26 Na'ankure Nefa'a asimu erino mani'zamofo agafa'a Agripi me'ne. Nemofona anahu kna huno asimu erino mani'zamofo agafa'a Agri ami'ne.
27 Ana nehuno Agra Nemofona kema hugnare hunte hanavea (atoriti) ami'neankino, vahe'ma refko hu'zana Agri ami'ne, na'ankure Agra Vahe'mofo Mofavre.
28 Ana kegura antria osiho, na'ankure mago knama fore'ma hina kerifi asezamante'naza vahe'mo'za Anumzamofo Mofavre'agerura antahi'za,
29 oti'za esnageno knare avu'ava hu'nesaza nagamo'za, oti'za ksefa mani'za erigahaze. Hagi kefo avu'avazampi mani'ne'za fri'ne hanamokizmia, refako huno naneke huzmantegahie.
30 Nagra navesitera mago'azana osugahue. Anumzamofo ke nentahi'na anante zganena refko nehue. Ana kema refko'ma huana mago kante ante'na nezganoe. Na'ankure Nagra navesi'zantera kenontoe, hagi Agrama hunantege'na e'nomofo avesite refkoa nehue.
31 Nagrama, tamage nehue hu'na Nagrani'agu huama hanuana, Nagra havige hugahue.
32 Hianagi Nagri nagenkema rumo huama (testimoni) nehige'na, Agrama Nagriku huama hianke nentahi'na, tamage nehie hu'na nehue.
33 Tamagra Joninte vahe huzmantage'za ome antahi'nazana, Joni'a tamage nanekege huzmasmi'ne.
34 Hu'neanagi Nagrama hua kema e'neruana, mopafi vahepintira e'norue. Hianagi Nagrama nehuana tmagri'ma tmaza hanigu nehue.
35 Joni'a lampe tvi kna huno tvi'nereno remsa hurmantegeta, ana tvi'kura osasi'a knafi tmagu'a musena hu'naze.
36 Hianagi Nagrama hanua navu'navamo'a, Joni'ma hu'nea avu'avazana agtere'ne. Na'ankure Nenfa'ma nami'nea eri'za Nagra eri vgaresnugu e'nerue, ana eri'zama e'nerua eri'zamo, Nagrira eriama hugahie, na'ankure Nfa'nimo hunantege'na e'noe.
37 Nenfa'ma hunantege'na Nagrama e'noana, Nagriku huama Agra hu'ne. Hianagi tamagra mago'a knarera Agri agerura ontahitma, avugosa onke'naze.
38 Agri nanekemo'a tamagri tamagu'afina omne'ne, na'ankure Agrama hunantege'na Nagrama e'nogura, tamagra tamentintia Agritera nosaze.
39 Tamagra Anumzamofo avontafepi nehakraze, na'ankure tamagra mani'vava mani'zana hago eri'none hutma nentahize. Hianagi e'i ana avontafemo'a Nagriku huama nehie.
40 Hianagi Nagrite'ma e'netma tmasimu eri'zankura tamagrira tamavesra nehie.
41 Nagrira vahe'mo'za nagi erisaga (glori) hihogura nosue.
42 Hianagi Nagra tamagrira tamage'noe, Anumzamofo avesinte'zana tamagri tamagu'afina omne'ne.
43 Nagra, Nenfa agifi e'nogeta tamagra nonavraze, hagi mago'mo agra agire'ma esnimofona ame huta avregahaze.
44 Tamagra inankna huta tamentintia hugahaze, tamagri'ma ru vahe'mo'za tmagima erisaga nehazana, magoke Anumzamo tmagri'ma muse hurmante'sia zankura ohakre'gahazo?
45 Nefante naneke hurantegahie hutma Nagrikura tamagesa ontahiho, kema hurmantesia nera Mosese'e, Mosesete tamagu'a antetma tamentintina hu'naze.
