Juan 10:5-26 in Achi

⁵ Ique xak n-que terej ta chirij jun we n-quetaʼam tu wach, xa que ʼanmaj chuwach, man n-quetaʼam tu wach u chʼawbal —xu bij i Jesus chique.

⁶ I tzij-le, are jun tijojbal tzij xu bij i Jesus chique, péro ique n-xqui ta tu be wach usucʼ i xu bij chique.

⁷ Rumal-i, i Jesus xu bij chic jun tzij chique: —Sak laj tzij i quin bij chiwe: yin in ocbal que i chij.

⁸ Niʼpa i je cʼun-nak nabe chinwach yin, ique xa je iliʼomab, xa elaʼ quiqui ʼano. Xui-ri, i chij n-xquetamaj tu wach i qui chʼawbal.

⁹ Chwe yin qui rik wi uchibe. Pachin i ca cʼun wuʼ, ca totaj ʼuri. Lic quin chajij; y queʼelok pacha jun chij quelsax bic, ca ʼe waʼok, y cocsax chalok.

¹⁰ I iliʼom, we xcʼunic, xui col u ʼana elaʼ, tak i camsanic, col u ʼana cʼax chique i chij. Yin n-queje ta quin ʼan ile. Yin in cʼun-nak quin yabej qui cʼaslemal i winak, jun cʼaslemal tzʼakatnak, lic ʼo u qʼuial u chomalil.

¹¹ Yin in ʼutz laj chajinel que i we yin, queje pacha jun ʼutz laj aj chajil chij. Jun ʼutz laj aj chajil chij cu ya rib chuwach i cʼax, tupu ca camsaxic, cu tobej que u chij. Queje quin ʼan yin ile, que in tobej i winak.

¹² Jun toʼ aj chʼacanel, n-cʼax ta que u na i chij. Are crilo ca cʼun li jun itzel chicop, que roʼtaj can i chij, y ca ʼanmajic. Queje ile cu ʼano, man n-are ti mer cajaw i chij, ire xa mocom. Are ʼuri itzel chicop que u chap i chij, y que u quichersaj bic.

¹³ I achi-le, xa ca ʼanmajic man n-cʼax ta que u na i chij; ire ʼo chila xa rumal i chʼacoj craj.

¹⁴ (Yin n-in ta pacha i aj chʼacoj-le), in queje pacha i ʼutz laj aj chajil chij man in ʼutz laj chajinel que i winak we yin. Yin lic wetaʼam u wach in Kajaw, xak in Kajaw retaʼam in wach yin. Queje yin ile chique i winak je we yin, wetaʼam qui wach; ique xak quetaʼam in wach yin. Yin xak quin ya wib chi camsaxic, tobal-que i je we yin.

¹⁶ Xak je ʼo juban chic winak, ne te aj Israel; ique xak que in siqʼuij wuʼ. Ique quiqui coj ni in tzij; coʼon panok xak jun iwach que u ʼon iwuʼ yix, y xui yin in aj chajal piwi iwonojel.

¹⁷ I Ta cʼax quin u naʼo man yin quin ya na wib che i camic, y ca cʼun chic sak chinwach.

¹⁸ Mi jun quin u camsaj we n-quin ya ta che cu ʼano, xui-ri, quin ya na wib chi quin camsaxic. Lic ʼo pinʼab chi quin ya wib chi camic, xak ʼo pinʼab quin walij chic. Man queje ile u yom in Kajaw pin ʼab —xu bij i Jesus chique.

¹⁹ I nimak tak aj Israel winak, are xqui ta ile, xe oc chu chapic quib puwi u tzij.

²⁰ Je qʼui chique ique xqui bij: —Yix, ¿wuchac qui coj retalil che? I achi-le xa chʼuj; ʼo itzel tew che —xe cha.

²¹ Je ʼo juban chic chi xqui bij: —We jun achi ʼo itzel tew che, n-cu bij taj pacha i cu bij ire-le. ¿Xataba jun itzel tew ca tiqui chu tzunsaxic jun mawach? —xqui bij chique i cachiʼil.

²² Chupam i ʼalaj, ʼo jun nimaʼij pa tinimit Jerusalen; are i nimaʼij re i rachoch i Dios chila.

