Juan 15:1-21 in Achi

¹ (Quin bij ni jun tzij, tijojbal iwe. Yix iwetaʼam u wach i jun ticon, raxcʼam rakan, úva u bi.) Yin in queje pacha u raxcʼamil i ticon-le, xui-ri, yin in sakil ticon; y are in Kajaw, are ca ʼanaw i chac che i ticon.

² Ire cresaj bi u ʼab i ticon chi n-ca wachin taj. Xui-ri, i u ʼab i ticon chi ca wachinic, ire cu cʼatzij u tzam, xak cu josʼij, man cu ya mas u wach.

³ Yix ix pacha i u ʼab i ticon-le; ya ix josʼim chic rumal in tzij chi ix cojon-nak che.

⁴ Chix jekel ʼu chwe; queje pacha in ʼanom yin, in jekel chiwe yix. Man i u ʼab i ticon, n-coʼon tu wach utuquel we n-nacʼal ta che u raxcʼamil; xak queje yix ile, n-quix wachin taj we n-quix jeki ta chwe yin.

⁵ Are yin, pacha in u raxcʼamil i ticon; are yix, pacha ix u ʼab i ticon. Pachin jun ca jeki chwe yin, xak yin quin jeki che ire, lic ca wachin ʼuri che u cʼaslemal. Yix, we xi jecʼ iwib chwe yin, n-ta ʼutz ʼuri qui ʼano.

⁶ Pachin jun n-cu jekba ta rib chwe yin, quelsax ʼuri y ca cʼak bic. Pacha u ʼab i ticon are quelsax che i raxcʼamil, ca cʼak bic y ca chakijic; teʼuri ca mol u chiʼ, y ca porox ʼu pa ʼaʼ.

⁷ Yix, we quix jeki chwe yin, xak we ca jeki in tzij pi cʼux, chi tzʼonoj ʼuri wach i quiwaj, y ca yaʼ chiwe.

⁸ We lic ca wachin i cʼaslemal yix, mas cocsax ʼuri u ʼij in Kajaw; queje ile quix u ʼon na ʼuri ix in tijoxelab sakil.

⁹ Yin, cʼax quix in na yix, pacha i cʼaxnabal we yin coʼon in Kajaw. Chix ʼol che i cʼaxnabal in cʼux in yom chiwe.

¹⁰ We quix cojon che in tzij in pixab yin, quix qʼuiji ʼuri che i cʼaxnabal in cʼux; pacha i quin ʼan yin, quin coj u tzij u pixab in Kajaw, y quin qʼuiji che i cʼaxnabal u cʼux ire.

¹¹ Ronojel iri xin bij chiwe, man cwaj ca qʼuiji i quicotemal iwuʼ chi quin ya yin, queje ile, ca tzʼakat na i quicotemal.

¹² (We quiwaj ca tzʼakatsax i quicotemal), chix cojon che in tzij-i: cʼax chi na iwib chiwach, pacha i cʼax i naʼic yix quin ʼan yin.

¹³ N-ti cʼaxnabal cʼuxij mas nim chuwach iri: we jun cu ya rib chi camic tobal-que pachin i cʼax que u naʼo.

¹⁴ Y yix, we quix cojon che niʼpa i quin bij chiwe, cʼax ʼuri quin i naʼo.

¹⁵ Yin n-quin bij ta chic we toʼ ix wajchac, man jun ajchac n-retaʼam taj wach coʼon u patron. Xui-ri, in bim chic chiwe chi are yix chi cʼax quix in naʼo, man in ʼalijinsam chiwe ronojel niʼpa xu bij in Kajaw chwe.

¹⁶ N-yix taj xin i cha yin, are yin xix in cha yix man quix ʼe chu ʼonquil i chac pa ticon re i Dios chi ca wachinic. Niʼpa i chac qui ʼano, n-ca yojtaj ta chic. Xak niʼpa wach i qui tzʼonoj che i Ta chicaj wumal yin, ire cu ya chiwe.

¹⁷ Are iri quin bij chiwe chi ʼo u chac qui ʼano: cʼax chi na iwib chiwach.

¹⁸ We i winak tzel quix quil yix, cha cʼun chi cʼux chi nabe tzel xin quil yin chiwach yix.

