1 Pusa zgegna Sonta zupa msa osu'negeno, ko'atu hanimpi Magdala kumateti Maria, Jisasi asente'naza kerirega kenaku uhnatino ome keana, ana keri agite runknire'naza havea ko atufe atre'negeno ome ke'ne.
2 Ome keama agite renkanire have retufe atre'nageno, ete rukrahe huno agareno eno Saimon Pitane, mago amage nentegeno Jisasi avesi'nentea disaipoli ne'ene eme znasmi'ne. Ramofo fri'kerfa'a kerifintira hago erisaga hu'za iga Agrira ome ante'nafi onke'none.
3 Zanasamige'ne Pita'ene mago'ma amage' ante'nea disaipoli ne'ene ana keri ome kenaku vu'na'e.
4 Tarega'moke znaga re'ne nevapinti, mago'ma amage' ante'nea disaipol ne'mo, Pitana agtereno kagota huno asente'naza havegantera uhanati'ne.
5 Uhnatino upri huno ome keana anoma vazinte'naza tavrave (linen) anante me'negeno ke'ne, hagi agra ana havegamofo agu'afinka umre ori'ne.
6 Anante Saimon Pita'a amage'a ne-ereti ehnatino ana havegampi evumareri'ne, marerino ome keana avufare karagi'naza tavrave anantera me'negeno ke'ne,
7 avugosafi tavravene Jisasi anunte karaginte'naza tavravene, avufare karaginte'naza tavravenena, omne'negeno ke'ne. Hianagi avugosafi tavravea regazri'za rure antageno me'negeno ke'ne.
8 Anante amage nentea disaipoli ne'ma ese'ma kerire ehanati'nemo, mrerino ome negeno tamage huno amentinti hu'ne.
9 Na'ankure Anumzamofo avontafepima Jisasi friteno otigahie hu'naza nanekea, zamagra antahi ani osune'za ana hu'naze.
10 Ana huteke tarega amage' nenta'a disaipol ne'tremoke, noznirega atre'ne vu'na'e.
11 Hianagi Maria'a fegi'a ana havegante oti'neno zvi neteno mani'ne. Zavi netereti pri huno ana have kamofo agu'afinka keana,
12 tare ankero netremoke efe kukena hute'ne mani'nakeno, Jisasima antemse'nare znage'ne, mago'mo agama me'nea kaziga manigeno, mago'mo asenima me'nea kaziga manigeno hu'na'e.
13 Znagra ana a'mofonku amanage hu'na'e, Ama a'moka na'anku zvira netane? Maria ke nonaznire huno, na'ankure Ranimofona inantega eri'za vu'nazo, inantega ante'nazo nagra ontahi'noe.
14 Anagema a'mo huteno rukrahe'ma hiana, Jisasi anante oti'negeno keanagi, Jisasi'e huno ontahi'ne.
15 Jisasi ana a'ku huno, A'moka na'anku zavira netane? Azanku nehakrane? Na'ankure ana a'mo antahiana hoza kva nehia nere nehuno Agriku hu'ne, Kva vahe'moka, Jisasina inante ome ante'nampi naveri hananke'na Agrira ome eri'na vugahue
16 Jisasi ana a'ku hu'ne, Maria! Higeno a'mo rukrehe huno Jisasinku Hibru kefinti, Rabonai! (ana kemofo agafa'a Hibru kefina Hurami ne're) hu'ne.
17 Jisasi'a ke nona'a huno, Nagrira eme navako osuo, na'ankure Nenfantega mreori'noe, hianagi vunka nafu'heina ome zamasmio, Nagri'ene tmagri'ene Nerfante, Nagra mrerigahue. Nagri Anumzane tmagri Anumza mani'nerega, vugahie hunka ome zamasmio,
18 Magdala kumateti Maria'a ete rukrahe huno eazamo, amage' nentaza disaipol naga'a eme zamasmino, Nagra Rantimofona ke'noe! Ana a'mo Jisasi'ma hu'nea ke eme zamasmi'ne.
19 Ana zupa kinaga, eri'za knamofona ese zupa Sonta, haninkige'za amage nentaza disaipol naga'mo'za Jiu kva vaheku zamagoro hu'za kafa eri ki'za no agu'afi mani'nageno, Jisasi eazamo amu'nozmifi eme otino zamagriku anage hu'ne, Tamarimpamo fru hino, huno zamasmi'ne.
