5 Mago nera 38ti'a kafufi kri eri'nea ne', ana tirutera mseno mani'ne.
6 Anante mseno mani'negeno Jisasi'a negeno, za'za kna ana krifina mse'ne huno antahi'ne. Jisasi'a anage huno asmi'ne, Kagesama antahinana krika'a knare hugantesie hunka nentahino?
7 Ana kri ne'mo kenona'a asmino, Ra vahe'moka timoma kazama nehanigeno navreno ome nantesia vahera omni'nege'na, ana'ana hu'na nevuge'za rumo'za tirupina nagtere'za unermize.
8 Jisasi'a nentahino ana neku huno, Otinka, naverisaka'a renamginka e'nerinka vuo.
9 Hantaka huno kri'amo atrentegeno, tafe'a erirenamgino e'nerino otino agafa huno kana vu'ne. Ana kna mni fruhu kna (Sabat) zupa ana kaguvazana hu'ne.
10 Ana hige'za Jiu kva vahe'mo'za kri'ama eri amne huntea ne' antahige'naze, menina mni fruhu (Sabat) kna meno nagru hu'neankinka, naverisaka'a erinka vano osu'gahane.
11 Hianagi kri'a eri amne hu'nea ne'mo zamasmi'ne, agra aza'o kri'nima eri amne hu'nea ne'mo Agra nasmino, naverisaka'a erisaga hunka vuo huno hunante'ne.
12 Zamagra, agrira antahige'naze, Iza ana nera huganteno, naverisaka'a eri kofinka vuo huno hugante'ne?
13 Hianagi azeri so'ema hunte'nea ne'mo'a, iza anara hu'neo antahino keno osu'ne, na'ankure Jisasi'a maka vahepi ruhavia huno vu'ne.
14 Henka Jisasi'a ana nera ra mono nompi ome kefore huno asmi'ne, ko, krika'a hago vgare, mago'ene kumira osuo, e'inama hanunka tusi'a knaza henka'a erigahane.
15 Ana ne'mo'a atreno viazamo, Jiu vahera ome zamasmino, Jisasi kri'nia eri amane hunante'ne huno zamasmi'ne.
