39 Bia Jisas ga ianga huo, ga tange nuruan no Halhaliana Tanuo bia diet ing diet ga nurnur ta Jisas diet na hatur kawase ie. Ta iakano pakana bung God pa ga tar baak no Tanuo kanong no minarine Jisas pa ga hanuat puasa baak.
40 Ma bia ari ta ira matanaiabar diet ga hadade ing ga tange huo, io, diet ga tange bia, “A tutun, iakan ra tunotuno, aie at mon no tangesot nong di ga kukubus taar utana.”
41 Ari a mes diet ga tange, “Aie no Mesaia.” Ma ari at baak diet ga tiri bia, “No Mesaia na hanuat hohe me Galili?
42 Pai haruat huo kanong ira pakpakat ta God i tange bia no Mesaia na hanuat tano huntunaan ta Dawit. Ma na hanuat meram Betlehem, no taman tane Dawit.”
43 Io kaik, ira matanaiabar diet gom tur harpaleng wara gaiene Jisas.
44 Ari ta diet ga wara palpalim kawasei, iesen taie tikai pa ga sigirei.
