Juan 11:20-47 in Achi

²⁰ I ati Márta, are xu ta chi xupon i Jesus, xa ʼe u cʼulaj; xui-ri, i ati Mariy xcanaj can ruʼ ja.

²¹ I ati Márta xu bij che i Jesus: —Kajwal, we tene at ʼo chi, n-queje tene ca cam-i in xibal.

²² Péro wetaʼam chi Dios cu ya na chawe wach ca tzʼonoj che —xu bij che i Jesus.

²³ I Jesus xu bij che: —I a xibal ca cʼasi chic.

²⁴ I ati Márta xu bij che: —Wetaʼam chi ire cwalij chic are que walij i camnak pa qʼuisbal ʼij —xu bij.

²⁵ Are ʼuri i Jesus xu bij che: —Are yin que in walijsaj i je camnak; are yin in qui cʼaslemal. Pachin cu cuba u cʼux chwe yin, we xcamic, ca cʼun chic sak chuwach.

²⁶ Xak pachin i cʼaslic, we xu cuba u cʼux chwe yin, lic n-ca cam taj. ¿Cat cojon yet che ile? —xu bij che.

²⁷ I ati Márta xu bij: —In cojom ile, Kajwal. Cul in cʼux che chi yet at i Crísto, at Racʼal i Dios; are yet chi ʼax koyʼem wi a cʼunic chuwach i jyub taʼaj —xcha.

²⁸ Are xbitaj ile, teʼuri i ati Márta xa ʼe chu siqʼuixic u chaʼ, chi ati Mariy. Xu bij che aliʼal: —I ka Tijonel ya xcʼunic y cat u siqʼuij —xu bij.

²⁹ I ati Mariy, are xu ta ile, juntir xwalijic, xa ʼe chu cʼulaxic i Jesus.

³⁰ I Jesus cʼa maja coc che i tinimit; chila ʼo wi pa xcʼulax wi rumal i ati Márta.

³¹ I aj Israel winak chi je ʼo chi rachoch i ati Mariy, quiqui pacbej u bis, are xquilo chi juntir xa ʼe i ati Mariy, xqui chʼobo chi mok chila ca ʼe oʼ wi pa muktal wi u xibal. Rumal-i ique xe terej bic.

³² I ati Mariy xupon chila ruʼ i Jesus. Are xril u wach, xuqui chuwach y xu bij che: —Kajwal, we tene at ʼo chi, n-queje tene ca cam-i in xibal —xu bij.

³³ I Jesus xril ati Mariy coʼic, xak xe ril i juban je ʼo ruʼ que oʼic. Ile n-xu maj tu wach y xa ʼutut u cʼux.

³⁴ Xu tzʼonoj chique: —¿Pa xi muk wi i a-Lázaro? —coʼono. —Kajwal, chol awila —xe cha che.

³⁵ I Jesus xoʼic.

³⁶ Rumal-i, i aj Israel winak xqui bij: —Chiwilapeʼ, lic cʼax cu na i ma Lázaro —xe cha.

³⁷ Xak je ʼo jujun chique xqui bij: —Are ire-le chi xu tzunsaj i mawach. We tene ʼo ire chi ¿ca cam nawi i ʼetz ma Lázaro? —xqui bij chiquiwach.

³⁸ I Jesus lic xa ʼutut tan chic pu cʼux, y xtejeb pan pa muktal wi i ma Lázaro. I jul pa qui mukum wi qui worom che jun abaj, tzʼapim can u chiʼ ruʼ jun abaj.

³⁹ I Jesus xu bij: —Chiwesaj i abaj-le. I ati Márta, chi ranab i camnak xu bij che i Jesus: —Kajwal, ya n-ʼus ta chic; ya ʼo chic ruxlab man ya ʼo chic cajib ʼij che —coʼono.

⁴⁰ Are ʼuri i Jesus xu bij: —¿Xataba n-in bim ta chawe, we cul a cʼux chwe, cawil i nim laj u ʼij u choʼab i Dios? —xu bij che.

