Juan 13:2-25 in San Blas Kuna

² Jesús, e-sapinganmala sedo mas-gunbukwagua, nia-saila, Simón-machi-Judas-Iscarioteʼgi, Jesús-darba-ukega, burba-isgana oubosad.

³ Jesús wisid, e-Bab bela ibmar-imakega ega igar-uksad. Degine, Jesús wisbalid, na ede Bab-Dummadgi danikid. Degi, ede Bab-Dummadse gannar nabaloed.

⁴ A-ulale, Jesús mas-gunsigua, gwisgus-imaksad. E-mordummad esusad. Geb uka-elied-susgua, e-sadergi edichad.

⁵ Geb degi, Jesús e-sapingan-nag-enukega bormoyagi dii eosad. Geb degi, e-sapinganga nag-enukded, degi, uka-elied-e-sadergi-naidgi ega nag-odinnosbalid.

⁶ Geb degi, Jesús Simón-Pedroʼse nonikid. Geb Pedro ega sokalid: —Dummad, ¿be anga nag enukode? Sulirgebed. Be anga nag enukosulid.

⁷ Jesús, abin-sogded: —An-emi-ibmar-imaknaid aku amba be itoged. Geb sorba mag be itodapoed.

⁸ Pedro, Jesúsʼga sogded: —Be an-nag enukosur guoed. Jesús, abin-sogded: —An bega nag-enuksulile, geg be an-sapinga gued.

⁹ Geb degi, Simón-Pedro Jesúsʼga sogdesunnad: —Dummad, ar be deyob-sogele, an-nagbi be anga enukosulid. An-argan, an-nono be anga enukbalirgebed.

¹⁰ Jesús, abin-sogded: —Ar dule-obsamalad bar obed abesulid. Unnila e-nagbi napi-enuked abeleged. Ar ade, bato swilidik gudiid. Bemar bato swilidik gudimalad. Degi-inigwele, bela bemar swilidiksurmalad.

¹¹ Ar ade, Jesús wisid doa darba e-ukoe. A-ulale, sogsagusad: “Bela bemar swilidiksurmarye.”

¹² Jesús, e-sapinganga nag-enuksad-sorba, gannar e-mor-yosgu, mesese gannar signonikid. Geb degi, e-sapinganga sokalid: —Bemarga an nag-enuksad, ¿mag be itomala, wede ibi obare?

¹³ Ar bemar nabir Odurdaked-Sailaye, degine, Dummadye, anse be gormalad. Ar ani an adid.

¹⁴ Ar ani an Dummadid, an Odurdaked-Sailabalid. Degite, an bemar-nag enuksad. Bemar deyobi, muchub-muchub nag na ga enukewilubmarmodo.

¹⁵ An bemarga oyosad, adi, bemar an-bega-imaksamaladyobi, bemar imakegarmo.

¹⁶ Napira an bemarga soged: Dule-maiga-arbaedi, e-dummadba geg dummad gued. Degine, dule-barmilenaid, gege e-dummad-barmisiidba bur dummad gued.

¹⁷ Ar we-ibmar bemar bato wismarsoggu, bemar eba imakele, bemargi nued binsalegodo.

¹⁸ ”Bela bemargi an sogsulid. Ar an wisid doamar an susa. Degi-inigwele, Bab-Dummad-garda-narmaklegaledba-guegala, bemar-wargwen darba-an-ukoed. Ar Bab-Dummad-garda-narmaklegaledgi sognaid: ‘Ar dule anba madu gunsiidi, angi aibinnoniye, an-isdaradga gunoniye.’

¹⁹ ”Deyob-guoed-iduar, an bemarga soged, adi, degi-gunonikile, bemar mag-itos-namalagar, ani an Cristo gued.

²⁰ Napira an bemarga soged: An dule-barmidoed abingamalale, an-abinganaid. Ar dule an-abinganaile, Bab-Dummad-an-barmialid-abinganamogad.”

²¹ Jesús deyob-sogsad-sorba, e-ulubgi bukib-binsaded, degi, e-sapinganga sogdesunnad: —Napira an bemarga soged, bemar-wargwenadi darba an-ukoed.

²² Geb degi, e-sapingan muchub-muchub dakdemalad, wissurmalad doagi Jesús degisoge.

²³ E-sapin-wargwen, Jesús na nue-sabedi, e-dikarba sii gusad.

²⁴ A-dulesega, Simón-Pedro arbak achasad, adi, a, Jesúsʼse egisega, doa-dulegi wede deyob soge.

²⁵ Degi, a-dule, Jesús-binasgargi biligwa-mai Jesúsʼga sogded: —Dummad, ¿doa-dule arbak be-ukoe?

