Jon 6:21-65 in Amanab

²¹ Asa ehem awamoni afa ehe bot yi kukaganam afa gwenanam enag bot ikagna bu blug yi ika puguna mina la asa ehengel membeni.

²² Afa Sisas elim fane asa faini enanai yi ehengel askanam leana buihia gafenam afa ehefum sahwagini og, “Sisas hanai yi maia?” Afa ehengel anwenafini ehe mas heafna patalfuiag el wankai afa ming bot awai.

²³ Afa mingnag Taiberius la nai bot ambenam enanai yi apukena. Afa enanai yi Sisas Godim sahnam og, eba suialag asa fane mungwali elim faini.

²⁴ Afa ehengel anwenafini og Sisas i afa heafna patalfuiag el i wanai yi mas go mo. Asa ehengel bot yi Kaperneam gam afunam Sisasim yisigi afuna.

²⁵ Afa ehengel bot la afunam ehengam maligim apukena. Afa Sisasim enanai yi nangunim asa sahini og, “Tisa, wanai yi ansi ne blona?”

²⁶ Afa Sisas wahigi sihini og, “Ka nem nufunam sihinig, ka nengelim aba sagig faini afa ne ahgagim asa ne enam membigim asa kam ambe yisigig. Afa nengel kana kigmogim mas numwehe anwenafig mo asa ka ogfug.

²⁷ Nofeka bite nai fanem fwina oningini eba enag nogife. Afa nengelni oningig sa ne nofkenagag fanem oningini sama nengelim wahkig nofkenagag fai. Afa God kana Alag kam kanog fwahag asa ka heafna gafugag esenag asa enag fane Nufunam El nengelim faife.”

²⁸ Afa ehengel ehem sahni og, “Mangwal gafugag asa ka Godim esinifi?”

²⁹ Afa Sisas wahigi sihina og, “Enag el asa God ningihiag sa ne ehem olug oningini. Afa enaig eba Godna gafugag.”

³⁰ Afa ehengel enaig esogog, “Mangwal kigmog kagelim ogfunifi asa kagel enam nangunim nem olug oninginifi. Mangwal sa ne esefe?

³¹ Afa maia bigelni simbianinga bite behig la auguiafenaba afa aba ahgana eba seflig mana. Afa Godna mo enaig sihifeg, ‘Ehe ehengelim of la nai aba faini asa ahgana.’”

³² Afa Sisas sihina og, “Ka nem nufunam sihinig. Enag aba Moses bigelni simbianingam faini eba mango nufunam of la nai aba mo. Afa kana Alag asa nengelim nufunam of la nai aba faig.

³³ Afa Godna aba eba enag el asa of la nai pe blog asa bite nai elim nufunam nofkenagag faig.”

³⁴ Afa ehengel sahni og, “Saglag, enaig sa ne kagelim enag aba wahkig mange gonigofim.”

³⁵ Afa Sisas sihina og, “Enag aba ka nengelim sihinig eba kike. Ka elim wahkig nofkenagag faig. Afa amban ne kam nangum bloiba mas pese binilahai. Afa amban ne kam olug oningiba mas pese bu hefei.

³⁶ Afa ka nengelim sihinig nengel kana kigmog ati nangug afa mas ne kam olug oninginig mo.

³⁷ Afa mungwali el kana Alag kam faig afa enag el ka nangum ambegofe. Afa amban enaig esefe asa kam olug oningini ka ehengelim mas laginini eba awai.

³⁸ Afa ka mas kikeafena oningigim patalkui. Eba el kam heven la nai ningihiag asa ka blogim heafna sawiegim patalkui.

³⁹ Afa ehe kam ningihiagim og, ‘Ka elim neana ninga la fwatife asa ne ehengelim nangwaghiagofim masa mungu awaiefe. Afa maia kwefihiageg osuna puguiba asa ne ehengelim biteg fenai ihlaftigi.’

⁴⁰ Afa mungwali el Godna Leg nangum ambefe afa ehem olug oningini asa kana Alag membeg enag el wahkig nofkenagag flig. Afa kwefihiageg osuna asa ka ehengelim ihlaftiginam nofkenagag faife.”

⁴¹ Afa Sisas esona og, “Kaba heven la nai aba.” Asa Ju el enag mo higinim afa hefum memtog mona sihiagini.