⁴¹ Are ʼuri xquesaj abaj chu chiʼ i jul. I Jesus xtaken chicaj, xu bij: —Ta, quin tioxij chawe man a tom in tzij.

⁴² Yin wetaʼam chi yet ʼax quin a ta wi, péro xin bij i tzij-le cumal que i winak-i, man ʼutz quiqui coj ique chi yet in a takom lok —xu bij.

⁴³ Are xbitaj ile rumal, teʼuri co xchʼawic; xu bij: —A-Lázaro, ¡chat el lok! —xcha.

⁴⁴ Juntir xel li camnak, balʼatim i rakan u ʼab pa cʼul; i u palaj xak pasim pa cʼul. I Jesus xu bij: —Chi toro, man ca binic —xu bij chique.

⁴⁵ I aj Israel winak chi je petnak ruʼ i ati Mariy, je qʼui xqui cuba qui cʼux che i Jesus rumal wach i xquilo.

⁴⁶ Xui-ri je ʼo jujun chique xe ʼe chu bixquil chique i aj Fariséo wach i xu ʼan i Jesus.

⁴⁷ Rumal-i, i aj Fariséo, xak cuʼ i ajwab sacerdóte, xe ʼe chu molic quib cuʼ i aj nucʼbal tʼisbal. Are qui molom quib, xqui bij chiquiwach: —¿Wach caka ʼano? I achi-le, mas i milágro ca tijin chu ʼanic.

²⁰ Ekꞌuchiriꞌ ri Marta xuto katajin roponik ri Jesús, xel bꞌi che ukꞌulik; noꞌj ri María xkanaj kan chwa ja.

²¹ Ekꞌu ri Marta xubꞌiꞌij che ri Jesús: —Wajawal, we ta e laꞌ kꞌo la wara, na kakam ta riꞌ ri nuxibꞌal.

²² Na rukꞌ ta kꞌu riꞌ, lik wetaꞌam, tobꞌ ne kꞌa e waꞌ, ri Dios kuya cheꞌla ronoje ri katzꞌonoj la che —xchaꞌ.

²³ Ri Jesús xubꞌiꞌij che: —Raxibꞌal kakꞌastaj lo chikixoꞌl ri ekaminaq —xchaꞌ.

²⁴ Ri Marta xubꞌiꞌij che: —Qatzij, riꞌin wetaꞌam kakꞌastaj lo che ri kꞌisbꞌal qꞌij re ruwachulew echiriꞌ kekꞌastaj lo konoje ri ekaminaq —xchaꞌ.

²⁵ Ri Jesús xubꞌiꞌij che: —E riꞌin ri kinkꞌastajisan lo ke ri ekaminaq yey e riꞌin ri kinyaꞌw kꞌaslemal. China kꞌu ri kakubꞌiꞌ ukꞌuꞌx wukꞌ, tobꞌ kakamik, kakꞌastajik.

²⁶ Yey konoje ri e kꞌaslik y kakubꞌiꞌ kikꞌuꞌx wukꞌ, na kekam taj ma kꞌo kikꞌaslemal na jinta utaqexik rukꞌ ri Dios. ¿Kakoj riꞌat waꞌ? —xchaꞌ.

²⁷ Ri Marta xukꞌul uwach: —Kankojo, Wajawal, ma riꞌin nukojom rilal lal ri Cristo, Rukꞌajol ri Dios, ri bꞌiꞌtisim loq kakꞌun che ruwachulew —xchaꞌ.

²⁸ Echiriꞌ ri Marta xukꞌis ubꞌiꞌxik waꞌ, xeꞌek che usikꞌixik ruchaqꞌ María y xew che rire xubꞌiꞌij: —Ri Qajawal kꞌo wara y katusikꞌij —xchaꞌ.

²⁹ Xew xuta waꞌ ri María, na jampatana xyaktaj bꞌi y xeꞌrila ri Jesús.

