19 Tii pipae doko yuunya ipateamoaka doko, endakalimi mana koo miningima dokome tii pipae doko auu nakaenya, iminjetae doko auu kayamino dokonya dupa-kisa tenge setapae kalyamo.
20 Mana koo miningi endakali doko pitakame tii pipae doko yanda pimaiyoo tii pipae dokonya napenge. Doko, aopyoo latala baanya mana miningi dupa tii pipae dokome panasakatame lao napenge.
21 Dopaka doko, kiningi mana miningi endakali dokome Gote-pipa pakatae katao mana minilyamo dupa endakalimi kandena lao tii pipae dokonya pengena,” lea-pyaa.
22 Maitakao Jisasa baa baanya disaipele dupa-pipa Jutia yuu dokonya pea. Pupala yuu dokonya yuu gii mendatupa dupa-pipa katapala endakali dupanya kaimbu pyakamaiya.
23 Joneme apata Selima tengesa Ainone yuu dokonya endakali dupanya kaimbu pyakamaiyaka. Yuu dokonya endaki longo epeamosa Jone baa dokonya kateamopa endakali dupa baa kateasa epeaminopa dupanya kaimbu pyakamaiya.
24 (Jone anjetala nayaminopa dopa pia.)
25 Yonge kaimbu pingi dokonya lao Jonenya disaipele dupa-pipa Juta mendepinya kainanya pii mende yaka lea.
26 Dokopa dupame Jone kateasa pupala baa lamaiyoo, “Mana Lenge Akali, wamba akali mende embapa awapa endaki Jotane omotena kateambinopa, embame baanya lao pii lao paneeno akali dokome endakali dupanya kaimbu pyakamaipumopa, endakali pitaka baa-kisa pelyaminona,” leami-pyaa.
27 Dokopa Joneme yanu pyao, “Gote dokome opale mende endakali mende maiya nayatamo kandao doko, tangeme kapa pao nanyeta.
28 ‘Namba Kataisa doko daana akali doko ipatana lao namba wambao Goteme puu leana,’ leo doko nyakama tangeme masilyamino.
29 Akali mendeme enda mende kelyapelyamo dokopa enda doko baanya etanengena lao petenge. Dopaka doko, akali dokonya kaita miningi dokome tengesa dosa katao enda lanyetamo akali dokonya pii sepala, baa mona yaepenge dokotekee doko namba etete mona yaepelyo.
30 Baa etete alyasale joo katatamopa namba etete anasale joo katapengena,” lea-pyaa.
31 Ketae katao epeamo akali doko dupa pitakanya alyasale. Yuunya akali doko baa yuunya endakali dokomena yuunya dupanyaka lenge. Kaitinya katao epeamo akali doko dupa pitakanya alyasale.
32 Baame kandeapi siapi dupa lamaipumopa pii lamaipumo doko endakali mendeme nyoo minala naelyamo.
33 Baanya pii doko nyoo miningi endakali dokome Gote kiningina lao laitaka pingi.
34 Goteme pena leamopa epeamo akali dokome Gotenya pii doko lamaingi. Doko, Goteme baanya Sipitisa doko kuki kuki lao maiya nayao pitaka maingi.
35 Takange dokome Ikiningi doko auu kayapala dupa pitaka baanya kingilyaka setea-pyaa.
36 Ikiningi doko lao masoo minilyamo endakali doko lete etete kalyamo. Ikiningi dokonya pii watao naminilyamo endakali doko lete nakatata. Endakali dopale doko-kisa Gotenya imbutongo mandenge doko sulu soo singi.