⁴² Afa ehengel enaig esogog, “Ati big anwenafig eba Sisas Josepna leg ehe el feg. Big anwenafig heafna alag mi afag miba. Haisegba ehe enaig esog ‘Ka heven la nai pe blog?’ Enag mo mas suialafeg mo.”

⁴³ Afa Sisas sihina og, “Afwai, nofeka nimbefum memtog mona sihiagefufum.

⁴⁴ Sa higi, afa el ehe mas kam patal blui eba kana Alag ehem awamonam asa ka nangum wani bluife. Afa ka kwefihiageg osuna ehem ihlafufe.

⁴⁵ Afa amban el kana Alagna mo higinim afa heafna mo kehlig asa enag el ka nangum ambefe. Eba enaig Godna mo fli sihiaule el asa ginofini og, ‘God ehe mungwali elni tisafefe.’

⁴⁶ Nofeka nengel oningifi kana mo enaig esog el kana Alagim nangug. Mungu el ehe kana Alagim ati nangug eba enag el God i ahwagfena asa ehem ningihiag.

⁴⁷ Ka nem nufunam sihinig amban el kam olug oningig asa enag el wahkig nofkenagag flag.

⁴⁸ Kaba enag aba asa elim nufunam nofkenagag faig.

⁴⁹ Nengelni simbianinga bite behig la mana ahganam asa mas nofkenagag flini mo afa watiaug feskofenam asa pigina.

⁵⁰ Enag aba mango mana lofug mo. Eba heven la nai aba afa el enag ahnagaiba asa ehengelim mas pigi.

⁵¹ Eba kike enag heven la nai aba. Afa el enag aba neba asa ehenai yi wahkig nofkenagag gofife. Enag aba eba kana elig. Afa ka kiafna elig bite nai elim faig asa bite nai el sama nofkenagag fli.”

⁵² Afa Ju el hefum mo soagini afa enaig esogona og, “Haisegba sonag el heafna elig bigim faife asa big enag ahgafe?”

⁵³ Afa Sisas ehengelim sihini og, “Eba nufunam feg afa ne Nufunam Elni elig i afa heafna taf i fli fwainigbi afa nofkenagag mas nengelni go mo.

⁵⁴ Afa ne amban kana elig i afa taf i neba asa wahkig nofkenagag ehenai yi gofife. Afa kwefihiageg osuna asa ka ehengelim ihlafo tiginam nofkenagag faife.

⁵⁵ Afa kana elig eba nufunam fane afa kana taf eba nufunam bu.

⁵⁶ Afa ne amban kana elig i afa taf i neba eba ehe ka i ahfeg afa ka ehe i ahgofife.

⁵⁷ Kana Alag nofkenaga afa ehe kam ningihiag asa heafna wasneig kam nofkenagag fai. Asa amban kam ne ba asa kana wasneig ehem nofkenagag faife.

⁵⁸ Afa enag aba of la nai blog eba mango mungwa lofug aba mo asa nengelni simbianinga ahgana afa sum yi pigina. Afa amban ne enag aba neba eba ehe wahkig nofkenagag flafe.”

⁵⁹ Sisas hwa mo sihini laskuhlag lala Kaperneam la.

⁶⁰ Afa kaksag el Sisasim patalfuiaule hwa mo higinim afa esogona og, “Enag mo bigel mas numwehe anwenafi. Amban sa enag moba kehlafe?”

⁶¹ Sisas ehe ati anwenafena mingnag el ehem asa patalfuna hefum memtog mona lagwagini asa ehengelim enaig esoni og, “Atiaho hwa mo nengelim kinig faig?

⁶² Mangwal kinig sa ne flifi afa ne nanguibi Nufunam El of gam pese kwakofiba asa ehe enanai blona.

⁶³ Godna Sungwabug nufunam nofkenagag elim faig. Afa elni elig mas elim kweafui. Afa mo ka nem sihinag enag mo sama nengelni sungwabugum kweafui afa nufunam nofkenagag nem faifi.

⁶⁴ Afa nengel mingnag kana mom mas onigini.” (Afa ilawanam Sisas ati anwenafeg amban mas ehem oniginig mo afa amban el asa ehem angoluwagna ninga la fwahafe.)

⁶⁵ Afa Sisas pese sihini og, “El mas kam onigig mo enagba mog feg autunam ka nem sihina kana alag elim wasneig faig fwainig ba afa enag el ka nangum mas bloi.”

²¹ Eso ehem awamoni afa ehe bot yi fukokaganam afa gwenanam enag bot ikagna bu blug yi ika puguna mina wa eso ehengel membeni.