¹⁹ We tene yix ix queje pacha i winak chi n-quin qui coj ti yin, ique cʼax quix qui na ʼuri man ix que ique; péro yix n-ix ta queje ile. Man, yin xix in cha chiquixol i winak, y ix terejnak chwij, rumal-i i winak tzel quix quilo, man n-ix ta chic que ique.

²⁰ Cha cʼun chi cʼux wach i tzij in bim chiwe: chi jun ajchac, n-ʼatz tu ʼij chuwach u patron. We quiqui ʼan chʼoʼoj chwe yin, xak queje ile quiqui ʼan chʼoʼoj chiwe yix. We i winak qui cojom in tzij yin, xak quiqui coj ʼuri wach i qui bij yix.

²¹ Ronojel ile quiqui ʼan chiwe xa wumal yin; quiqui ʼan ʼuri man n-quetaʼam tu wach i Jun chi xin takaw lok.

¹ »In ri in saqil raqan uva y ri Nuqaw e ri aj chakunel chupa taq ri uva.

² We kꞌo kꞌu juna uqꞌabꞌ ri uva na kuya ta uwach, Rire kuqꞌat bꞌi. Noꞌj kꞌu ri kuya uwach, xa e kujal uwiꞌ re kuꞌan chom che chaꞌ jelaꞌ kuya más uwach.

³ Jekꞌulaꞌ riꞌix ꞌanom chi chom chiwe ruma ri kꞌutunik nuꞌanom chiwach.

⁴ »Miwesaj iwibꞌ chwij, jekꞌulaꞌ xa jun qaꞌanom, riꞌix wukꞌ riꞌin y riꞌin iwukꞌ riꞌix. Ma e pachaꞌ juna uqꞌabꞌ cheꞌ na kawachin ta xa utukel we kesax che ri raqan; jekꞌulaꞌ riꞌ riꞌix, na utz taj kixwachinik we kiwesaj iwibꞌ chwij.

⁵ »In ri in raqan ri tikoꞌn yey riꞌix ix ruqꞌabꞌ. China kꞌu ri uꞌanom xa jun wukꞌ riꞌin yey riꞌin in xa jun rukꞌ rire, riꞌ lik kawachinik. Ma we iwesam iwibꞌ chwij, na jinta kichꞌij uꞌanik.

⁶ China kꞌu ri karesaj ribꞌ chwij, jelaꞌ kaꞌan che pachaꞌ ruqꞌabꞌ cheꞌ na jinta uchak, kachetik y kakꞌaq bꞌi. Kachaqij kꞌut, tekꞌuchiriꞌ kamolik y kaporox pa aqꞌ.

⁷ »Yey we e laꞌ xa jun iꞌanom riꞌix wukꞌ y na kikꞌow ta chikꞌuꞌx taq ri nukꞌutum chiwach, chitzꞌonoj kꞌu riꞌ saꞌ taq ri kiwaj y kayaꞌtaj na chiwe.

⁸ Ri Nuqaw lik kayakiꞌ uqꞌij echiriꞌ riꞌix kiya ukꞌiyal ijiqꞌobꞌalil y rukꞌ waꞌ kaqꞌalajinik pa saqil wi ix nutijoꞌn.

⁹ »Jekꞌulaꞌ pachaꞌ ri Nuqaw lik kꞌax kinunaꞌ riꞌin, jekꞌuriꞌlaꞌ riꞌin kꞌax kixinnaꞌ riꞌix. Lik kꞌut miwesaj iwibꞌ chupa ri rutzil nukꞌuꞌx chiwe.

¹⁰ We e kiꞌan janipa ri kixintaq che, kixkꞌojiꞌ kꞌu riꞌ chupa wa rutzil nukꞌuꞌx, jelaꞌ pachaꞌ riꞌin nuꞌanom janipa ri inutaqom ri Nuqaw che uꞌanik yey in kꞌo chupa ri rutzil ukꞌuꞌx Rire.

¹¹ »Ximbꞌiꞌij waꞌ chiwe chaꞌ ri nukiꞌkotemal kakꞌojiꞌ iwukꞌ y kanoj kꞌu riꞌ ri iwanimaꞌ che kiꞌkotemal.

¹² »Ekꞌu nutaqanik waꞌ kanya chiwe: Lik kꞌax chinaꞌa iwibꞌ chiwach jelaꞌ pachaꞌ riꞌin lik kꞌax kixinnaꞌo.

