10 Hu'neanagi mago'mo hanimpima vanuno'a ome traka hugahie, na'ankure msa agripina omne'ne.
11 Anagema huteno, mago'ene Jisasi'a anage hu'ne, ronetimo Lasarusi'a avu mse'ne, hianagi menina Nagra ome azeri otigahue.
12 Amage nentaza disaipol nagamo'za anage hu'naze, Ramoka, agra avu'ma mse'nesuno'a, knare hugahie.
13 Jisasi'ma hu'neana, Lasarus ko fri'nea zanku hu'neanagi, zamagrama antahizana amne avu mse'zanku nehie hu'za antahi'naze.
14 Jisasi'a anante huama huno zamasmi'ne, Lasarusi'a ko fri'ne,
15 Tamagri tamaza hanigu Nagra muse nehu'na, ana kumatera omni'noe, e'ina hanigeta tamagra tamentinti hugahaze. Hianagi erinketa agritega vamneno.
16 E'ina hianagi Tomasi (Didimasi'e hu'neana kugavezare) nehaza ne'mo, magoka Jisasi amage nentaza disaipol nagaku huno, tagranena erinketa vuta Agrane ufri'maneno hu'ne.
17 Jisasi ana kumate uhnatino, ome antahiana Lasarusina ko kerifi asentageno, 4'a zgegna evu'ne.
18 Betani kumara Jerusale tva'onte 3 kilo mitanaza me'ne.
19 Rama'a Jiu vahe'mo'za e'za Matane Maria kiznia, neznasaro fri'negeza e'za zname rentinti hu'naze.
20 Jisasi ne-e hia kema Matama nentahino, kantega ome kenaku vu'ne. Hianagi Maria'a nompi mani'ne.
21 Mata'a, Jisasina ome keno anage huno asmi'ne, Ramoka, Kagrama amafima mani'nantesina, nensaro Lasarusi'a ofrisine.
22 Hianagi meninena nagra antahi'noe, na'anku'ma Anumzamofo antahige'sankeno'a, Anumzamo'a anazana kmigahie.
