4 Galilima vunakura Samaria mopa kazigati nevza kantega rugitgino vu'ne.
5 Anante Samaria mopa kaziga nevuno, ana mopafi mago kuma agi'a Saikar nehazare uhanati'ne. Korapara Jekopu'a ana mopa tva'oma'are me'nea mopa, Josefena ami'neane.
6 Ana kuma tva'onte Jekopuna tinkeri'a me'ne. Hagi Jisasi'a kama e'nea zamo avesra higeno ana tinkerire umanigsa hu'ne. Feru avame zgeha higeno anante umani'ne.
7 Anante mago Samaria a'mo ti afinaku ana tinkerire egeno, Jisasi ana a'mofonku, Tina afi namio
8 huno hune. Na'ankure Agri amage nentaza disaipol nagara ran kumategati ne'za mizasenaku zamagra vu'nazageno mani'neno hu'ne.
9 Anage higeno ana Samaria a'mo Jisasinku huno Kagra Jiu ne' mani'nananki nahigenka Samaria a' monagura, tina afi namio hunka nantahi'negane? (Na'ankure Jiu vahe'mo'za Samaria vahe'enena tragote'za nomnize.)
10 Jisasi'a ana ke nona'a asmi'ne, Anumzamo negamia musezama antahi'nenkasina, iza'o kantahigeno kagriku'ma, tina afi namige'na na'neno nehia ne'ma kagra antahigankeno, Agra asimu eri tina kamisine.
11 Ana a'mo Agriku huno Ra ne'moke Kagra tima afisana tafena e'ori'nankeno tinkerimo'a zaza huno urami'ne. Hagi Kagra igati ana asimu eri tina afigahane?
12 Jekopu neragehona Kagra agterenka onaga'a mani'nampi? Na'ankure agra ama tinkeria tamine, agra ana tinkerifinti nenege'za, mofavre naga'amozane afu'zga'amoza ne'naza tine.
13 Jisasi'a ana a'mofo ke nona'a huno asmi'ne, Maka'mo'za ama tima nesnuza ete ru'ene tinkura zamesigahie.
14 Hianagi izano Nagrama amisua tima nesuno'a, mago'ene tinkura ave'osigahie. Hianagi Nagrama aminaku nehua timo'a, kampu'i timo hiaza huno agu'afi me'neno, evava nehuno manivava asimu amigahie.
15 Ana a'mo Agriku amanage hu'ne, Ra nemoka, ana tina namigeno, nagrira tinkura nave'osisige'na tima afi'zantera afetera oma'neno, huno hu'ne.
16 Agra ana aku huno, Vunka, negvena ome ke hunka avrenka amare eno.
17 Ana a'mo kenona'a huno asmi'ne, Nagra ve onte'noe higeno, Jisasi ana ara asmine, kagra vema onte'noe hunkama nehanana tamage hunka nehane,
18 na'ankure kagra kotenka 5fu'a ve eri'nane, hagi menima kagrane mani'nea vea negve'a omni'ne. E'igu kagra tamage hunka nenasmine.
19 Ana a'mo Agrira asmino, Ra nemoke, nagrama negagoana Kagra mago kasnampa ne' mani'nane.
20 Tagri tfahe'za ama agonafi monora hunte'naze. Jiu vahe'motma Jerusale kumateke monora huntegahaze hutma tamagra nehaze.
21 Jisasi'a amanage huno ana ara asmi'ne, Ama a'moka, kema hanua kerera kmentinti huo, mago kna ne'eankino efore'mahina, ama agonafino, Jerusale kumatero tamagra Nerfantera monora huontegahaze.
22 Tamagra ontahi'naza zante monora nehaze, tagra antahi'nona zante monora nehune. Na'ankure vahe'ma zamaguvazizana Jiu vahe'motafi me'ne.
23 Hianagi mago kna ne-ea knamo'a hago menina ama fore hu'ne. Nenfama tamage mono hunteku hanamo'za, avamupi tamage avu'avateti monora huntegahaze. E'inahu hu'za mono'ma huntesaza vaheku Nenfa'a nehakre.
24 Na'ankure Anumzana Agra Avamure, hu'negu mono'ma hunteku hanamo'za, zamagra zamagu'areti avamuzmifi tamage monora huntegahaze.
25 Ana a'mo Agrira amanage huno asmi'ne, nagra antahi'noe Mesaia'a (tazahu ne') egahie, (Kraisi'e hu'zama agima ante'naza nera), ana ne'ma esnuno'a, maka'zana tasmi ama hanigeta antahi'gahune.
26 Jisasi'a ana ara asmino, ama nanekema nehua ne'mona ana ne' Mesaia'ne.
27 Anage nehakeno Jisasi amage' nentaza disaipol nagara anante enehanatiza, ana a'ene naneke nehige'za antri nehu'za hakare antahintahi hu'nazanagi, nazanku nehakre huge, nazanku a'ene kegaga nehie? Hunora mago'mo'a antahi onke'ne.
