3 Gei digau Israel ga daudali nnelekai Dimaadua, gaa wanga gi di madawaawa Levi nadau waahale mo nadau gowaa iai ni geingatolo, mai i lodo nadau gowaa ala ne hai mee ginai ginaadou.
4 Mai i lodo di madawaawa Levi, ma go nia madahaanau lligi o di madahaanau damana o Kohath ne wanga ginai nadau waahale e noho ai i di matagidagi. Nia madahaanau i di madawaawa Levi ala nia hagadili ni Aaron, tangada hai mee dabu, la ne wanga ginai nia waahale e madangaholu maa dolu i lodo nia gowaa a Judah, Simeon, mo Benjamin.
5 Digau ala i golo i di madahaanau damana o Kohath ne wanga ginai nia waahale e madangaholu i nia guongo a Ephraim, Dan mo Manasseh i Bahi i Dai.
6 Di madahaanau damana o Gershon la ne wanga ginai nia waahale e madangaholu maa dolu mai i nia madawaawa Issachar, Asher, Naphtali mo Manasseh i Bahi i Dua.
7 Nia madahaanau lligi o di madahaanau damana o Merari la ne wanga ginai nia waahale e madangaholu maa lua i nia madawaawa Reuben, Gad mo Zebulun.
8 Digau Israel guu wanga nia waahale aanei mono gowaa geingatolo gi di madawaawa Levi gi di hai o di hudihudi gi nia hadu, be di hagawaalanga a Dimaadua ne hai ang gi Moses.
9 Aanei nia ingoo o nia waahale mai i di madawaawa Judah mo Simeon ala ne wanga
10 gi di hagadili o Aaron dela go di madahaanau o Kohath, dela go di hagadili ni Levi. Go digaula ala e gai i di matagidagi.
11 Digaula guu wanga ginai di waahale go Arba (Arba la go tamana a Anak), dolomeenei e gahi bolo Hebron, i lodo tenua gonduu o Judah, mo dono gowaa geingatolo.
12 Malaa, nia gowaa maalama o di waahale deenei, mono dama waahale ala i tua di waahale damana la guu wanga gi Caleb tama daane a Jephunneh e hai mee ginai.
13 Nia waahale aanei la guu wanga gi di hagadili Aaron, tangada hai mee dabu: go Hebron (deenei di waahale dela e mee di bala ai tangada), mo Libnah,
14 Jattir, Eshtemoa,
15 Holon, Debir,
16 Ain, Juttah, mo Beth Shemesh, mo nadau gowaa geingatolo. Nia waahale aanei le e hiwa mai i nia madawaawa Judah mo Simeon.
17 Digaula guu wanga ginai nia waahale e haa mai i di madawaawa Benjamin: go Gibeon, Geba,
18 Anathoth mo Almon, mo nadau gowaa geingatolo.
19 Nia waahale huogodoo mo nadau gowaa geingatolo ala ne wanga gi nia gau hai mee dabu, go di hagadili o Aaron, le e madangaholu maa dolu.
20 Nia madahaanau lligi ala i golo o di madahaanau damana o Kohath i di madawaawa Levi la guu wanga ginai nia waahale mai i di madawaawa Ephraim.
21 Nia waahale e haa aanei la guu wanga gi digaula: go Shechem dela i tenua gonduu o Ephraim (deenei di waahale e mee di bala ai tangada), mo Gezer,
22 Kibzaim, mo Beth Horon, mo nadau gowaa geingatolo.
23 Nia waahale e haa aanei mai i di madawaawa Dan la guu wanga gi digaula: go Eltekeh, Gibbethon,
24 Aijalon, mo Gath Rimmon, mo nadau gowaa geingatolo.
25 Digaula guu wanga ginai nia waahale e lua aanei mai i nia guongo a Manasseh i Bahi i Dai: go Taanach mo Gath Rimmon mo nau gowaa geingatolo.
26 Nia waahale huogodoo mo nadau gowaa geingatolo ala guu wanga gi nia madahaanau lligi o di madahaanau damana o Kohath, le e madangaholu.
27 Di buini i golo i di madawaawa Levi dela go di madahaanau damana o Gershon, la guu wanga ginai nia waahale e lua aanei i nia guongo o Manasseh i Bahi i Dua: go Golan i Bashan (deenei di waahale e mee di bala ai tangada) mo Beshterah, mo nau gowaa geingatolo.
