11 Ragkes daan is Gilead wey is menge tanà he mid-ubpaan te menge Gisurhanen wey menge Maakatnen, is tivuuk he Buntud he Hermon, wey is tivuuk he Bashan taman te Saleca.
12 Ragkes daan is tivuuk he ginhedian ni Og, he midhadì diyà te Ashtarot wey ziyà te Edrei. Si Og, ne sevaha te nesamà te menge kevuwazan te menge Ripanhen he midaag ni Moises ne midsegseg din sikandan puun te tanè dan.
13 Piru wazà mesegseg te menge Israilihanen is menge Gisurhanen wey is menge Maakatnen. Heini he menge etew nengungubpaan gihapun duma te menge Israilihanen taman en guntaan.
14 Wazà beǥayi ni Moises is tribu ni Levi te tanà he egkepengevilin dan. Kekenà, iyan egkezawat dan is bahin te menge pemuhat pinaaǥi te hapuy he ibpemuhat diyà te Nengazen he Megbevayà te Israel, sumalà is migkaǥi zin diyà te ki Moises.
15 Iyan heini kevahin te tanà te Israel he imbahin ni Moises diyà te tribu ni Reuben, he mibahin diyà te kada pemilya zan:
