18 Jiu kva vahe'mo'za, avurga asu osu'nea neku nehaze, nehu'za zamentinti osu'za, ana ne'mofo nererane nefane znagi hu'naze.
19 Zamagra nererane, nefane znantahige'naze, ama'i mofavrea avu asuhu'negeta ksente'na'o? Hanki inankna huno menina avua nege?
20 Nererake, nefake kenona'a anage hu'na'e, Tagra antahi'no'e, ama tagri mofavre, avu asu hu'nea ksente'no'e.
21 Hianagi tagra antahita keta osu'none, menima avuma negea'zane, aza avua eri so'e hunte'neo ontahi'no'e. Agra ra vahe mani'neanki, antahigenkeno agra tmasmino.
22 Nererake nefakea amanahu kema hu'na'ana, na'ankure Jiu mono kva vaheku koro huke anage hu'na'e. Na'ankure Jiu mono kva vahe'mo'za ke retro hu'za, mago'mo Jisasinku Kraisi'e huno, huama hanimofona, Jiu mono nompinti (Sinagog) ahe natigahune, hu'naze.
23 Ana ke agafare nererake nefakea huke, agra ra vaheki agri antahigeho hu'na'e.
24 Ete mago'ene, ko'ma avu asuhu'nea ne' agi hu'za asmi'naze, Anumzamofo avure tamage hunka huo, kavu eri hari hu'nea nera, kumi ne' mani'negeta tagra antahi'none.
25 Ana ne'mo anage hu'ne, nagra ontahi'noe Agra kumi ne' mani'neo, magoke'zama nagra antahi'noana, navua asu hu'neane, hagi menina navu negoe.
26 Anante Farisi vahe'mo'za asmi'za, Jisasi'a nankna'za kagrira hugante'ne? Inankna huno Agra kavurga erihari hu'ne?
27 Avuma eriharima huntenea ne'mo anage hu'ne, nagra ko tmasmi'noanagi ontahi'nazo. Nahigetma ru'ene antahinakura nehaze? Tamagra nena Agri amage'ante disaipol naga maninaku nehazafi?
28 Zamagra ana kemofo nona'a knara kefinti fra vazinte'za, kagra Agri amage nentana disaipol ne' mani'nananki, tagra Mosese amage nentona vahe mani'none!
29 Anumzamo Mosesena kea humigeta tagra antahi'none, hianagi ama'i nera igati e'neo, tagra ontahi'none.
30 Ana ne'mo anage huno zamasmi'ne, ama ruzahu'zama hu'nea nera, Agra igati eno, navurga erihari hige'na ke'noe, tamagra ontahi'naze!
31 Tagra antahi'none, kumi vahera Anumzamo'a antahi'nomie, hianagi iza'o mono hunenteno Agri amage' ante fatgohani'mofona, Anumzamo antahiamigahie.
32 Mona mopa fore hu'nea knareti, avu asu hu'nea vahera mago ne'mo'e huno avurga eri hari hie kea ontahi'none.
33 Ama ne'ma Anumzamofontegatima ome'nesuno'a, Agra mago'zana osugahie.
34 Farisi vahe'mo'za anage hu'naze, Kagrira miko kumi'zampi ksegante negenka, tagri rempi hurami'za nehano? Anage nehu'za Jiu mono nompintira (Sinagog) avazu hu'za, atufe atrageno vu'ne.
35 Ana ne'ma avazuhu megi atraze kea Jisasi'a nentahino, ome kefore huno Agra amanage hu'ne, Kagra Vahe'mofo Mofavrere kmentinti nehano?
36 Ana ne'mo anage hu'ne, Agra iza'e ramoka, nagrama Agrite namentinti'ma hanuana?
37 Jisasi'a anage huno asmi'ne, kagra Agrira negane, e'i ana ne'mo kagri'enena keaga nehie.
38 Avuma eri hari hu'nea ne'mo anage hu'ne, Ranimoka nagra namentinti hue, nehuno anante mono hunte'ne.
39 Jisasi'a amanage hu'ne, Vahe refko hunaku ama mopafina ermi'noe, e'ina hanugeno zamuma nonke'samo'za kesageno, zamuma negesa'mokizmi zamumo'a asu hugahie.
40 Mago'a Farisi vahe Agrane anante mani'namo'za, ana naneke nentahi'za anage hu'za Jisasina antahige'naze, Tagri tavumo'enena asu hu'nefi?
