Juan 10:18-40 in Achi

¹⁸ Mi jun quin u camsaj we n-quin ya ta che cu ʼano, xui-ri, quin ya na wib chi quin camsaxic. Lic ʼo pinʼab chi quin ya wib chi camic, xak ʼo pinʼab quin walij chic. Man queje ile u yom in Kajaw pin ʼab —xu bij i Jesus chique.

¹⁹ I nimak tak aj Israel winak, are xqui ta ile, xe oc chu chapic quib puwi u tzij.

²⁰ Je qʼui chique ique xqui bij: —Yix, ¿wuchac qui coj retalil che? I achi-le xa chʼuj; ʼo itzel tew che —xe cha.

²¹ Je ʼo juban chic chi xqui bij: —We jun achi ʼo itzel tew che, n-cu bij taj pacha i cu bij ire-le. ¿Xataba jun itzel tew ca tiqui chu tzunsaxic jun mawach? —xqui bij chique i cachiʼil.

²² Chupam i ʼalaj, ʼo jun nimaʼij pa tinimit Jerusalen; are i nimaʼij re i rachoch i Dios chila.

²³ Che i rachoch i Dios, ʼo jun u wach ja chi u bi “U wach ja re i mam Salomon”; chila ca malcat wi i Jesus.

²⁴ Xe upon juban nimak tak aj Israel, xqui mol quib ruʼ i Jesus y xqui bij che: —Cʼa koyʼem na umpa ca bij chake chi at pachin yet. Cha bij i sak laj tzij we yet at Tolke chi koyʼem —xe cha che.

²⁵ I Jesus xu bij chique: —Ya xin bij, y n-qui coj taj. Dios u yom chwe quin ʼan nimak tak ʼanic, cʼutbal-re in pachin yin, péro yix n-qui coj taj chi Dios u yom pinʼab.

²⁶ Yix ix queje pacha i chij chi n-quin i coj taj, man n-ix ta we yin; pacha xin bij chiwe oʼonom lok.

²⁷ Niʼpa i je we yin quetaʼam in chʼawbal. Yin wetaʼam qui wach, xak ique que terej chwij pacha quiqui ʼan i chij: quetaʼam u chʼawbal i cajaw, y que terej chirij.

²⁸ Y yin quin ya i qui cʼaslemal chi n-tu qʼuisic. Lic n-que sach taj; xak mi ta jun cu maj chwe.

²⁹ Are in Kajaw je u yom ique chwe. In Kajaw, nim ni u choʼab chiquiwach conojel; mi jun ca tiqui chi qui majic che.

³⁰ Yin, ruʼ in Kajaw, xa oj jun —xu bij i Jesus chique.

³¹ Rumal-i, i nimak tak aj Israel winak xe oc chic chu yaquic abaj, quiqui coj che, quiqui bij ique.

³² Are ʼuri i Jesus xu bij chique: —Rumal in Kajaw, in ʼanom u qʼuial tak ʼutz chiwach. ¿Pachique che tak i in ʼanomle u petsam iwoywal yix? ¿Wach rumal quiwaj qui coj abaj chwe? —coʼono.

³³ Teʼuri i nimak tak aj Israel xqui bij che: —N-rumal ta jun ʼutz a ʼanom chi caka coj abaj chawe. Caka ʼan na chawe man n-ʼus ti a bim chuwach i Dios; yet ca bij chi at xak jun ruʼ i Dios. Queje ile ca bij, y yet xa at jun chi winak —xe cha che.

³⁴ I Jesus xu bij chique: —I ʼatbal tzij tzʼibtal can rumal i mam Moises, cu bij chi Dios u bim i tzij-i: “Iwonojel yix ix tiox,” xu bij.

³⁵ Ketaʼam chi niʼpa i tzʼibtal chupam i wuj re i Dios, lic katzij. Bay, cu bij chi niʼpa i quiqui cʼam u tzij i Dios pa qui cʼux, ire cu bij chi je tiox.

³⁶ Y yin, Dios in u chom, xak in u takom chuwach i jyub taʼaj. ¿wuchac ʼut qui bij yix chi in kajsam u ʼij i Dios man xin bij chi in u Cʼojol i Dios?

