30 I mo ra a kum te Juda det nemi sur det in pam ukai pasi, ikut kataio i pami, uni anun a du bung ke sot utmakai.
31 A susut tagun a kunur na taro det nurnur uni, ra det watungi lena, “A musano ri i pam tar a susut na utna na ukisin. Pepetlai, kutiro a Karisito ut ri?”
32 A kum Parisi det longoro a taro det waswasiso eno lenri un o Iesu, ra a kum lamlabino tene etabor torom o God, ma a kum Parisi, det tulu ru a kum tene tamtamabat tagun a rumu na etabor, sur det in pam ukai pasi.
33 Ra o Iesu i watungi tandet lena, “Iau kan kis suano i nin nisamot, an milet melet torom o naro ra i tulu ru iau urin.
34 Mot in sisio sur iau, ikut ka mot in sio pas iau, ma ka mot in nan lar pas kai una tamon ra an kis iai.”
35 A ramano kum te Juda det ting etetalai det lena, “A musano ri in nan mo urai, ra ka dat in sio lar pasi? Pepetlai, in nan sur a kum tamon anun a taro Grik ra anundat a taro det kis iai? Kutiro in ususeri mo a taro Grik?
36 Uni i watungi lena dat in sisio suri ikut ka dat in sio pasi, ma ka dat in nan lar pas kai una tamon ra in kis iai. Asau a kukurai ina nun a wasiso ri?”
37 A ururop na bung ina kum lamlabino bung na lotu, i a labino bung sakit. Una bung ra, o Iesu i tur ma i wasiso namin labino walngano, i watungi lena, “Osi ra i muruk, i wakak sur in nan torom iau ma in inum.
38 Osi ra i nurnur un iau, ‘a kum danim na nilaun det in sal pat tagun anun a nilaun,’ elar nami ra di sa tumus tari una Buk Tabu.”
39 Una wasiso ri, o Iesu i wasiso una Tokodos na Nion. Ka di pitari utmakai a Tokodos na Nion, uni o Iesu ke losi utmakai anun a minamar. Numur, det ra det nurnur un o Iesu, din tabor det nami.
40 Ara taro tagun a kunur na taro ra det longoro a wasiso ri, det watungi lena, “A lingmulus ut, a musano ri, i a poropet ra o God i tulu ru i urin.”
41 Ara taro kai det watungi lena, “I a Karisito.” Ma ara taro kai det watungi lena, “Awu. A Karisito ken nanpat tagitong o Galili.
42 A Buk Tabu i watungi lena, a Karisito in nanpat tagun a kabotaro anun o Dewid. In nanpat tong o Betliem, a tamon ra numugu o Dewid i kis iai.”
43 Ma a nuknukin a taro uni, ke takai.
44 Ara taro det nem na pam ukai i, ikut katutaio i tulan tar a pinino.
45 A kum tene tamtamabat tagun a rumu na etabor det milet melet, ra a kum lamlabino tene etabor torom o God ma a kum Parisi det ting det lena, “Sur asau ra ka mot dat pas o Iesu urin?”
46 A kum tene tamtamabat tagun a rumu na etabor det balu det lena, “Katutaio utmakai i ser wasiso elar nama musano ri!”
47 A kum Parisi det ting det lena, “Pepetlai, mot kai i sa ben raro pas mot?
48 Pepetlai, taio tagun met a kum mugumugu ma a kum Parisi, i sa nurnur uni? Awu!
49 A kunur na taro ri, ra det nurnur un o Iesu, ka det tasman a Warkurai anun o Moses. A kankan anun o God i sa kis un det.”
50 Ara Parisi tagun det, a risano o Nikodimas, i ra numugu i wanpat pas torom o Iesu, i watungi tandet lena,
51 “Una nundat a Warkurai, ka dat in takun oros pas taio ra ka di longoro i utmakai. Din longoro mugu tari sur din tasman asau ra i pami.”
