Juan 17:9-12 in Achi

⁹ Woʼor quin tzʼonoj chawe, che a to ique; n-are ta quin tzʼonoj piquiwi i winak chi toʼ je re u wach i jyub taʼaj. Are, quin tzʼonoj piquiwi ique chi xe a ya pinʼab, man je awe yet.

¹⁰ Niʼpa tak i we yin, xak awe yet; niʼpa tak i awe yet, xak we yin. Ique quiqui ʼalijinsaj in ʼij yin (xak quiqui ʼalijinsaj a ʼij yet).

¹¹ Woʼor quin upon awuʼ, n-quin canaj ta waral chuwach i jyub taʼaj; xui ique que canaj chuwach i jyub taʼaj. Loʼlaj in Kajaw, quin tzʼonoj chawe chi che a chajij ruʼ a choʼab conojel niʼpa i xe a ya chwe. Yin awuʼ, xak jun ka wach; cwaj yin xak queje ique, xak jun qui wach.

¹² Tzʼakat xin qʼuiji cuʼ ique chuwach i jyub taʼaj, xe wucʼaj rumal a choʼab yet. Niʼpa i xe a ya pinʼab, xe in chajij. Rumal-i n-ta jun chique xtzak puʼab itzel, xui xtzak i jun chique, chi bital ujer chi ca tzakic, man queʼelok pacha i tzʼibtal can cumal i ajbil a tzij ujer.

⁹ »Riꞌin kinelaj ko chiwach la pakiwi rike; na e ta pakiwi konoje ri tikawex, xew pakiwi ri eyaꞌom la panuqꞌabꞌ, ma rike e e la.

¹⁰ Konoje ri e kꞌo panuqꞌabꞌ, e e la. Jekꞌulaꞌ riꞌ, konoje ri e kꞌo paqꞌabꞌ Rilal, e weꞌin. Y ri yakbꞌal nuqꞌij kaqꞌalajin kuma rike.

¹¹ »Yey riꞌin kintzelej ukꞌ la, na kinkanaj ta kan che ruwachulew; noꞌj rike kekanajik. Lal Santowilaj Nuqaw, chechajij ko la chupa ri bꞌiꞌ la, ri eyaꞌom la chwe, chaꞌ chuꞌana xa jun kikꞌuꞌx jelaꞌ pachaꞌ nuꞌanom riꞌin ukꞌ la.

¹² Echiriꞌ riꞌin in kꞌo kukꞌ wara che wuꞌwachulew, xebꞌenuchajij chupa ri bꞌiꞌ la ri eyaꞌom la chwe. Na jinta junoq chike xsachik, xew kꞌu ri jun xex wi sachinaq chik chaꞌ e kuꞌana janipa ri tzꞌibꞌital kan chupa ri Chꞌaꞌtem la.

⁹ »Riꞌin quinelaj co chiwach la paquiwi rique; na e ta paquiwi conoje ri ticawex, xew paquiwi ri eyaꞌom la panukꞌab, ma rique e e la.

¹⁰ Conoje ri e cꞌo panukꞌab, e e la. Jecꞌulaꞌ riꞌ, conoje ri e cꞌo pakꞌab Rilal, e weꞌin. Y ri yacbal nukꞌij cakꞌalajin cuma rique.

¹¹ »Yey riꞌin quintzelej ucꞌ la, na quincanaj ta can che ruwachulew; noꞌj rique quecanajic. Lal Santowilaj Nukaw, chechajij co la chupa ri biꞌ la, ri eyaꞌom la chwe, chaꞌ chuꞌana xa jun quicꞌuꞌx jelaꞌ pachaꞌ nuꞌanom riꞌin ucꞌ la.

¹² Echiriꞌ riꞌin in cꞌo cucꞌ wara che wuꞌwachulew, xebenuchajij chupa ri biꞌ la ri eyaꞌom la chwe. Na jinta junok chique xsachic, xew cꞌu ri jun xex wi sachinak chic chaꞌ e cuꞌana janipa ri tzꞌibital can chupa ri Chꞌaꞌtem la.