¹³ Na jinta juna kꞌutubꞌal re ri rutzil kꞌuꞌxaj más nim chwa waꞌ: E junoq kuya rukꞌaslem che utoꞌik jun chik tobꞌ ne kakam ruma.

¹⁴ »Riꞌix ix wamigos we e laꞌ e kiꞌan janipa ri kixintaq che uꞌanik.

¹⁵ Na kambꞌiꞌij ta chi ne “waj chak” chiwe, ma e juna aj chak na retaꞌam taj saꞌ ri kuꞌan ri rajaw. Kambꞌiꞌij kꞌu chiwe “ix wamigos”, ma nuyaꞌom chi retaꞌmaxik chiwe ronoje ri ubꞌiꞌim lo ri Nuqaw chwe.

¹⁶ Na ix ta xixchaꞌw we riꞌin, in ri xinchaꞌw iwe. Yey nuyaꞌom piqꞌabꞌ kiꞌana ri nuchak y jelaꞌ kiya ukꞌiyal ijiqꞌobꞌalil y waꞌ na jinta ukꞌisik. Yey janipa kꞌu ri kitzꞌonoj che ri Nuqaw pa ri nubꞌiꞌ, Rire kuya na chiwe.

¹⁷ Ekꞌu kixintaq che uꞌanik waꞌ: Kꞌax chinaꞌa iwibꞌ chiwach.

¹⁸ »We tzel kixkil ri winaq che ruwachulew, chiwetaꞌmaj e riꞌin ri nabꞌe tzel kinkilo.

¹⁹ We ta e laꞌ junam ribꞌinik riꞌix kukꞌ ri tikawex re ruwachulew, riꞌ lik kꞌax kixnaꞌik. Noꞌj in xinchaꞌw iwe riꞌix chikixoꞌl ri winaq; e uwariꞌche tzel kixilik.

²⁰ Kꞌuna chikꞌuꞌx ri nubꞌiꞌim chiwe: Na jinta juna aj chak más kꞌo uwach chwa ri rajaw. We riꞌin internabꞌem rukꞌ kꞌaxkꞌobꞌik, jelaꞌ riꞌ kaꞌan chiwe riꞌix, kixternabꞌex rukꞌ kꞌaxkꞌobꞌik. Yey we e kꞌo ri kitaqem ri nutzij riꞌin, jekꞌulaꞌ riꞌ, e kꞌo ri kakitaqej ri kikꞌut riꞌix.

²¹ Pero ri kixkiternabꞌej rukꞌ kꞌax ruma ikojom ri nubꞌiꞌ, e kakiꞌan waꞌ ruma na ketaꞌam ta uwach ri xintaqaw loq.

¹ »In ri in sakil rakan uva y ri Nukaw e ri aj chacunel chupa tak ri uva.

² We cꞌo cꞌu juna ukꞌab ri uva na cuya ta uwach, Rire cukꞌat bi. Noꞌj cꞌu ri cuya uwach, xa e cujal uwiꞌ re cuꞌan chom che chaꞌ jelaꞌ cuya más uwach.

³ Jecꞌulaꞌ riꞌix ꞌanom chi chom chiwe ruma ri cꞌutunic nuꞌanom chiwach.

⁴ »Miwesaj iwib chwij, jecꞌulaꞌ xa jun kaꞌanom, riꞌix wucꞌ riꞌin y riꞌin iwucꞌ riꞌix. Ma e pachaꞌ juna ukꞌab cheꞌ na cawachin ta xa utuquel we quesax che ri rakan; jecꞌulaꞌ riꞌ riꞌix, na utz taj quixwachinic we quiwesaj iwib chwij.

⁵ »In ri in rakan ri ticoꞌn yey riꞌix ix rukꞌab. China cꞌu ri uꞌanom xa jun wucꞌ riꞌin yey riꞌin in xa jun rucꞌ rire, riꞌ lic cawachinic. Ma we iwesam iwib chwij, na jinta quichꞌij uꞌanic.

⁶ China cꞌu ri caresaj rib chwij, jelaꞌ caꞌan che pachaꞌ rukꞌab cheꞌ na jinta uchac, cachetic y cacꞌak bi. Cachakij cꞌut, tecꞌuchiriꞌ camolic y caporox pa akꞌ.

