1 Sar imar sas o Jozua igen phuro, o RAJ leske phenďa: “Tu sal imar phuro a hin tuke imar but berš, ale ačhile ode but phuva, so o Izraeliti mek na zaile.
2 Ačhile mek o Filišťinike the Gešurengere phuva.
3 O phuva, pal save phenen, hoj hine le Kanaančanengere, le paňestar Šichor, so džal pro vichodos le Egiptostar, dži pro severos paš o Ekron. Ode bešen pandž Filišťinike kraľa andral e Gaza, andral o Ašdod, o Aškalon, o Gat the o Ekron. Ačhiľa mek e phuv le Avvičanengeri,
4 pro juhos e phuv le Kanaančanengeri dži ke phuv Meara, so hiňi le Sidončanengeri, dži ko Afek, so hiňi e phuv le Amorejengeri.
5 Ačhiľa the e phuv le Gebalengeri the calo Libanon pro vichodos le Baal-Gadostar paš o verchos Chermon dži prekal o verchengero drom Lebo-Chamat.
6 Me anglal o Izraeliti tradava avri savore Sidončanen, save bešen maškar o verchi Libanon dži ko Misrefot-Majim. Tu akana le losoha ča rozulav le Izraelitenge o phuva avke, sar tuke phenďom.
7 Rozulav kadi phuv le eňa kmeňenge the jepaš le Menaššeskere kmeňoske, hoj te el lengeri.”
8 O Rubenoskero, Gadoskero the o dujto jepaš le Menaššeskero kmeňos priile o ďeďictvos, so lenge diňa o Mojžiš, le RAJESKERO služobňikos, pro vichodos pal o Jordan. Lengeri phuv chudelas
9 le forostar Aroer pro brehos paš e dolina Arnon, dureder ko foros, so hino maškar odi dolina, the ko rovno than le Dibonostar dži ko foros Medeba.
10 On priile savore fori le Amorejike kraľiskere le Sichonoskere, savo kraľinelas andro Chešbon, dži ke phuv le Ammončanengeri.
11 Priile mek o Gilead, e phuv le Gešurengeri the le Maachaťanengeri, savore verchi paš o Chermon the caľi phuv Bašan dži ke Salcha.
12 E phuv Bašan sas angle oda le kraľiskeri le Ogoskeri, savo bešelas andro Aštarot the Edrej. Ov ačhiľa ča jekh poslednendar savore Refajendar, upral save o Mojžiš ňerinďa (zviťazinďa) a tradňa avri.
13 Ale o Izraeliti na tradle avri le Gešuren the le Maachaťanen, vašoda dži adadžives bešen maškar lende.
14 O Mojžiš na diňa ňisavi phuv le kmeňos Levi vaš o ďeďictvos, bo o RAJ o Del le Izraeloskero lenge phenďa: “Na chudena o phuva, ale ča o obeti, so ena labarde pre miro oltaris.”
15 O Mojžiš diňa o phuva vaš o ďeďictvos le famelijenge andral o kmeňos Ruben.
16 Pro juhos lengeri phuv chudelas le forostar Aroer, so hino pro brehos paš e dolina Arnon – lengere sas the o foros maškar e dolina, the e phuv dži ke Medeba,
17 o foros Chešbon the savore leskere fori, so hine pre odi phuv: o Dibon, o Bamot-Baal, o Bet-Baal-Meon,
18 e Jahca, o Kedemot, o Mefaat,
19 o Kirjatajim, e Sibma the o Ceret-Šachar pro brehos andre dolina,
20 o Bet-Peor tel o verchos Pisga the o Bet-Ješimot.
21 Chudle mek savore fori pre odi phuv the calo kraľišagos le Amorejike kraľiskero le Sichonoskero, savo kraľinelas andro Chešbon. O Mojžiš ňerinďa upral leste the upral o Midijaňike vodci, save sas o Evi, o Rekem, o Cur, o Chur the o Reba: Kala savore sas le kraľiskere Sichonoskere vodci.
22 O Izraeliti murdarde the le vrašcos le Bileam, le Beoriskere čhas.
23 Pro zapados le Rubenengeri phuv chudelas le brehostar Jordan. Kale fori the gava priile o fajti le Rubenengere sar ďeďictvos.
24 O Mojžiš diňa the ďeďictvos dojekha fajtake andral o Gadoskero kmeňos.
25 Sas lenge dino o foros Jazer, savore fori andro Gilead the jepaš phuv le Ammončanengeri dži ko Aroer, so hino pro pašes paš e Rabba,
26 le Chešbonostar ko Ramat-Micpa the Betonim; le forostar Machanajim dži ko than Lo-Debar.
27 Tele andre dolina Jordan chudle o fori Bet-Haram, Bet-Nimra, Sukkot the Cafon a the oda, so ačhiľa la phuvatar le Sichonoskera, savo sas kraľis le Chešbonoskero, the e vichodno sera le Jordanoskeri dži paš o Galilejsko moros.
28 Kala fori the gava priile o fajti andral o kmeňos Gad sar ďeďictvos.
29 O Mojžiš diňa le fajtenge andral o jepaš kmeňos Menašše kala phuva vaš o ďeďictvos:
30 Le forostar Machanajim ko severos, caľi phuv Bašan – o kraľišagos le kraľiskero Ogoskero. Andro Bašan sas šovardeš (60) gava, so zaiľa o Jair.
