloe-ebo-oburale senonikid.

¹⁴ Deunni yorukugusad, Judiomar-iba, Bab-Dummad-Israel-Dulemar-Egiptogi-Wilebukwa-Onosad-Iba bane-nagudoedgi. Geb degi Pilato Judiomarga sogdesun: —Emi be dakmar, bemar-e-Rey.

¹⁵ Ar Judiomardi oimakarmalad: —¡Oburgwed-sae, oburgwed-sae, nakrusgi bioked-sae! Pilato, abin-imakde, sogded: —¿Bemar-e-Rey nakrusgi an biokode? Dule-irwa-Bab-Dummadse-gormalad-e-dummagan, abin-sogdemalad: —Anmar rey-baid sulid, unnila Césarbi anmar-reyd.

¹⁶ Ar Pilato suar-ibmalaga Jesús-uksasun, nakrusgi biokmalagar. Suar-ibmala Jesús-susmargu, sesmarsunnad.

¹⁷ Geb degi Jesús dukin na e-nakrus semai nadsunnad, Dule-Nonogarye neg-nugadse, Hebreo-gayagindi Gólgotaye-bileged.

¹⁸ Agi suar-ibmala nakrusgi Jesús-bioksamalad. Eba dule-walabo e-dikarba bioksamarmogad, Jesúsdi amar negabargi bioksamalad.

¹⁹ Pilato Jesús-nakrus-birgi nasikega, nug narmaksad. Nug-narmakaled weyob sognaid.

²⁰ Weyob-narmakar-naid bukidar Judiomar absosmalad, ar ade Jesús nakrusgi-bioklesad neggwebur-walikagwad, degine, narmakar-naid Hebreo-gayaba, Griego-gayaba, degine, Latín-gayaba.

²¹ Judiomar-irwa-Bab-Dummadse-gormalad-e-dummagan Pilatoga sogdemalad: —Mer be narmake: ‘We, Judiomar-E-Rey.’ Be narmake: ‘Ede Judiomar-E-Reyye soged.’

²² Pilato, abin-sogded: —Ar an narmaksad, bato an narmaksado. An narmaksad, an ogwaosulid.

²³ Ar suar-ibmala Jesús-nakrusgi-bioksamargu, e-mor susmalad, geb dule-warbake-wilub danar-danar urbismalad, adi sordamar-warbakegwad na egad-egad sumalagar. Degine, e-mor-aski-yolegeddi, ar unnila irgwen matar-dummadsoggu,

²⁴ na ga sokarmalad: —Mer we-mor esirmakmalo, anmar wilubdakmaloed, ar mor doagadga guo-dibe. Weyob gusdo, ar adi Bab-Dummad-Gardagi-narmakar-naidba guegar. Ar Bab-Dummad-Gardagi weyob sognaid: An-mor na mimmismalad, degi, an-morgi wilubdaksamalad, adi doagadga guo-dibeye. Sal. 22:18 Ar weyob suar-ibmala imaksamardo.

²⁵ Ar Jesús nakrus-walik bukwa-gusmalad: E-nan, degine e-nan-e-gwenad, María, Cleofas-e-ome, degine, María Magdalena.

²⁶ Jesús na e-nan-dakargu, degi, e-sapin-wargwen na nue-sabedi, a-dakarbargu, na e-nanga sogded: —Omegwa, we be-machiga guoed.

²⁷ A-sorba Jesús e-sapinga sogdemogad: —Wegi, we be-nanga gumogoed. Ar a-ibagi yogsaar we-sapin na e-negse María-sear imaksad.

²⁸ A-sorbali, ar Jesús na wissoggu, bela e-igargan bergusad, sogdesun, adi Bab-Dummad-Gardagi-narmakar-naidba guegar: —An uku-uku itoged.

²⁹ Jesús-walikaa noggi vino-gaibid siid. Degi geb agi ibmar-buta-butadi owardikusad, geb hisopo-suargi edichagu, Jesús-gayagi nasiksamalad.

³⁰ Jesús a-vino-gaibid gobsagu, sogded: —Bergussun. Geb degi Jesús nono dukin imakdegu, burgwissunnad.

³¹ Deun dakargu, Bab-Dummad-Israel-Dulemar-Egiptogi-Wilebukwa-Onosad-Iba iduar guagwar-ambikued-iba naid. Ar we-obunnoged-iba, iba-dummadid. Mer obunnoged-ibagi nakrusgi-burgwenanaid nai gumalagala, Judio-dummagan Pilatogi wilenagusmalad, dulemar-nakrusgi-naid-ibe e-dua biskemalagar, adi gwae burgwemalagar. Geb degi nakrusgi-naid e-muimar odegegarbar.

³² Geb degi suar-ibmala nonimarsunnad, geb wargwen-ibe dua bichismargu, baid Jesúsba-bioklesad-ibe dua bichismarbalid.

³³ Ar Jesússedi nonimargu, bato burgwar-nai daknonimarsoggu, ei-e-dua bichissurmalad.

³⁴ Ar suar-ibed-wargwendi Jesús-dikargi espunyar-suidgi sikaa imaksad, geb degi abe diiba-mesa yog aryoar-gusad.

³⁵ Ar dule-we-daksad, ani, Juan, an bemarga soged. Ar an-ibmar-soged napiragwadid, gakansasulid, ar an na wisid, napiragwad an ibmar soged, adi bemar mer bengumalagar.

³⁶ Ar we ibmar-degi-gusadi, deyob gusad, adi Bab-Dummad-Gardagi-narmakar-naidba guegar: E-gar bipisaale gwen biskosulid.

³⁷ Deginbali, baidgi narmakar naibalid: Dulemar-espunyargi-ewarismalad a-dule-dakmaloed.

³⁸ Bela-wegi-gusad-sorbali, José, Arimateagined, Pilatose nonikid, egi wilenagusad, Jesús-burgwisad ega udagegar. We-Joséde Jesús-sapinmogad-wargwenad, ar edi na dukuar Jesús-sapinga gudiid, ar ade Judiomar-dobed. Pilato Joséga Jesús-uksasun. Geb degi José Jesús-nakrusgi-naidse nonigu, Jesús-e-mui sessun, neg-uanse dignaegar.

³⁹ Degi deun Nicodemo nonimogad, dule-Jesússe-mutik-nonigusad-dule. Nicodemo nibir-dulataled-ilagwen aidiku sapi-gunnugiid-wawaad senonikid. We sapi-gunnugiid-wawaad mirra, aloe-ebo oburaled.