5 Dopa leamopa Jisasame yanu pyao, “Nambame emba etete kiningi langilyona, endakali mende endakipa Oli Sipitisa dokopame dee ŋaŋa joo manja nayatamo kandao doko, Gotenya isingi dokonya kapa pao napata.
6 Endakalimi endakaliaka mandenge. Oli Sipitisame sipitisaka mandenge.
7 Nyakama dee ŋaŋa joo mandipenge langilyo pii dutupa sepala emba mona andala nayape.
8 Poo dokome poo lao patoo lao masilyali pyoo lao pelyamopa embame poo lelyamo doko singi. Dopaka doko, angi anja pituu lelyape, anja lao pelyape lao nakandenge. Dokotekee joo, Oli Sipitisame mandelyamo endakali dupa pitaka mendai dopaka pingina,” lea-pyaa.
9 Dopa leamopa Nikotimasame yanu pyao, “Leleno dupa aipa petala kapa pao pitape?” lea-pyaa.
10 Jisasame yanu pyao baa lamaiyoo, “Emba Isataelemanya mana lenge akali doko embame pii dutupa masala naelepe?
11 Nambame emba etete kiningi langilyona, naimame masingipi kandengepi dupaka nyakama langipumanopa, pii langipumano doko nyakamame nyala naelyamino.
12 Nambame nyakama yuunya mana dupa langipupa masoo minala naelyamino doko kaitinya mana dupa langito kandao doko, aipa petala masoo minatamipi?
13 Endakali mendaipi mende kaiti-kisa napea. Napeamoaka doko, Endakalinya Ikiningi kaiti-kisa katao isa epeamo doko iki pea.
14 “Wamba Moseseme endakali napalenge yuu dokonya kanopato doko minalyia-pyomo mendai dopaka pyoo Endakalinya Ikiningi doko minalyepenge.
15 Baa lao masoo minata endakali doko pitaka lete etete katena lao dopa pipenge.
16 Dopana, Goteme yuunya endakali dupa etete auu kayamo dokome kapa lao baanya Ikiningi mendai iki doko maiya. Doko lao masoo minatamino endakali doko pitaka alu napyoo lete katawaka katataminopa lao maiya.
17 Goteme baanya Ikiningi dokome yuunya endakali dupa-kisa tenge setena lao yuunya pena laa naya. Daa, yuunya endakali dupa pyoo nyina lao pena lea.
18 Baa lao masoo minilyamo endakali doko-kisa baame tenge setala naenge. Baa lao masoo minala naelyamo endakali doko-kisa baame tenge setapae katenge. Doko, baame Gotenya Ikiningi mendai iki doko lao masoo minala naelyamosa dopa pingi.
19 Tii pipae doko yuunya ipateamoaka doko, endakalimi mana koo miningima dokome tii pipae doko auu nakaenya, iminjetae doko auu kayamino dokonya dupa-kisa tenge setapae kalyamo.
20 Mana koo miningi endakali doko pitakame tii pipae doko yanda pimaiyoo tii pipae dokonya napenge. Doko, aopyoo latala baanya mana miningi dupa tii pipae dokome panasakatame lao napenge.
21 Dopaka doko, kiningi mana miningi endakali dokome Gote-pipa pakatae katao mana minilyamo dupa endakalimi kandena lao tii pipae dokonya pengena,” lea-pyaa.
22 Maitakao Jisasa baa baanya disaipele dupa-pipa Jutia yuu dokonya pea. Pupala yuu dokonya yuu gii mendatupa dupa-pipa katapala endakali dupanya kaimbu pyakamaiya.