⁷ »Yey we e laꞌ xa jun iꞌanom riꞌix wucꞌ y na quicꞌow ta chicꞌuꞌx tak ri nucꞌutum chiwach, chitzꞌonoj cꞌu riꞌ saꞌ tak ri quiwaj y cayaꞌtaj na chiwe.

⁸ Ri Nukaw lic cayaquiꞌ ukꞌij echiriꞌ riꞌix quiya uqꞌuiyal ijikꞌobalil y rucꞌ waꞌ cakꞌalajinic pa sakil wi ix nutijoꞌn.

⁹ »Jecꞌulaꞌ pachaꞌ ri Nukaw lic cꞌax quinunaꞌ riꞌin, jecꞌuriꞌlaꞌ riꞌin cꞌax quixinnaꞌ riꞌix. Lic cꞌut miwesaj iwib chupa ri rutzil nucꞌuꞌx chiwe.

¹⁰ We e quiꞌan janipa ri quixintak che, quixcꞌojiꞌ cꞌu riꞌ chupa wa rutzil nucꞌuꞌx, jelaꞌ pachaꞌ riꞌin nuꞌanom janipa ri inutakom ri Nukaw che uꞌanic yey in cꞌo chupa ri rutzil ucꞌuꞌx Rire.

¹¹ »Ximbiꞌij waꞌ chiwe chaꞌ ri nuquiꞌcotemal cacꞌojiꞌ iwucꞌ y canoj cꞌu riꞌ ri iwanimaꞌ che quiꞌcotemal.

¹² »Ecꞌu nutakanic waꞌ canya chiwe: Lic cꞌax chinaꞌa iwib chiwach jelaꞌ pachaꞌ riꞌin lic cꞌax quixinnaꞌo.

¹³ Na jinta juna cꞌutubal re ri rutzil cꞌuꞌxaj más nim chwa waꞌ: E junok cuya rucꞌaslem che utoꞌic jun chic tob ne cacam ruma.

¹⁴ »Riꞌix ix wamigos we e laꞌ e quiꞌan janipa ri quixintak che uꞌanic.

¹⁵ Na cambiꞌij ta chi ne “waj chac” chiwe, ma e juna aj chac na retaꞌam taj saꞌ ri cuꞌan ri rajaw. Cambiꞌij cꞌu chiwe “ix wamigos”, ma nuyaꞌom chi retaꞌmaxic chiwe ronoje ri ubiꞌim lo ri Nukaw chwe.

¹⁶ Na ix ta xixchaꞌw we riꞌin, in ri xinchaꞌw iwe. Yey nuyaꞌom pikꞌab quiꞌana ri nuchac y jelaꞌ quiya uqꞌuiyal ijikꞌobalil y waꞌ na jinta uqꞌuisic. Yey janipa cꞌu ri quitzꞌonoj che ri Nukaw pa ri nubiꞌ, Rire cuya na chiwe.

¹⁷ Ecꞌu quixintak che uꞌanic waꞌ: Cꞌax chinaꞌa iwib chiwach.

¹⁸ »We tzel quixquil ri winak che ruwachulew, chiwetaꞌmaj e riꞌin ri nabe tzel quinquilo.

¹⁹ We ta e laꞌ junam ribinic riꞌix cucꞌ ri ticawex re ruwachulew, riꞌ lic cꞌax quixnaꞌic. Noꞌj in xinchaꞌw iwe riꞌix chiquixoꞌl ri winak; e uwariꞌche tzel quixilic.

²⁰ Cꞌuna chicꞌuꞌx ri nubiꞌim chiwe: Na jinta juna aj chac más cꞌo uwach chwa ri rajaw. We riꞌin internabem rucꞌ cꞌaxcꞌobic, jelaꞌ riꞌ caꞌan chiwe riꞌix, quixternabex rucꞌ cꞌaxcꞌobic. Yey we e cꞌo ri quitakem ri nutzij riꞌin, jecꞌulaꞌ riꞌ, e cꞌo ri caquitakej ri quicꞌut riꞌix.

²¹ Pero ri quixquiternabej rucꞌ cꞌax ruma icojom ri nubiꞌ, e caquiꞌan waꞌ ruma na quetaꞌam ta uwach ri xintakaw lok.