28 Anante ana a'mo tinkvo'a netreno, rankumatega viazamo vene'ne zga ome zamasmino,
29 Eta eme keho, maka'zama hu'noa zanku'ma huama huno nasmi'nea nera, Kraisi'ema hu'naza ne' e'negahie?
30 Ome zamasmige'za, rankumara atre'za zamagra atirami'za Agritega e'naze.
31 Vahe'ma zamarenaku vu'nege'za amage nentaza disaipol nagamo'za Jisasina tutu hunte'za, hurami ne'moka (Rabbai), ne'zana no hu'naze.
32 Hianagi Jisasi'a zamasmi'no, Nagrama nesua ne'zama me'neana tamagra onke'naze, huno zamasmi'ne.
33 Anage hige'za amage nentaza disaipol nagamo'za, ke ohumi ahumi nehu'za, zamagra hu'za mago'mo ne'zana eme amigeno ne'neno Agra nehifi?
34 Jisasi amanage huno zamagrira zamasmi'ne, Nagri ne'zana aza'o hunantege'na e'nomofo avesite eri'zama'a eri vgare snugu hunantege'na e'noe.
35 4'a ika maniteta tamagra hozama hamre kna me'ne huta nosafi? Nagra neramasmuanki keho, kesga hutma hozafina tmua keho, ne'zamo afureno ta'nefa ruherafino hoza hamre kna kofta nehie.
36 Ana ne'zama hamre'namo'za hago mizazamia knare hu'za eri'naze. Hagi ana rga'ama hamre'nazana manivava mani'zante vahera zamare'za vu'naze, ana nehina aza'o hozama hankresnimo'ene, hozama hamresi'mokea, znagu'a musena magoka hugaha'e.
37 Na'ankure ama ana nanekea tamage ke me'ne. Mago'mo hoza hankretegeno, rumo hoza nehamre hu'za nehaze.
38 Tamagra zamaza hutma avimzana ose'naza hozafi Nagra huneramantoe, rumo'za amuho hu'za eri'za hankre'naza hozafi, tamagra ne'za hamre'sagu huneramantoe.
39 Samaria rankumateti hakare vahe'mo'za Agrite zamentinti hu'naze. Na'ankure ana a'moma huama hu'negu maka'zama nagra ko'ma hu'noa zana, Agra huama hunante'ne.
40 E'inage hige'za, Samaria vahe'mo'za Jisasinte e'za, tagrane manigahane hu'za hanaveti'za antahigageno, Agra tare zgegna zamagrane mani'ne.
41 Jisasi'ma zamasmia ke nentahi'za, hakare'a ontahi'naza vahe'mo'zane zamentinti hu'naze.
42 Zamagra ana ara amanage hu'za asmi'naze, kagrama hana kegukera tamentinti nosune, hagi tagra tagesafinti antahita tamentinti nehune. Agra tamage maka kokankoka vahemota tzahu nere.
43 Tare zge knama maniteno, Jisasi'a ana kumara atreno Galili vu'ne.
44 Na'ankure Jisasi'a Agra'a huama huno, Kasnampa (profet) vahe agi'a mopa agafa'arera erisaga osugahaze huno hu'ne.
45 Hagi anante Galilima ehanatige'za, Galili vahe'mo'za Agrira muse hu'za avare'naze, na'ankure Jerusale kumate kinafinti zamare'nea muse ne'za ne'knarema (pasova) Agrama maka'za hige'za ke'nagure. Zamagranena kinafinti zamare'nea muse ne'za ne knarera (pasova) Jerusale vu'neza ke'nareti muse hunte'naze.
46 Ana hzageno Kana Galili kaziga, tinteti waini'ma trohu'nea kumate eteno e'ne. Anante mago kamani eri'za ne'mofo mofavre'mo Kapenium kumate kri erino mse'ne.
47 Jisasi'a Judia atreno Galili kaziga ehanatia kema nentahino'a, kri eri'nea mofavre'mofo nefa'a Agrite viazamo asuragi kefinti, enka mofavre ni'a eme azeri so'e huo huno nemofo'a fri'kante mse'negeno antahige'ne.
48 Anage higeno Jisasi'a asmino, avame'zane kaguvaza hanuazana ketetage'za, tamagra tamentintia hugahazo!
49 Ana kamani eri'za ne'mo Jisasinku huno, Ramoke mofavreni'a frisanigi ko eramio.
50 Jisasi ana ne' asmino, nonkarega vuo, negamofo'a ofrino amne mani'ne. Ana ne'mo tamage Jisasi'a nehie huno amentinti nehuno atreno ete noma'arega vu'ne.
51 Atreno kantega uneramige'za, kazokzo eri'za vahe'amo'za eme asmi'za, negamofona kri'a atrentegeno mani'ne hu'za eme asmi'naze.
52 Anagema hu'za asmizageno kri'ama atrente'nea knagu zamantahigege'za zamagra asmi'za, okina wan kiloki higeno avufa teve hazamo'a atrente'ne.
53 Anagema nehzageno nefa'a agesa antahi'ne, Jisasi'a ana knareku huno, Negamofo'a ofri amne mani'ne huno hu'ne, nehuno agrane noma'afi nemniza naga'ane, maka'moza zamentinti hu'naze.
54 Ama'i ru'ene Jisasi'ma avame'za tro higeno'a, Agra Judia kazigama atreno Galili ehanatia knafina tare avame'za tro hu'ne.
