Jon 7:43-49

⁴³Io kaik, ira matanaiabar diet gom tur harpaleng wara gaiene Jisas.

⁴⁴Ari ta diet ga wara palpalim kawasei, iesen taie tikai pa ga sigirei.

⁴⁵Io, ira umri ing diet la harbalaurai tano tamat na hala na lotu diet ga tapukus taar ta ira tamat na ut na pakila lotu ma ira Parisi. Ma ira lualua diet ga tange ta diet, “Warah muat pai lamus ie?”

⁴⁶Ma ira umri diet ga balu diet bia, “Taie tutun at bia tikai i la iangianga ho iakan ra tunotuno.”

⁴⁷Ma ira Parisi diet ga tange balik ta diet, “Pai lamus habato muat mah, naka?

⁴⁸Muat pai lik mah bia tari lualua ma bia tari Parisi diet nurnur tana, naka?

⁴⁹Taie! Sen bia iakan ra tamat na matanaiabar mon diet te gil huo. Iesen diet pai nunure ira harkurai tane God. Kaik God i te tule bingbing diet.”