²³ Che i rachoch i Dios, ʼo jun u wach ja chi u bi “U wach ja re i mam Salomon”; chila ca malcat wi i Jesus.

²⁴ Xe upon juban nimak tak aj Israel, xqui mol quib ruʼ i Jesus y xqui bij che: —Cʼa koyʼem na umpa ca bij chake chi at pachin yet. Cha bij i sak laj tzij we yet at Tolke chi koyʼem —xe cha che.

²⁵ I Jesus xu bij chique: —Ya xin bij, y n-qui coj taj. Dios u yom chwe quin ʼan nimak tak ʼanic, cʼutbal-re in pachin yin, péro yix n-qui coj taj chi Dios u yom pinʼab.

²⁶ Yix ix queje pacha i chij chi n-quin i coj taj, man n-ix ta we yin; pacha xin bij chiwe oʼonom lok.

⁵ Noꞌj taq ri bꞌexex na keterej tubꞌi chirij junoq we na ketaꞌam ta uwach; ri kakiꞌano e kebꞌanimaj chwach ma na ketaꞌam ta ruchꞌawibꞌal» xchaꞌ.

⁶ Ri Jesús xubꞌiꞌij wa jun kꞌambꞌal naꞌoj chike, pero rike na xkimaj ta usukꞌ saꞌ ri karaj kubꞌiꞌij chike.

⁷ Ekꞌuchiriꞌ, xubꞌiꞌij ri Jesús: «Paqatzij wi kambꞌiꞌij che alaq: In ri in uchiꞌ ri coral pa kebꞌok wi ri bꞌexex.

⁸ Konoje ri xekꞌun nabꞌe chinuwach riꞌin e eleqꞌomabꞌ y xa e kekeleqꞌaj bꞌi ri bꞌexex; pero ri bꞌexex na xekikajmaj ta rike.

⁹ »In ri in uchiꞌ ri coral ke ri bꞌexex. China ri kok bꞌi wuma riꞌin, riꞌ kakolobꞌetajik y kachajix chi utz pachaꞌ ri bꞌexex kebꞌokisax chaqꞌabꞌ pa ri coral y kebꞌesax bꞌi paqꞌij re kebꞌeꞌwoꞌq pa chomilaj kꞌim.

¹⁰ Juna eleqꞌom xew kakꞌunik re kuꞌan eleqꞌ, kuꞌan kamik y kusach uwach ronoje. Noꞌj riꞌin in kꞌuninaq re kanya kꞌaslemal che alaq yey waꞌ e jun chomilaj kꞌaslemal na jinta chi ukꞌisik.

¹¹ »In ri in utzilaj chajinel ke bꞌexex. Juna utzilaj chajinel ke bꞌexex kuya ranimaꞌ kakam kuma rubꞌexex.

¹² Noꞌj juna mokom kachakun xa ruma katojik. Echiriꞌ karilo kakꞌun lo rutiw, kanimajik y kebꞌuya kan ri bꞌexex; ma na e ta chajinel ke y na e tane kajaw. E uwariꞌche kuya luwar che rutiw kebꞌuchap ri bꞌexex y kebꞌukicherisaj bꞌi.

¹³ Wa mokom kanimajik ma na kok ta il chike ri bꞌexex, xew e kok il che ri kuchꞌako.

¹⁴ »In ri in utzilaj chajinel ke bꞌexex, ma riꞌin wetaꞌam kiwach ri nubꞌexex y rike ketaꞌam nuwach riꞌin.

¹⁵ Jelaꞌ pachaꞌ ri Nuqaw retaꞌam nuwach riꞌin, jekꞌulaꞌ riꞌin wetaꞌam uwach Rire; yey kanya wanimaꞌ kinkam kuma ri nubꞌexex.

¹⁶ »E kꞌo jujun chik nubꞌexex na e ta kukꞌil wa e kꞌo pa wa coral. Lik chirajawaxik wi kebꞌeꞌnukꞌamaꞌ loq. We xebꞌenusikꞌij, kakikoj nutzij y jelaꞌ kebꞌuꞌana xa jun pa ri coral y xa jun ri chajinel ke.

¹⁷ »Ruma kꞌu laꞌ, ri Nuqaw kꞌax kinunaꞌo, ma riꞌin kanya ri nukꞌaslem pa kamik yey kankꞌam tanchi waꞌ echiriꞌ kinkꞌastaj lo chikixoꞌl ri ekaminaq.