³⁷ Yin we n-quin tijin ta chu ʼanic u chac in Kajaw, min i coj ʼuri.

³⁸ We n-qui cuba ta i cʼux chwe yin, tupu quin ʼan u chac in Kajaw, chi cuba i cʼux che wach tak quin ʼano. We queje ile qui ʼano, lic quiwetamaj ʼuri chi i Ta chicaj ʼo chwe yin, y yin xak in ʼo che ire —xu bij i Jesus chique.

³⁹ Rumal-i, xcaj tan chic i nimak tak aj Israel quiqui tzʼapij i Jesus, péro ire xtiqui chi relsaxic rib chiquixol.

⁴⁰ Teʼuri, i Jesus xa ʼax chic chʼakap che i ya Jordan. Chila xcanaj wi, pa xu kajsaj wi ya i ma Wan piquiwi i winak oʼonom lok.

¹⁸ Na yaꞌtal ta puqꞌabꞌ junoq karesaj ri nukꞌaslem we na in ta kinyaꞌw re che. Panuqꞌabꞌ riꞌin kꞌo wi kanya wibꞌ pa kamik y panuqꞌabꞌ kꞌo wi kinkꞌastaj lo chikixoꞌl ri ekaminaq. Yey waꞌ e ri Nuqaw yaꞌyom panuqꞌabꞌ» xchaꞌ.

¹⁹ Echiriꞌ raj judiꞌabꞌ xkita wa chꞌaꞌtem, xkijach tanchi kipa chikiwach, ma e kꞌo ri xekojow re y e kꞌo ri na xekojow taj.

²⁰ E kꞌi chike jewaꞌ kakibꞌiꞌij: «Laꞌ kꞌo puqꞌabꞌ juna itzel uxlabꞌixel y chꞌuꞌjerinaq. ¿Suꞌchak kata alaq re?» kechaꞌ.

²¹ Noꞌj kꞌo jujun chik jewaꞌ kakibꞌiꞌij: «Na jinta junoq jelaꞌ kachꞌaꞌtik we kꞌo puqꞌabꞌ juna itzel uxlabꞌixel. ¿Kꞌo nebꞌa juna itzel uxlabꞌixel kebꞌutzuꞌnisaj ri e potzꞌ?» kechaꞌ.

²² Chupa kꞌu ruqꞌijol echiriꞌ kꞌax tew y kꞌo jabꞌ, e riꞌ katajin ri nimaqꞌij re ri Rocho Dios chilaꞌ Jerusalem.

²³ Y ri Jesús kabꞌin che ri Rocho Dios pa ri luwar kabꞌiꞌx che “Ruchiꞌ Ja re Salomón”

²⁴ Ekꞌu raj judiꞌabꞌ xkisut rij ri Jesús y jewaꞌ xkibꞌiꞌij che: —¿Jampa xaqi e waꞌ na kaqꞌalajisaj ta la chiqawach saꞌ ri wach la? We lal kꞌu Ruchaꞌoꞌn lo ri Dios, asu bꞌiꞌij la chiqe —xechaꞌ.

²⁵ Ri Jesús xukꞌul uwach: —Nubꞌiꞌim chi che alaq, yey na kakoj ta alaq. Ronoje taq ri chak kanꞌano, e ri Nuqaw intaqayom che kanꞌano. Rukꞌ taq kꞌu wa kanꞌano, kaqꞌalajinik in china riꞌin.

²⁶ Noꞌj ralaq na kakoj ta alaq, ma na alaq ta kukꞌil ri nubꞌexex, jelaꞌ pachaꞌ ri nubꞌiꞌim chi lo che alaq.

²⁷ Taq ri nubꞌexex ketaꞌam chi ri nuchꞌawibꞌal; yey riꞌin wetaꞌam kiwach y rike eteran chwij.

²⁸ Riꞌin kanya kikꞌaslemal na jinta utaqexik chaꞌ jelaꞌ na kasach ta kꞌana kiwach y na jinta ne junoq kebꞌeresaj panuqꞌabꞌ.

²⁹ Yey e ri Nuqaw ri xeyaꞌw ke panuqꞌabꞌ, y Rire más kꞌo uwach chikiwa konoje. Ruma kꞌu riꞌ, na jinta junoq kebꞌeresaj puqꞌabꞌ Rire.

