6 Baame dokaita lamaiyoo, “Nyakamame wapaka nyingi mandi doko sipi dokonya kingi tolae-kaita pyandataminopa wapaka nyalaminona pyandalapa,” lea. Leamo dosa pyandateaminopa wapaka longo paleamo dokome mandi doko pyalya lao nyepenge nanjia.
7 Jisasame auu kaenge disaipele dokome Pita lamaiyoo, “Doko Kamongo lamona,” lea. “Doko Kamongo lamona,” leamo pii doko Pitame sepala baanya yonge pee lyokanya setapala kateamo dokonya dee yonge pee nyoo peta matapu peta petala baa endaki pete dokonya mangau lea.
8 Disaipele yangi dupa sipi dokonya pituu wapaka paleta mandi doko pyalya lao nyoo soo peami. Dupa endaki pete dokonya netesa joo kateami. Yandate paa lapomasapi mende pyale lapenge joo kateami.
9 Dokaita netesa pyakayatala kandeaminopa itate mende teamo dokonya wapaka mende yangatae kateamopa betesa mende sia.
10 Dokopa Jisasame dokaita lamaiyoo, “Wapaka epapu nyalamino dokonya mendapua nyoo ipupa,” lea.
11 Saimone Pitame sipi dokonya pyakalyetala wapaka paleta mandi doko pyalya lao nyoo soo netesa epea. Mandi dokonya wapaka andake andate mendai-kisa dee kingi ita yuungi palipala wakao tepoma palea. Wapaka dokaita longo paleamoaka doko, mandi doko lapyala naya.
12 Dokopa Jisasame dokaita lamaiyoo, “Nee nala ipupa,” lea. Dopa leamopa disaipele dupame paka kayapala dupanya mendaipi mendeme emba apipi lao pisala nayami. Doko dupame Kamongo doko lamo lao kandeami.
13 Jisasame ipupala betesa doko nyoo dokaita maiya. Baame wapaka doko dopaka pyoo dokaita maiya.
14 Jisasa baa malunya sakatatala indupa paa tepo pyoo baanya disaipele dupa-kisa panea.
15 Nee napao pituu Jisasame Saimone Pita lamaiyoo, “Jone ikiningi Saimone, embame dakaita ita minao namba auu kaelepe?” lea. Pitame baa lamaiyoo, “Kamongo, kini nambame emba auu kayapupa embame kandeleno doko,” lea. Dokopa Jisasame baa lamaiyoo, “Embame nambanya sipisipi yakane dupa nee maiyakape,” lea.
16 Paa lapo pyoo Pita pisoo, “Jone ikiningi Saimone, embame namba auu kaelepe?” lea. Baame yanu pyao, “Kamongo, kini nambame emba auu kayapupa embame kandeleno doko,” lea. Jisasame baa lamaiyoo, “Embame nambanya sipisipi dupa setao katakape,” lea.