¹⁸ Na yaꞌtal ta puqꞌabꞌ junoq karesaj ri nukꞌaslem we na in ta kinyaꞌw re che. Panuqꞌabꞌ riꞌin kꞌo wi kanya wibꞌ pa kamik y panuqꞌabꞌ kꞌo wi kinkꞌastaj lo chikixoꞌl ri ekaminaq. Yey waꞌ e ri Nuqaw yaꞌyom panuqꞌabꞌ» xchaꞌ.

¹⁹ Echiriꞌ raj judiꞌabꞌ xkita wa chꞌaꞌtem, xkijach tanchi kipa chikiwach, ma e kꞌo ri xekojow re y e kꞌo ri na xekojow taj.

²⁰ E kꞌi chike jewaꞌ kakibꞌiꞌij: «Laꞌ kꞌo puqꞌabꞌ juna itzel uxlabꞌixel y chꞌuꞌjerinaq. ¿Suꞌchak kata alaq re?» kechaꞌ.

²¹ Noꞌj kꞌo jujun chik jewaꞌ kakibꞌiꞌij: «Na jinta junoq jelaꞌ kachꞌaꞌtik we kꞌo puqꞌabꞌ juna itzel uxlabꞌixel. ¿Kꞌo nebꞌa juna itzel uxlabꞌixel kebꞌutzuꞌnisaj ri e potzꞌ?» kechaꞌ.

²² Chupa kꞌu ruqꞌijol echiriꞌ kꞌax tew y kꞌo jabꞌ, e riꞌ katajin ri nimaqꞌij re ri Rocho Dios chilaꞌ Jerusalem.

²³ Y ri Jesús kabꞌin che ri Rocho Dios pa ri luwar kabꞌiꞌx che “Ruchiꞌ Ja re Salomón”

²⁴ Ekꞌu raj judiꞌabꞌ xkisut rij ri Jesús y jewaꞌ xkibꞌiꞌij che: —¿Jampa xaqi e waꞌ na kaqꞌalajisaj ta la chiqawach saꞌ ri wach la? We lal kꞌu Ruchaꞌoꞌn lo ri Dios, asu bꞌiꞌij la chiqe —xechaꞌ.

²⁵ Ri Jesús xukꞌul uwach: —Nubꞌiꞌim chi che alaq, yey na kakoj ta alaq. Ronoje taq ri chak kanꞌano, e ri Nuqaw intaqayom che kanꞌano. Rukꞌ taq kꞌu wa kanꞌano, kaqꞌalajinik in china riꞌin.

²⁶ Noꞌj ralaq na kakoj ta alaq, ma na alaq ta kukꞌil ri nubꞌexex, jelaꞌ pachaꞌ ri nubꞌiꞌim chi lo che alaq.

⁵ Noꞌj tak ri bexex na queterej tubi chirij junok we na quetaꞌam ta uwach; ri caquiꞌano e quebanimaj chwach ma na quetaꞌam ta ruchꞌawibal» xchaꞌ.

⁶ Ri Jesús xubiꞌij wa jun cꞌambal naꞌoj chique, pero rique na xquimaj ta usucꞌ saꞌ ri caraj cubiꞌij chique.

⁷ Ecꞌuchiriꞌ, xubiꞌij ri Jesús: «Pakatzij wi cambiꞌij che alak: In ri in uchiꞌ ri coral pa queboc wi ri bexex.

⁸ Conoje ri xecꞌun nabe chinuwach riꞌin e elekꞌomab y xa e quequelekꞌaj bi ri bexex; pero ri bexex na xequicajmaj ta rique.

⁹ »In ri in uchiꞌ ri coral que ri bexex. China ri coc bi wuma riꞌin, riꞌ cacolobetajic y cachajix chi utz pachaꞌ ri bexex queboquisax chakꞌab pa ri coral y quebesax bi pakꞌij re quebeꞌwoꞌk pa chomilaj qꞌuim.

¹⁰ Juna elekꞌom xew cacꞌunic re cuꞌan elekꞌ, cuꞌan camic y cusach uwach ronoje. Noꞌj riꞌin in cꞌuninak re canya cꞌaslemal che alak yey waꞌ e jun chomilaj cꞌaslemal na jinta chi uqꞌuisic.

