34 Grë miech ne ndxie ga, zeeṉe bin zho sca rëb me, rëbchaa zho: ―¿Guet luu ye? Lo Xtiidz Dios name rnee, ib guete Meṉ ne cxeeḻ Dios ga. ¿Zha nac dzigo ne rnee luu laa luu guet? ¿Chopaa dzigo nac luu?
35 Dzigo pquiab me rëb me lo zho: ―Naa nac zig tib biini ne noziini lo miech; ni ngabse dze ne cuëz naa lo to. Laga noziini naa lo to, goḻsëni zaatne riab biini zeeṉa ygaade to guieḻcow; sac zha ne rzë lo ncow rieṉd zho palo zie zho.
36 Niina ne rdeeda diidz goḻliladz cho nac naa, zeeṉa gac to zha ne nlipaa no lo biini. Blozhse sca rëb me laa me biche ga, blulodraa me lo zho.
37 Niicle goṉlo zho nzian milagr ne beeṉ me, per ib rliladzd zho ne nli Dios pxeeḻ me.
38 Ni ib scalegaa no gaca, sac ga brieequia miṉe bzeet Isá (tib meṉ ne biadteed xtiidz Dios) zeeṉe znu rëb me: Dios, bui gaṉle ni tib choot nëd gliladz xtiidz luu, niicle raṉ zho grëtaa milagr ne ruṉ luu.
39 Ni nligaa ib brieelod nliladz zho me; sac zeeṉe pquiaa Isá, znu rëb me:
40 Ncow psaṉ Dios lo zho, ni beeṉndip me zdoo zho; zeeṉa gaṉd zho me, niicle guieṉdgaa zho zha gbig zho lo me csilaa me zho lo xtoḻ zho.
41 Zeeṉe znu bnee Isá, ible Jesús ga bzeet me; sac goṉ me grëtaa guieḻndzon ne rap Jesús.
42 Ndal zho sca ib bliladzd me, per noquegaa zha ne bliladz me; zig nac grë zha ne rnabey lo zha Israel, ndal zho bliladz ne nli Dios pxeeḻ me, per ib pxobneṉd zhow; sac rdzieb zho cuee zha farisé zho yadoo.
43 ¡Ni stiba rdziladzraa zho guiaaṉnon zho lo miech, laa ne guiaaṉnon zho lo Dios!
44 Leṉ dze co, tib vuelt nguiedz bnee Jesús, rëb me: ―¡Grëse zha ne rliladz naa, yele Pxoz naa ga rliladz zho!
45 ¡Ni zeeṉe rwi zho lo naa, yele meṉ ne pxeeḻ naa ga raṉ zho!
46 Naa nac zig tib biini ne rziini lo miech, ni grëse zha ne dib zdoo gliladz cho nac naa, zriee zho lo guieḻcow ne no zho.