³⁰ Ri Jesús kꞌamajaꞌ ne kok pa ri tinamit, ma kꞌa kꞌo pa ri luwar pa xkꞌul wi ruma ri Marta.

³¹ Ekꞌu raj judiꞌabꞌ e kꞌo rukꞌ ri María re kakibꞌochiꞌij ukꞌuꞌx, xkilo echiriꞌ na jampatana xyaktajik y kanik xel bꞌi. Rike xeterej kꞌu bꞌi chirij, ma e chikiwach rike e riꞌ keꞌek chwa ri muqubꞌal chaꞌ keꞌroqꞌej ruxibꞌal.

³² Echiriꞌ ri María xopon pa kꞌo wi ri Jesús, xew xril uwach, xuxuk ribꞌ chwach, y jewaꞌ xubꞌiꞌij che: —Wajawal, we ta e laꞌ lal kꞌo la wara, na kakam ta riꞌ ri nuxibꞌal —xchaꞌ.

³³ Ri Jesús echiriꞌ xrilo lik kebꞌoqꞌ ri María y raj judiꞌabꞌ eteran lo chirij, lik xok chukꞌuꞌx y xuchap bꞌis.

³⁴ Xubꞌiꞌij kꞌu chike: —¿Pa ximuq wi? —xchaꞌ. Rike xkibꞌiꞌij: —Qajawal, peta la y chilape la —xechaꞌ.

³⁵ Ekꞌu ri Jesús xoqꞌik.

³⁶ Xkibꞌiꞌij kꞌu raj judiꞌabꞌ: —¡Chilape alaq, lik kꞌax kunaꞌo! —xechaꞌ.

³⁷ E kꞌo jujun chike raj judiꞌabꞌ xkibꞌiꞌij: —Wa waꞌchi e xtzuꞌnisan re ri jun potzꞌ. ¿Suꞌbꞌe kꞌu riꞌ na jinta xuꞌano chaꞌ na kakam ta ri Lázaro? —xechaꞌ.

³⁸ Ri Jesús lik xok tanchi bꞌis chukꞌuꞌx, xqibꞌ chwa ri muqubꞌal. Waꞌ jun jul worotal paꞌbꞌaj y tzꞌapal uchiꞌ rukꞌ jun abꞌaj.

³⁹ Ekꞌu ri Jesús xubꞌiꞌij: —Chiwesaj laꞌbꞌaj —xchaꞌ. Yey ri Marta, ri ranabꞌ kan ri kaminaq, xubꞌiꞌij che: —Wajawal, laꞌ lik chu chik, ma e ukaj qꞌij waꞌ muqutalik —xchaꞌ.

⁴⁰ Ri Jesús xubꞌiꞌij che: —¿Na nubꞌiꞌim ta nebꞌa chawe, we kakubꞌiꞌ akꞌuꞌx wukꞌ, kawil runimal uwach uqꞌij ri Dios? —xchaꞌ.

⁴¹ Ewi xkesaj rabꞌaj kꞌo chuchiꞌ ri muqubꞌal. Ekꞌuchiriꞌ, ri Jesús xtzuꞌn chikaj y xubꞌiꞌij: —Lal Nuqaw, maltiox ko cheꞌla ma intom chi la.

⁴² Riꞌin wetaꞌam lik xaqi kinta la, pero kambꞌiꞌij kꞌu waꞌ kuma wuꞌkꞌiyal tikawex e kꞌo wara, chaꞌ rike kakikojo lal taqayom lo we —xchaꞌ.

⁴³ Echiriꞌ xukꞌis ubꞌiꞌxikil waꞌ, lik ko xsikꞌin che ubꞌiꞌxikil: —¡Lázaro, chateluloq! —xchaꞌ.

⁴⁴ Ewi ri Lázaro xel loq, bꞌolqꞌotim ri raqan y ruqꞌabꞌ pa kꞌul yey rupalaj chꞌuqutal rukꞌ jun kꞌul. Ruma kꞌu laꞌ, ri Jesús xubꞌiꞌij chike: —Chikira ri kꞌul kꞌo che chaꞌ utz keꞌek —xchaꞌ.