³⁰ Ma ri Nuqaw y riꞌin xa oj jun —xchaꞌ.

³¹ Julaj chik raj judiꞌabꞌ xkikꞌam abꞌaj pakiqꞌabꞌ re kakiꞌan ri Jesús paꞌbꞌaj.

³² Pero Rire xubꞌiꞌij chike: —Lik kꞌi ri utzilaj chak nuꞌanom chiwach alaq rukꞌ ruchuqꞌabꞌ ri Nuqaw. ¿Ruma pachike che taq wa nuꞌanom kinꞌan alaq paꞌbꞌaj? —xchaꞌ.

³³ Raj judiꞌabꞌ xkikꞌul uwach: —Na kaqaꞌan ta la paꞌbꞌaj ruma ri utz ꞌanom la; e ruma makuninaq la chirij ri Dios rukꞌ ri chꞌaꞌtem la. Ma rilal xa lal jun achi y kaꞌan Dios che ibꞌ la —xechaꞌ.

³⁴ Ekꞌuchiriꞌ, ri Jesús xubꞌiꞌij chike: —Jewaꞌ tzꞌibꞌital kan chupa ri Tzij Pixabꞌ kꞌo ukꞌ alaq: “Ximbꞌiꞌij: Riꞌix ix dios.”

³⁵ Ri Dios xubꞌiꞌij kꞌu “dios” chike ri xkikꞌul Ruchꞌaꞌtem, yey Ruchꞌaꞌtem na kajalkꞌatitaj taj.

³⁶ ¿Suꞌanik kꞌu riꞌ kabꞌiꞌij alaq chwe in makuninaq xa ruma ri ximbꞌiꞌij in Ukꞌajol ri Dios? ma ri Dios xinuchaꞌ lo riꞌin yey xinutaq lo che ruwachulew.

³⁷ »We na e ta kanꞌan ruchak ri Nuqaw, utz kꞌu riꞌ we na kakoj ta alaq ri kambꞌiꞌij.

³⁸ Noꞌj we e kanꞌan ruchak ri Nuqaw, kojo kꞌu alaq riꞌ in china riꞌin ruma taq ri kanꞌano, na xa ta ruma ri kambꞌiꞌij. Y jelaꞌ ketaꞌmaj alaq y kakoj alaq riꞌ: Ri Nuqaw wukꞌ riꞌin y riꞌin rukꞌ Rire, xa oj jun —xchaꞌ.

³⁹ Ekꞌu raj judiꞌabꞌ xkaj tanchik kakichapo, pero na xkichap taj ma ri Jesús xel bꞌi chikixoꞌl.

⁴⁰ Y xuqꞌaxuj kꞌu ri nimayaꞌ Jordán pa xuya wi bautismo ri Juan y xkanaj kan chilaꞌ.

¹⁸ Na yaꞌtal ta pukꞌab junok caresaj ri nucꞌaslem we na in ta quinyaꞌw re che. Panukꞌab riꞌin cꞌo wi canya wib pa camic y panukꞌab cꞌo wi quincꞌastaj lo chiquixoꞌl ri ecaminak. Yey waꞌ e ri Nukaw yaꞌyom panukꞌab» xchaꞌ.

¹⁹ Echiriꞌ raj judiꞌab xquita wa chꞌaꞌtem, xquijach tanchi quipa chiquiwach, ma e cꞌo ri xecojow re y e cꞌo ri na xecojow taj.

²⁰ E qꞌui chique jewaꞌ caquibiꞌij: «Laꞌ cꞌo pukꞌab juna itzel uxlabixel y chꞌuꞌjerinak. ¿Suꞌchac cata alak re?» quechaꞌ.

²¹ Noꞌj cꞌo jujun chic jewaꞌ caquibiꞌij: «Na jinta junok jelaꞌ cachꞌaꞌtic we cꞌo pukꞌab juna itzel uxlabixel. ¿Cꞌo neba juna itzel uxlabixel quebutzuꞌnisaj ri e potzꞌ?» quechaꞌ.

²² Chupa cꞌu rukꞌijol echiriꞌ cꞌax tew y cꞌo jab, e riꞌ catajin ri nimakꞌij re ri Rocho Dios chilaꞌ Jerusalem.

