Jon 6:5-38 in Amanab

⁵ Afa Sisas nof fiagena afa nangwagena kaksag el ehem nangugim ambena asa Filipim sahna og, “Hanai sa bigel fane flinim hwag kaksag elim faigoiba sama ahgai?”

⁶ Afa ehe enaig esog ka Filipna oningig yuhna maia haig sihi ofefiba. Afa Sisas ati ehe anwenafeg ehe enag fane faife.

⁷ Afa Filip ehem wahigi sihina og, “Afa ka gug la gohug was gafugafegba asa kig flag afa enag kigna ka stoa nai aba flig. Afa enaig aba mas ehengelim ihlafenig mo.”

⁸ Afa ming patalfuiag el Saimon Pitana sumineg Andru kwablog luwalim nangunam asa ehe enaig esog,

⁹ “Hwa kwablog luwal afa la gohug aba sagig weti lambina afa sambaga sawag weti lambtigina. Afa enag fane mas kaksag elim ihlafenig mo.”

¹⁰ Afa Sisas enaig esona og, “Sihigonibi sama apaiye augui.” Enanai yi kaksag pos go asa 5,000 saglag enanai yi apaiye auguna.

¹¹ Afa Sisas enag aba sagig flanam asa Godim sahna og eba suialag. Afa ehe koskofenam asa el apaiye augug enag elim mangegoni. Afa ehe sawagim gwenaig esena. Afa mungwali ahgaginim ihla feskofena.

¹² Afa maia enog feskofenaba ehe patalfuiag elim sihini og, “Asa afu lamb enag fane el mas ahgag mo masa lambaitifibi awaiefe.”

¹³ Afa ehengel angogoli lambinam afa 12 pela sob yi aitini. Afa Sisas afa la gohug aba sagig koskofena afa mungwali ahgagini asa angogoli sob yi aitini afa memto la puguna.

¹⁴ Afa el enag kigmog nanguni afa enaig esogona og, “Autunam Moses sihi fwahana og Godna Mo Fli Sihiaule El hwa bite la blofe. Atiaho nufunam enag el asa blona.”

¹⁵ Afa Sisas ehengelim ati anwenafeni ehengel ogna Sisasim kehlinim asa bigelni misog el goni. Asa ehe lasanam asa hefum mog gam pese ikana.

¹⁶ Afa osupefenaba afa Sisas mas blona mo. Asa heafna patalfuiag el Galili bu blugim afunam.

¹⁷ Afa ehengel bot la augunam asa Kaperneam gam bu kwania mina afuna. Afa siokifi fenaba ehengel meyi bot yi afuiafenaba Sisas mas ehengelim ulambina mo.

¹⁸ Asa bifwat blonam afa buum waike waikefena.

¹⁹ Afa bot meyi enwesog la gohug kilomita olyi bu la gofena asa ehengel Sisasim nanguni maia bu sisi yi ehengelim nangwagigim blofenaba. Asa ehengel fwina embefini afa kig kilafeskofena.

²⁰ Afa Sisas ehengelim esoni og, “Nofeka embefi eba kikeba.”

²¹ Asa ehem awamoni afa ehe bot yi kukaganam afa gwenanam enag bot ikagna bu blug yi ika puguna mina la asa ehengel membeni.

²² Afa Sisas elim fane asa faini enanai yi ehengel askanam leana buihia gafenam afa ehefum sahwagini og, “Sisas hanai yi maia?” Afa ehengel anwenafini ehe mas heafna patalfuiag el wankai afa ming bot awai.

²³ Afa mingnag Taiberius la nai bot ambenam enanai yi apukena. Afa enanai yi Sisas Godim sahnam og, eba suialag asa fane mungwali elim faini.

²⁴ Afa ehengel anwenafini og Sisas i afa heafna patalfuiag el i wanai yi mas go mo. Asa ehengel bot yi Kaperneam gam afunam Sisasim yisigi afuna.

²⁵ Afa ehengel bot la afunam ehengam maligim apukena. Afa Sisasim enanai yi nangunim asa sahini og, “Tisa, wanai yi ansi ne blona?”

²⁶ Afa Sisas wahigi sihini og, “Ka nem nufunam sihinig, ka nengelim aba sagig faini afa ne ahgagim asa ne enam membigim asa kam ambe yisigig. Afa nengel kana kigmogim mas numwehe anwenafig mo asa ka ogfug.