⁴⁵ E kꞌi kꞌu chike raj judiꞌabꞌ, ri e petinaq che ubꞌochiꞌixik ukꞌuꞌx ri María, echiriꞌ xkil ri xuꞌan ri Jesús, xkikubꞌaꞌ kikꞌuꞌx rukꞌ.

⁴⁶ Noꞌj e kꞌo jujun chike xebꞌek kukꞌ ri fariseos, y xeꞌkitzijoj chike ri xuꞌan ri Jesús.

⁴⁷ Ekꞌu ri nimaq e aj chakunel pa Rocho Dios y ri fariseos xkimol kibꞌ kukꞌ jujun chik chike ri e aj qꞌatal tzij y jewaꞌ xkibꞌiꞌij: —¿Saꞌ ri kaqaꞌano? Ma waꞌchi lik ukꞌiyal kꞌutubꞌal re ruchuqꞌabꞌ kuꞌano.

²⁰ Ecꞌuchiriꞌ ri Marta xuto catajin roponic ri Jesús, xel bi che ucꞌulic; noꞌj ri María xcanaj can chwa ja.

²¹ Ecꞌu ri Marta xubiꞌij che ri Jesús: —Wajawal, we ta e laꞌ cꞌo la wara, na cacam ta riꞌ ri nuxibal.

²² Na rucꞌ ta cꞌu riꞌ, lic wetaꞌam, tob ne cꞌa e waꞌ, ri Dios cuya cheꞌla ronoje ri catzꞌonoj la che —xchaꞌ.

²³ Ri Jesús xubiꞌij che: —Raxibal cacꞌastaj lo chiquixoꞌl ri ecaminak —xchaꞌ.

²⁴ Ri Marta xubiꞌij che: —Katzij, riꞌin wetaꞌam cacꞌastaj lo che ri qꞌuisbal kꞌij re ruwachulew echiriꞌ quecꞌastaj lo conoje ri ecaminak —xchaꞌ.

²⁵ Ri Jesús xubiꞌij che: —E riꞌin ri quincꞌastajisan lo que ri ecaminak yey e riꞌin ri quinyaꞌw cꞌaslemal. China cꞌu ri cacubiꞌ ucꞌuꞌx wucꞌ, tob cacamic, cacꞌastajic.

²⁶ Yey conoje ri e cꞌaslic y cacubiꞌ quicꞌuꞌx wucꞌ, na quecam taj ma cꞌo quicꞌaslemal na jinta utakexic rucꞌ ri Dios. ¿Cacoj riꞌat waꞌ? —xchaꞌ.

²⁷ Ri Marta xucꞌul uwach: —Cancojo, Wajawal, ma riꞌin nucojom rilal lal ri Cristo, Rucꞌajol ri Dios, ri biꞌtisim lok cacꞌun che ruwachulew —xchaꞌ.

²⁸ Echiriꞌ ri Marta xuqꞌuis ubiꞌxic waꞌ, xeꞌec che usiqꞌuixic ruchakꞌ María y xew che rire xubiꞌij: —Ri Kajawal cꞌo wara y catusiqꞌuij —xchaꞌ.

²⁹ Xew xuta waꞌ ri María, na jampatana xyactaj bi y xeꞌrila ri Jesús.

³⁰ Ri Jesús cꞌamajaꞌ ne coc pa ri tinamit, ma cꞌa cꞌo pa ri luwar pa xcꞌul wi ruma ri Marta.

³¹ Ecꞌu raj judiꞌab e cꞌo rucꞌ ri María re caquibochiꞌij ucꞌuꞌx, xquilo echiriꞌ na jampatana xyactajic y canic xel bi. Rique xeterej cꞌu bi chirij, ma e chiquiwach rique e riꞌ queꞌec chwa ri mukubal chaꞌ queꞌrokꞌej ruxibal.