² Jesús na e-sapinganmala sedo mas gunbukwagua, nia-saila bato Judas-Iscariotegi burba-iskana oubosad Jesús-darba-ukega. We-Judasde Simón-e-machid.

³ Jesús na wisid, e-Bab bela ega igar-uksad bela ibmar imakegar. Degine, Jesús wisbalid, na Bab Dummadgi danikid, degi, na Bab Dummadse gannar nabaloed.

⁴ A-ulale, Jesús na mas gunsigua gwisgus imaksad, e-suba esusad, degine, toalla susgua, na e-sadergi edichad.

⁵ Degi Jesús bormo-yagi dii eosad, e-sapingan-nag enukegar. Geb degi toalla e-sadergi-naidgi ega nag odinnoarbalid.

⁶ Geb degi Jesús Simón-Pedrose nonikid, geb Pedro ega sokalid: —¿Dummad, be anga nag enukoe? Suli, be anga nag enukosuli.

⁷ Jesús, abin-sogded: —An-emi-ibmar-imaknaid aku amba be itoged, geb sorba mag be itodapoed.

⁸ Pedro, Jesúsga sogded: —An-nag be enukosurguoed. Jesús, abin-sogded: —An bega nag enuksulile, geg be an-sapinga gued.

⁹ Geb degi Simón-Pedro Jesúsga sogdesunnad: —Dummad, ar be deyob sogele, an-nagbi be anga enukosulid, an-argan, degi, an-nono be anga enukbalir-gebed.

¹⁰ Jesús, abin-sogded: —Ar dule bato obsamalad bar obed abesulid, unnila e-nagbi napi-enuked abeleged, ar ade bato guar swilidik gudiid. Ar bemar bato swilidik gudimalad, ar bela bemar swilidik gudisurmar-inigwer.

¹¹ Ar ade Jesús na wisid doa darba e-ukoe, a-ulale sogsa-gusad: “Bela bemar swilidik gudisurmarye.”

¹² Degisoggu, Jesús e-sapinganga na nag-enuksad-sorba, gannar e-mor na yosgu, mesase gannar signonikid. Geb degi e-sapinganga sokalid: “¿Bemarga-an-nag-enuksad mag bemar itomala, we ibi obare?

¹³ Ar bemar Odurdaked-Sailaye, degine, Dummadye be anse gormalad, ar nabir deyob be anse gormardo, ar an adid.

¹⁴ Ar ani, an Dummadid, degine, an Odurdaked-Sailadde, degite bipii na san imaksad, bemar-nag an enuksadde, bemar na muchub-muchub nag na ga enuke-wilubmarmodo, na maikwaa na san sae-wilubmarmodo.

¹⁵ Ar bemarga an na oyosad, ar igi bemarga an be-imaksamala, deyob bemar na imake-wilubmarmodo.

¹⁶ Napira an bemarga soged: Dule maiga-arbaed, e-dummadba geg dummad gued, degine, gege dule-barmilenaid e-barmisiidba bur dummad gued.

¹⁷ Ar we-ibmar bemar bato wismarsoggu, ar aba bemar imakele, bemargi nued binsalegodo.

¹⁸ “Ar bemar belagwapaga an sogsulid. Ar an wisid doamar an susa, adi Bab-Dummad-Garda-narmakaledba guegala, bemar-wargwen dikarba an-ukoed, ar Bab-Dummad-Garda-narmakaledgi sognaid: Ar dule anba madu gunsiidi, angi aibinnoniye, an-istaradga gunoniye.

¹⁹ Deyob gued iduar, an bemarga soged, adi degi-gunonikile, bemar mag-ittos-namalagar, ani an Cristod.

²⁰ Napira an bemarga soged: Ar an dule-barmidoed-abingamalale, an-abinganaid. Ar dule an-abinganaile, Bab-Dummad-an-barmialid a-abinganamogad.”

²¹ Jesús degi-sogsad-sorba, e-ulubgi bukib-binsa-naded, degi, e-sapinganga sogdesunnad: —Napira an bemarga soged, bemar-wargwenadi darba an-ukoed.

²² Degi e-sapingan na muchub-muchub dakdemalad, na wichurmalad doagi Jesús degi-soge.

²³ E-sapingan-wargwen, ar Jesús na nue sabedi, e-dikarba sii-gusad.

²⁴ Asega, Simón-Pedro arbak achasad, adi Jesússe egisegar, doa-dulegi wede deyob soge.

²⁵ Degi a-dule, Jesús-binasgar-walik biligwa maid, Jesúsga sogded: —Dummad, ¿doa-dule arbak be-ukoe?