¹¹ »In ri in utzilaj chajinel que bexex. Juna utzilaj chajinel que bexex cuya ranimaꞌ cacam cuma rubexex.

¹² Noꞌj juna mocom cachacun xa ruma catojic. Echiriꞌ carilo cacꞌun lo rutiw, canimajic y quebuya can ri bexex; ma na e ta chajinel que y na e tane cajaw. E uwariꞌche cuya luwar che rutiw quebuchap ri bexex y quebuquicherisaj bi.

¹³ Wa mocom canimajic ma na coc ta il chique ri bexex, xew e coc il che ri cuchꞌaco.

¹⁴ »In ri in utzilaj chajinel que bexex, ma riꞌin wetaꞌam quiwach ri nubexex y rique quetaꞌam nuwach riꞌin.

¹⁵ Jelaꞌ pachaꞌ ri Nukaw retaꞌam nuwach riꞌin, jecꞌulaꞌ riꞌin wetaꞌam uwach Rire; yey canya wanimaꞌ quincam cuma ri nubexex.

¹⁶ »E cꞌo jujun chic nubexex na e ta cuqꞌuil wa e cꞌo pa wa coral. Lic chirajawaxic wi quebeꞌnucꞌamaꞌ lok. We xebenusiqꞌuij, caquicoj nutzij y jelaꞌ quebuꞌana xa jun pa ri coral y xa jun ri chajinel que.

¹⁷ »Ruma cꞌu laꞌ, ri Nukaw cꞌax quinunaꞌo, ma riꞌin canya ri nucꞌaslem pa camic yey cancꞌam tanchi waꞌ echiriꞌ quincꞌastaj lo chiquixoꞌl ri ecaminak.

¹⁸ Na yaꞌtal ta pukꞌab junok caresaj ri nucꞌaslem we na in ta quinyaꞌw re che. Panukꞌab riꞌin cꞌo wi canya wib pa camic y panukꞌab cꞌo wi quincꞌastaj lo chiquixoꞌl ri ecaminak. Yey waꞌ e ri Nukaw yaꞌyom panukꞌab» xchaꞌ.

¹⁹ Echiriꞌ raj judiꞌab xquita wa chꞌaꞌtem, xquijach tanchi quipa chiquiwach, ma e cꞌo ri xecojow re y e cꞌo ri na xecojow taj.

²⁰ E qꞌui chique jewaꞌ caquibiꞌij: «Laꞌ cꞌo pukꞌab juna itzel uxlabixel y chꞌuꞌjerinak. ¿Suꞌchac cata alak re?» quechaꞌ.

²¹ Noꞌj cꞌo jujun chic jewaꞌ caquibiꞌij: «Na jinta junok jelaꞌ cachꞌaꞌtic we cꞌo pukꞌab juna itzel uxlabixel. ¿Cꞌo neba juna itzel uxlabixel quebutzuꞌnisaj ri e potzꞌ?» quechaꞌ.

²² Chupa cꞌu rukꞌijol echiriꞌ cꞌax tew y cꞌo jab, e riꞌ catajin ri nimakꞌij re ri Rocho Dios chilaꞌ Jerusalem.

²³ Y ri Jesús cabin che ri Rocho Dios pa ri luwar cabiꞌx che “Ruchiꞌ Ja re Salomón”

²⁴ Ecꞌu raj judiꞌab xquisut rij ri Jesús y jewaꞌ xquibiꞌij che: —¿Jampa xaki e waꞌ na cakꞌalajisaj ta la chikawach saꞌ ri wach la? We lal cꞌu Ruchaꞌoꞌn lo ri Dios, asu biꞌij la chike —xechaꞌ.

²⁵ Ri Jesús xucꞌul uwach: —Nubiꞌim chi che alak, yey na cacoj ta alak. Ronoje tak ri chac canꞌano, e ri Nukaw intakayom che canꞌano. Rucꞌ tak cꞌu wa canꞌano, cakꞌalajinic in china riꞌin.

²⁶ Noꞌj ralak na cacoj ta alak, ma na alak ta cuqꞌuil ri nubexex, jelaꞌ pachaꞌ ri nubiꞌim chi lo che alak.