³² Echiriꞌ ri María xopon pa cꞌo wi ri Jesús, xew xril uwach, xuxuc rib chwach, y jewaꞌ xubiꞌij che: —Wajawal, we ta e laꞌ lal cꞌo la wara, na cacam ta riꞌ ri nuxibal —xchaꞌ.

³³ Ri Jesús echiriꞌ xrilo lic quebokꞌ ri María y raj judiꞌab eteran lo chirij, lic xoc chucꞌuꞌx y xuchap bis.

³⁴ Xubiꞌij cꞌu chique: —¿Pa ximuk wi? —xchaꞌ. Rique xquibiꞌij: —Kajawal, peta la y chilape la —xechaꞌ.

³⁵ Ecꞌu ri Jesús xokꞌic.

³⁶ Xquibiꞌij cꞌu raj judiꞌab: —¡Chilape alak, lic cꞌax cunaꞌo! —xechaꞌ.

³⁷ E cꞌo jujun chique raj judiꞌab xquibiꞌij: —Wa waꞌchi e xtzuꞌnisan re ri jun potzꞌ. ¿Suꞌbe cꞌu riꞌ na jinta xuꞌano chaꞌ na cacam ta ri Lázaro? —xechaꞌ.

³⁸ Ri Jesús lic xoc tanchi bis chucꞌuꞌx, xkib chwa ri mukubal. Waꞌ jun jul worotal paꞌbaj y tzꞌapal uchiꞌ rucꞌ jun abaj.

³⁹ Ecꞌu ri Jesús xubiꞌij: —Chiwesaj laꞌbaj —xchaꞌ. Yey ri Marta, ri ranab can ri caminak, xubiꞌij che: —Wajawal, laꞌ lic chu chic, ma e ucaj kꞌij waꞌ mukutalic —xchaꞌ.

⁴⁰ Ri Jesús xubiꞌij che: —¿Na nubiꞌim ta neba chawe, we cacubiꞌ acꞌuꞌx wucꞌ, cawil runimal uwach ukꞌij ri Dios? —xchaꞌ.

⁴¹ Ewi xquesaj rabaj cꞌo chuchiꞌ ri mukubal. Ecꞌuchiriꞌ, ri Jesús xtzuꞌn chicaj y xubiꞌij: —Lal Nukaw, maltiox co cheꞌla ma intom chi la.

⁴² Riꞌin wetaꞌam lic xaki quinta la, pero cambiꞌij cꞌu waꞌ cuma wuꞌqꞌuiyal ticawex e cꞌo wara, chaꞌ rique caquicojo lal takayom lo we —xchaꞌ.

⁴³ Echiriꞌ xuqꞌuis ubiꞌxiquil waꞌ, lic co xsiqꞌuin che ubiꞌxiquil: —¡Lázaro, chatelulok! —xchaꞌ.

⁴⁴ Ewi ri Lázaro xel lok, bolkꞌotim ri rakan y rukꞌab pa cꞌul yey rupalaj chꞌukutal rucꞌ jun cꞌul. Ruma cꞌu laꞌ, ri Jesús xubiꞌij chique: —Chiquira ri cꞌul cꞌo che chaꞌ utz queꞌec —xchaꞌ.

⁴⁵ E qꞌui cꞌu chique raj judiꞌab, ri e petinak che ubochiꞌixic ucꞌuꞌx ri María, echiriꞌ xquil ri xuꞌan ri Jesús, xquicubaꞌ quicꞌuꞌx rucꞌ.

⁴⁶ Noꞌj e cꞌo jujun chique xebec cucꞌ ri fariseos, y xeꞌquitzijoj chique ri xuꞌan ri Jesús.

⁴⁷ Ecꞌu ri nimak e aj chacunel pa Rocho Dios y ri fariseos xquimol quib cucꞌ jujun chic chique ri e aj kꞌatal tzij y jewaꞌ xquibiꞌij: —¿Saꞌ ri cakaꞌano? Ma waꞌchi lic uqꞌuiyal cꞌutubal re ruchukꞌab cuꞌano.