²³ Y ri Jesús cabin che ri Rocho Dios pa ri luwar cabiꞌx che “Ruchiꞌ Ja re Salomón”

²⁴ Ecꞌu raj judiꞌab xquisut rij ri Jesús y jewaꞌ xquibiꞌij che: —¿Jampa xaki e waꞌ na cakꞌalajisaj ta la chikawach saꞌ ri wach la? We lal cꞌu Ruchaꞌoꞌn lo ri Dios, asu biꞌij la chike —xechaꞌ.

²⁵ Ri Jesús xucꞌul uwach: —Nubiꞌim chi che alak, yey na cacoj ta alak. Ronoje tak ri chac canꞌano, e ri Nukaw intakayom che canꞌano. Rucꞌ tak cꞌu wa canꞌano, cakꞌalajinic in china riꞌin.

²⁶ Noꞌj ralak na cacoj ta alak, ma na alak ta cuqꞌuil ri nubexex, jelaꞌ pachaꞌ ri nubiꞌim chi lo che alak.

²⁷ Tak ri nubexex quetaꞌam chi ri nuchꞌawibal; yey riꞌin wetaꞌam quiwach y rique eteran chwij.

²⁸ Riꞌin canya quicꞌaslemal na jinta utakexic chaꞌ jelaꞌ na casach ta cꞌana quiwach y na jinta ne junok queberesaj panukꞌab.

²⁹ Yey e ri Nukaw ri xeyaꞌw que panukꞌab, y Rire más cꞌo uwach chiquiwa conoje. Ruma cꞌu riꞌ, na jinta junok queberesaj pukꞌab Rire.

³⁰ Ma ri Nukaw y riꞌin xa oj jun —xchaꞌ.

³¹ Julaj chic raj judiꞌab xquicꞌam abaj paquikꞌab re caquiꞌan ri Jesús paꞌbaj.

³² Pero Rire xubiꞌij chique: —Lic qꞌui ri utzilaj chac nuꞌanom chiwach alak rucꞌ ruchukꞌab ri Nukaw. ¿Ruma pachique che tak wa nuꞌanom quinꞌan alak paꞌbaj? —xchaꞌ.

³³ Raj judiꞌab xquicꞌul uwach: —Na cakaꞌan ta la paꞌbaj ruma ri utz ꞌanom la; e ruma macuninak la chirij ri Dios rucꞌ ri chꞌaꞌtem la. Ma rilal xa lal jun achi y caꞌan Dios che ib la —xechaꞌ.

³⁴ Ecꞌuchiriꞌ, ri Jesús xubiꞌij chique: —Jewaꞌ tzꞌibital can chupa ri Tzij Pixab cꞌo ucꞌ alak: “Ximbiꞌij: Riꞌix ix dios.”

³⁵ Ri Dios xubiꞌij cꞌu “dios” chique ri xquicꞌul Ruchꞌaꞌtem, yey Ruchꞌaꞌtem na cajalcꞌatitaj taj.

³⁶ ¿Suꞌanic cꞌu riꞌ cabiꞌij alak chwe in macuninak xa ruma ri ximbiꞌij in Ucꞌajol ri Dios? ma ri Dios xinuchaꞌ lo riꞌin yey xinutak lo che ruwachulew.

³⁷ »We na e ta canꞌan ruchac ri Nukaw, utz cꞌu riꞌ we na cacoj ta alak ri cambiꞌij.

³⁸ Noꞌj we e canꞌan ruchac ri Nukaw, cojo cꞌu alak riꞌ in china riꞌin ruma tak ri canꞌano, na xa ta ruma ri cambiꞌij. Y jelaꞌ quetaꞌmaj alak y cacoj alak riꞌ: Ri Nukaw wucꞌ riꞌin y riꞌin rucꞌ Rire, xa oj jun —xchaꞌ.

³⁹ Ecꞌu raj judiꞌab xcaj tanchic caquichapo, pero na xquichap taj ma ri Jesús xel bi chiquixoꞌl.

⁴⁰ Y xukꞌaxuj cꞌu ri nimayaꞌ Jordán pa xuya wi bautismo ri Juan y xcanaj can chilaꞌ.