1 Taha bapa Eleaʒa â Nuŋte ŋokâ Josua, erâ Israe ŋic guru‐jeŋic sâc irec micne jaŋe Kanaaŋ mâreŋ ʒiŋuc bâtâc bajarepie Israe ŋic jaŋe ro rauc embiŋ:
2 Wofuŋzi Mose mutâcnecnewec irec sâcko guru 9 â nâfocne jaŋere mâreŋte qaŋgec qambiŋ.
3 Mosezi qanaŋ guru jajahec â nâfocne jaŋe Jordaŋ ŋifec mâreŋ jareme ro rauc embiŋ. Â Lewire guru jaŋe ine mâreŋ moc mi jarewec.
4 Josefere guru ine jajahec: Manase â Eferaim. Lewire guru jaŋe mâreŋ dâkâne mac moc mi jarembiŋ hâcne. Jaŋe hae rauckerâ qaŋeŋnao mâreŋ forawec i lama bulimakaofâc‐jeŋic râec‐jopaniŋte sawa rombiŋ.
5 Israe ŋic jaŋe Wofuŋzi Mose mutâcnecnewec irec sâcko ehuc mâreŋ ro rauc embiŋ hâcne.
6 Eme Judare guru jaŋe Giligali haeo Josuarao rambiŋ. Ehuc Keniʒi ŋic, Jefune ŋokâ‐ticne Kalebe, eki ʒiŋuc âzâcnewec: “Wofuŋzi Kadesi‐Baranea haeo nâhâcne dâŋ Anuture ŋic Mose âzâcnewec i manakomec.
7 No jara 40 bazurâ juhape Wofuŋte kiŋaŋŋic Mosezi mâreŋ hone tâcnepemurâ Kadesi‐Baraneaonec sorecnuwec. Eme no risierâ hone manac epo sâc binaŋ bacnepo.
8 Â âgofâc‐nane mâmâc fembeŋ jaŋe ine maŋ wawaha dâŋ mupie ŋic ŋokac jaŋere maŋ ŋeŋgoroŋke‐fârewec. No ine Wofuŋ Anutu‐nanerao qohota sanaŋkepo.
9 Eme dameŋ ira Mosezi mujomirehuc kecʒiŋuc muwec: ‘Kikegezi mâreŋ âtemeŋ i jâmbâŋ hâcne raŋɋa raŋɋa go â ɋâricfâcge ŋoŋere biŋe fozejec. Go Wofuŋ Anutu‐nanerao qohota sanaŋkemeŋ irec.’
10 Manakic, Israe ŋic jaŋe mâreŋ sawao juhapie Wofuŋzi dâŋ ʒi Mose âzâcnewec. Eme Wofuŋ e muwec irec sâcko jara 45 irec maŋnao hone maiŋ enareha juwefukopac. Ehame ʒi jara dameŋ‐nane 85 ekac.
11 No Mosezi sorecnuwec dameŋ ira tâpiri â ʒoɋachec jupo sâc iŋucnea dameŋ ʒiŋuczia jukopac wâc. Ʒikare â rac warec eere tâpiri â ʒoɋac‐nane dameŋ ira fowec iŋucnea ʒiŋuczia fonarekac.
12 Irec Wofuŋzi tiki mâreŋ kecʒirec muwecte miŋecgac mutara‐narec. Erâ Anaka ŋic jaŋe hae sacsâko‐jeŋichec jumbiŋ irec manameŋ wâc. Wofuŋ e nohec juocmu mecne, ehame Wofuŋzi muwec irec sâcko sâcne jopa jâpec ejarepemu.”
13 Jefune ŋokâ‐ticne Kalebe e dâŋ iŋuc mufâreme Josuazi jambuŋkewec. Ehuc Heboroŋ hae mâreŋ i ro rauc eocte râcnewec.
14 Irec erâ Heboroŋ hae i Keniʒi ŋic Jefune ŋokâ‐ticne Kalebe eki ro rauc ewec hâcne. E Israere Wofuŋ Anutu erao qohota sanaŋkewecte iŋuc hâcne ecnekicne.
15 Mârâc jaha Heboroŋ haere ʒâŋe i Arobare hae mujumbieŋ. Araba e jahacne ine Anaka ŋicguruo ŋic fekicne juwec. Eme ʒika fowarewec i tara‐fâreme mâreŋ ira wama fuarâ fowec.