²⁷ Nofeka bite nai fanem fwina oningini eba enag nogife. Afa nengelni oningig sa ne nofkenagag fanem oningini sama nengelim wahkig nofkenagag fai. Afa God kana Alag kam kanog fwahag asa ka heafna gafugag esenag asa enag fane Nufunam El nengelim faife.”

²⁸ Afa ehengel ehem sahni og, “Mangwal gafugag asa ka Godim esinifi?”

²⁹ Afa Sisas wahigi sihina og, “Enag el asa God ningihiag sa ne ehem olug oningini. Afa enaig eba Godna gafugag.”

³⁰ Afa ehengel enaig esogog, “Mangwal kigmog kagelim ogfunifi asa kagel enam nangunim nem olug oninginifi. Mangwal sa ne esefe?

³¹ Afa maia bigelni simbianinga bite behig la auguiafenaba afa aba ahgana eba seflig mana. Afa Godna mo enaig sihifeg, ‘Ehe ehengelim of la nai aba faini asa ahgana.’”

³² Afa Sisas sihina og, “Ka nem nufunam sihinig. Enag aba Moses bigelni simbianingam faini eba mango nufunam of la nai aba mo. Afa kana Alag asa nengelim nufunam of la nai aba faig.

³³ Afa Godna aba eba enag el asa of la nai pe blog asa bite nai elim nufunam nofkenagag faig.”

³⁴ Afa ehengel sahni og, “Saglag, enaig sa ne kagelim enag aba wahkig mange gonigofim.”

³⁵ Afa Sisas sihina og, “Enag aba ka nengelim sihinig eba kike. Ka elim wahkig nofkenagag faig. Afa amban ne kam nangum bloiba mas pese binilahai. Afa amban ne kam olug oningiba mas pese bu hefei.

³⁶ Afa ka nengelim sihinig nengel kana kigmog ati nangug afa mas ne kam olug oninginig mo.

³⁷ Afa mungwali el kana Alag kam faig afa enag el ka nangum ambegofe. Afa amban enaig esefe asa kam olug oningini ka ehengelim mas laginini eba awai.

³⁸ Afa ka mas kikeafena oningigim patalkui. Eba el kam heven la nai ningihiag asa ka blogim heafna sawiegim patalkui.

⁵ Afa Sisas nof fiagena afa nangwagena el numb ehem nangugim ambugona eso Filipim sahna og, “Ahana nai so bigel fane finim ohunag enaksag elim faigoiba soma ahgai?”

⁶ Afa ehe enaig esog ka Filipna oningig gihna mahim ahanaig sihi ofefiba. Afa Sisas ati ehe anwanafeg ehe enag fane faif.

⁷ Afa Filip ehem wahigi sihina og, “Afa ka kug wa gohug was gafugafegba eso kig fag afa enag kigna ka stoa nai aba fim. Afa enaig aba mas ehengelim yuhwafenig mo.”

⁸ Afa ming pahlukuiag el Saimon Pitana sumineg Andru kwablog luwalim nangunam eso ehe enaig esog,

⁹ “Ohuna kwablog luwal afa wa gohug aba sagig wesig wambina afa sambaga sawug wesig wambtigina. Afa enag fane mas enaksag elim yuhwafenig mo.”

¹⁰ Afa Sisas enaig esona og, “Sihigonibi soma apaigo augui.” Enanai yi enaksag pos go eso 5,000 kwamblo enanai yi apaigo auguna.

¹¹ Afa Sisas enag aba sagig fanam eso Godum sahna og eba lahlag. Afa ehe kukoskofenam eso el apaigo augug enag elim mimangegoni. Afa ehe sawugim gwenaig esena. Afa mungwali ahgaginim yuhwa feskofena.

¹² Afa mahim enug feskofenaba ehe pahlukuiag elim sihini og, “Eso ahu wamb enag fane el mas ahgag mo masa wambaitifibi awaief.”

¹³ Afa ehengel angoglui wambinam afa 12 pela sob yi aitini. Afa Sisas afa wa gohug aba sagig kukoskofena afa mungwali ahgagini eso angoglui sob yi aitini afa mengig wa puguna.

¹⁴ Afa el enag kigmog nanguni afa enaig esogona og, “Autunam Moses sihi wahiana og Godna Mo Fi Sihiaule El ohuna bite wa bof. Ateaho inim enag el eso bona.”

¹⁵ Afa Sisas ehengelim ati anwanafeni ehengel ogna Sisasim kikehlinim eso bigelni misog el goni. Eso ehe wasanam eso hefum mog gam piske ikana.

