Jon 9:3-15

³Ma Jisas ke velera, “Imanea ke doa, boi eigna na komi paluhagna ghehegna ba na komi paluhadia a tamagna ma idogna. Imanea ke doa eigna a God keda tateli au nigna na mana kori vido keda hathea imanea.

⁴Kori vido ke dani mua, ati eia na agutu nigna ahai ke vetulau mai. Kari na bongi ke gharani mai ghohi ke boi tangomana sa tinoni keda eia sa agutu.

⁵Kori vido inau ku mono mua kori maramagna, inau na raraha tadia na komi tinoni kori maramagna.”

⁶Leghugna ke velea iangeni, a Jisas ke angusu horu kori thepa me ngignoa na angusugna duagna na thepa me pila. Gi e havula kori matagna na mane ke doa.

⁷Gi e veleagna, “O vano mo daudanu kori maha i bea kena kiloagna Siloam.” (Na ghaghana koragna Siloam, ‘vetula vanoa’). Imanea ke vano me daudanu kori bea iangeni, mi kori vido ke tabiru kori vathegna, na matagna ke toke.

⁸Na komi tinoni kena mono kori melehagna, ma arahai kena reghia kori vido ke kaekae rongo, imarea kena veihuahuatighi vaghagna iaani, “Ehava? Iaani na mane ke doa ke nohe me kakae rongo i hau?”

⁹Kekeha kena velea, “Hii, imanea hiri.” Kekeha kena velea, “Teo, kari na dodorogna imanea ke haga nanaba tagna na dodorogna na mane iangeni.” Ma na mane ke kaekae rongo i hau ke velea, “Inau hiri na mane iangeni!”

¹⁰Imarea kena huatiagna, “Na hava ke padagho gi o dodoro ikeagaieni?”

¹¹Imanea ke anira, “Na mane kena kiloagna Jisas ke hatia na thepa me havula kori matagu. Gi e veleu eigna kuda vano daudanu kori maha i bea i Siloam. Inau ku vano mu daudanu kori bea iangeni, gi e toke na matagu!”

¹²Gi ena huatia mua, “Ivei na mane iangeni?” Imanea ke velera, “U bosi adoa.”

¹³Gi kekeha tinoni kena hati vanoa na mane iangeni tadia mara na Farise.

¹⁴Na dani a Jisas ke havula na thepa kori matagna na mane iangeni me vatokea, na Sabat.

¹⁵Kori vido mara na Farise kena adoa iangeni, imarea kena huatia na hava ke pada gi e tangomana na dodoro. Imanea ke anira, “Imanea ke havula na thepa kori matagu. Gi u vano mu daudanu, mi keagaieni inau ku tangomana na dodoro.”