12 E Iesu i warwara ulak tetek a taraila, pa i atongi mange, “Iau a talapor anuna rakrakan hanua. Esining i mur iau, bel ir han ting na mormorom, ika ir kibas a talapor ana lalaun.”
13 A Parisaiola la atai i mange, “Anum a warwara talapor hom bel i mamahat, anasa u ot u warwara.”
14 Pa e Iesu i keles la mange, “Ning iau ot a warwara talapor hok, anuka warwara talapor i momol, anasa iau ot a tasman a hanua ning a han taguni, pa hanua ning ar han suri. Ika mulo, bel mulo tasman a hanua ning a han taguni, pa hanua ning ar han suri.
15 Mulo, mulo warkurai ka ana warkurai anuna taraila, ika iau bel a warkurai tik.
16 Ika ning ar warkurai, anuka warkurai ir tostos, anasa bel iau ka a toli, miau ot ma e Tata, ning i sune iau ute.
17 Di ka tumus tari ana numulo a warkurai mange, ‘Ning a warwara anuna naur i arlar ka ana ta utna, anundiau a warwara i momol.’
18 Iau ne a warwara talapor hok, pa e Tata ning i sune iau ute, i otleng i warwara talapor hok.”
19 La dekeni mange, “E tamam kanaha?” E Iesu i keles la mange, “Bel mulo tasman iau, pa bel mulo tasman otleng e Tata. Ning mulor tasman iau, io, mulor tasman e Tata otleng.”
20 E Iesu i atong a warwarala ne ting na rumai a artabar, ana pukna ning di sira suah mani na artabar ono. Ika bel tik i tong akesi, anasa anuna taem belot i sot.
21 E Iesu i atai ulak a taraila mange, “Ar han kusun mulo, mulor tai sur iau, pa mulor mat taum ana numulo na toltol laulaula. A hanua ning ar han suri, bel mulor han lar pas tingia.”
22 Dingla na Juda la atongi mange, “Asa kamkamna ning i atongi mang, ‘A hanua ning ar han suri, bel mulor han lar pas tingia’? Ngandek ir umkol pasi ma?”
23 E Iesu i keles la mange, “Mulo mite lapiu, pa iau, misaot. Mulo mite na rakrakan hanua, iau bel mite na rakrakan hanua.
24 Ine a kamkamna ning a atai mulo mang mulor mat ana numulo na toltol laulaula. Ning bel mulo tortorot hok mang iau ot ne, mulor mat taum ana numulo na toltol laulaula.”
25 Pa la dekeni mange, “Esi u?” E Iesu i keles la mange, “Ia ka atai tar mulo turpasi ana nuk a titol, tuk onone.
26 A galis a utna ar atongi o mulo ning ar warkurai mulo onoi, anasa esaning i sune iau i momol, pa iau, a atai ka a taraila ana rakrakan hanua ana sa ning a longori tana.”
27 Bel la tasmani mang e Iesu i warwara tetek la o e Tamana.
28 Pa e Iesu i atongi mange, “Ning mulor rakan kas a Nat a Barsan usaot, mulor tasmani mang iau ning, pa mulor tasmani otleng mang bel a tol ta utna ana nuknukik, e Tata i asaer iau ana sa ning a atongi.
29 Esaning i sune iau i kes taum hok, bel i han kusun iau, anasa a sira tol asaning i gas onoi.”
30 A galis ning la longor a warwarala ne, la tortorot o e Iesu.
31 E Iesu i atai a Judala ning la tortorot onoi mange, “Ning mulor kibas anuka asasaerla, mulo anuk na tarai a asasaer momol.
32 Pa mulor tasman a momolna, pa a momolna ir alangolango mulo.”
33 La keles e Iesu mange, “Mila na tumtubuna e Abaram, bel mila titol lar a tena titol orosla tana tik tuk onone. Asa kamkamna ning u atongi mang a momolna ir alangolango mila?”
34 E Iesu i keles la mange, “A atong momoli ta mulo, la rop ning la tol a laulauna, la na tena titol oros ana laulauna.
35 A tena titol oros tetek ta kabaitamana, bel ir kes tikin tetek la, ika i naur a suana ning ta natundiau, i ning tagun diau momol.
36 Ning a Nat e God i alangolango mulo, mulor langolango momol.
37 A tasmani ot mang mulo na tumtubuna e Abaram. Ika ne, mulo sang sur mulor umkol iau, anasa anuka warwara bel i kes o mulo.
38 A warwara ana sa ning a oroi ta e Tata, pa mulo otleng, mulo tol asaning mulo longori ta e tamamulo.”
39 La kelesi mange, “E Abaram a tamamila.” E Iesu i keles la mange, “Ning e Abaram a tamamulo momol, mulor tol asaning i toli.
40 Mulo mang sur mulor umkol iau, anasa a atai mulo ana momolna ning a longori ta e God. E Abaram bel i tol ta utna larne.
41 Mulo, mulo tol ot a titolla ning a tamamulo i toli.” La keles e Iesu mange, “Bel di agon oros mila ka ting na ngas, tamamila ot e God.”
42 E Iesu i atai la mange, “Ning e God a Tamamulo, io, mulor mang sur iau, anasa a hanot tagun e God, pa ne a kes te. Bel a hanot ana nuknukik, i ot i sune iau.
43 Sur asa ning bel mulo tasman lalan anuka warwara? Anasa bel mulo longor lar pas asaning a atongi.
44 E tamamulo e Satan, pa mulo mang ot sur mulor mur na nuknukna. Tagun nating ot, i a tena umkol a taraila, pa bel i tasman a momolna, anasa bel ta momolna i kes onoi. Ning i asasongo, i warwara ana nuna warwara momol ot, anasa i ot a tena asasongo pa a tamana asasongo.
45 Bel mulo tortorot hok, anasa a atong a momolna.
46 Esi o mulo ir arup sot pas iau ana ta laulauna? Ning a atong a momolna, i mangasa ning bel mulo tortorot hok?
47 Esining ane God i longor a warwarala ane God. Ika mulo, bel mulo longori, anasa bel mulo ane God.”
48 Dingla na Juda la atai e Iesu mange, “Mila tasman momoli mang u a te Samaria, pa a mot kaning hom.”