¹⁶ Afa osupeafenaba afa Sisas mas bona mo. Eso heafna pahlukuiag el Galili bu blugum ahunam.

¹⁷ Afa ehengel bot wa augunam eso Kaperneam gam bu nalig mina ahuna. Afa siokigfi fenaba ehengel meini bot yi ahuafenaba Sisas mas ehengelim wambina mo.

¹⁸ Eso bifwat bonam afa buum wahigi wahigifena.

¹⁹ Afa bot meini enwesog wa gohug kilomita olyi bu wa gofena eso ehengel Sisasim nanguni mahim bu sisyi ehengelim nangwagigim boafenaba. Eso ehengel hugna embefini afa kig kilafeskofena.

²⁰ Afa Sisas ehengelim esoni og, “Nofeka embefi eba kikeba.”

²¹ Eso ehem awamoni afa ehe bot yi fukokaganam afa gwenanam enag bot ikagna bu blug yi ika puguna mina wa eso ehengel membeni.

²² Afa Sisas elim fane eso faini enanai yi ehengel askanam lawam bihia gafenam afa ehefum sahigini og, “Sisas ahnanai yi mahim?” Afa ehengel anwanafini ehe mas heafna pahlukuiag el wankai afa ming bot awai.

²³ Afa mingnag Taiberius wa nai bot ambugonam enanai yi opukona. Afa enanai yi Sisas Godum sahnam og, eba lahlag eso fane mungwali elim faini.

²⁴ Afa ehengel anwanafini og Sisas i afa heafna pahlukuiag el i ohunanai yi mas go mo. Eso ehengel bot yi Kaperneam gam ahunam Sisasim yisigi ahuna.

²⁵ Afa ehengel bot wa ahunam ehengam maligim opukona. Afa Sisasim enanai yi nangunim eso sahini og, “Tisa, ohunanai yi amansi ne bona?”

²⁶ Afa Sisas wahigi sihini og, “Ka nem inim sihinig, ka nengelim aba sagig faini afa ne ahgagim eso ne enam membigim eso kam ambugog yisigig. Afa nengel kana kigmogim mas numwehe anwanafig mo eso ka wagfug.

²⁷ Nofeka bite nai fanem hugna onigini eba enag nogif. Afa nengelni oningig so na nofkenagag fanem onigini soma nengelim higeg nofkenagag fai. Afa God kana Awag kam kanog wahiag eso ka heafna gafugag esenag eso enag fane Inim El nengelim faif.”

²⁸ Afa ehengel ehem sahni og, “Mang gafugag eso ka Godum esinif?”

²⁹ Afa Sisas wahigi sihina og, “Enag el eso God ningihiag so na ehem olug onigini. Afa enaig eba Godna gafugag.”

³⁰ Afa ehengel enaig esogog, “Mang kigmog kagelim wagfunif eso kagel enam nangunim nem olug oniginif. Mang so na esef?

³¹ Afa mahim bigelni simbianinga bite bihig wa auguiafenaba afa aba ahgana eba sefig mana. Afa Godna mo enaig sihifeg, ‘Ehe ehengelim of wa nai aba faini eso ahgana.’”

³² Afa Sisas sihina og, “Ka nem inim sihinig. Enag aba Moses bigelni simbianingam faini eba mang inim of wa nai aba mo. Afa kana Awag eso nengelim inim of wa nai aba faig.

³³ Afa Godna aba eba enag el eso of wa nai pe bog eso bite nai elim inim nofkenagag faig.”

³⁴ Afa ehengel sahni og, “Amunai, enaig so na kagelim enag aba higeg mange gonigofim.”

³⁵ Afa Sisas sihina og, “Enag aba ka nengelim sihinig eba kike. Ka elim higeg nofkenagag faig. Afa aman ne kam nangum boiba mas piske biniwahai. Afa aman ne kam olug onigiba mas piske bu hefei.

³⁶ Afa ka nengelim sihinig nengel kana kigmog ati nangug afa mas ne kam olug oniginig mo.

³⁷ Afa mungwali el kana Awag kam faig afa enag el ka nangum ambugugofe. Afa aman enaig esef eso kam olug onigini ka ehengelim mas waginini eba awai.

³⁸ Afa ka mas kikeafena oningigim pahlukui. Eba el kam heven wa nai ningihiag eso ka bogim heafna sawiegim pahlukui.