²² Afa Sisas elim fane eso faini enanai yi ehengel askanam lawam bihia gafenam afa ehefum sahigini og, “Sisas ahnanai yi mahim?” Afa ehengel anwanafini ehe mas heafna pahlukuiag el wankai afa ming bot awai.

²³ Afa mingnag Taiberius wa nai bot ambugonam enanai yi opukona. Afa enanai yi Sisas Godum sahnam og, eba lahlag eso fane mungwali elim faini.

²⁴ Afa ehengel anwanafini og Sisas i afa heafna pahlukuiag el i ohunanai yi mas go mo. Eso ehengel bot yi Kaperneam gam ahunam Sisasim yisigi ahuna.

²⁵ Afa ehengel bot wa ahunam ehengam maligim opukona. Afa Sisasim enanai yi nangunim eso sahini og, “Tisa, ohunanai yi amansi ne bona?”

²⁶ Afa Sisas wahigi sihini og, “Ka nem inim sihinig, ka nengelim aba sagig faini afa ne ahgagim eso ne enam membigim eso kam ambugog yisigig. Afa nengel kana kigmogim mas numwehe anwanafig mo eso ka wagfug.

²⁷ Nofeka bite nai fanem hugna onigini eba enag nogif. Afa nengelni oningig so na nofkenagag fanem onigini soma nengelim higeg nofkenagag fai. Afa God kana Awag kam kanog wahiag eso ka heafna gafugag esenag eso enag fane Inim El nengelim faif.”

²⁸ Afa ehengel ehem sahni og, “Mang gafugag eso ka Godum esinif?”

²⁹ Afa Sisas wahigi sihina og, “Enag el eso God ningihiag so na ehem olug onigini. Afa enaig eba Godna gafugag.”

³⁰ Afa ehengel enaig esogog, “Mang kigmog kagelim wagfunif eso kagel enam nangunim nem olug oniginif. Mang so na esef?

³¹ Afa mahim bigelni simbianinga bite bihig wa auguiafenaba afa aba ahgana eba sefig mana. Afa Godna mo enaig sihifeg, ‘Ehe ehengelim of wa nai aba faini eso ahgana.’”

³² Afa Sisas sihina og, “Ka nem inim sihinig. Enag aba Moses bigelni simbianingam faini eba mang inim of wa nai aba mo. Afa kana Awag eso nengelim inim of wa nai aba faig.

³³ Afa Godna aba eba enag el eso of wa nai pe bog eso bite nai elim inim nofkenagag faig.”

³⁴ Afa ehengel sahni og, “Amunai, enaig so na kagelim enag aba higeg mange gonigofim.”

³⁵ Afa Sisas sihina og, “Enag aba ka nengelim sihinig eba kike. Ka elim higeg nofkenagag faig. Afa aman ne kam nangum boiba mas piske biniwahai. Afa aman ne kam olug onigiba mas piske bu hefei.

³⁶ Afa ka nengelim sihinig nengel kana kigmog ati nangug afa mas ne kam olug oniginig mo.

³⁷ Afa mungwali el kana Awag kam faig afa enag el ka nangum ambugugofe. Afa aman enaig esef eso kam olug onigini ka ehengelim mas waginini eba awai.

³⁸ Afa ka mas kikeafena oningigim pahlukui. Eba el kam heven wa nai ningihiag eso ka bogim heafna sawiegim pahlukui.

³⁹ Afa ehe kam ningihiagim og, ‘Ka elim neana ninga wa hwatif eso ne ehengelim nangwaghiagofim masa mungo awaief. Afa mahim kwefihiageg osuna puguiba eso ne ehengelim bitek fenai ilafaitifef.’

⁴⁰ Afa mungwali el Godna Leg nangum ambugof afa ehem olug onigini eso kana Awag membeg enag el higeg nofkenagag fig. Afa kwefihiageg osuna eso ka ehengelim ilafaitifenam nofkenagag faif.”

⁴¹ Afa Sisas esona og, “Kaba heven wa nai aba.” Eso Ju el enag mo higinim afa hefum memtog mona sihiagini.

⁴² Afa ehengel enaig esogog, “Ati big anwanafig eba Sisas Josepna leg ehe el feg. Big anwanafig heafna awag mi afag miba. Ahnaig esegba ehe enaig esog ‘Ka heven wa nai pe bog?’ Enag mo mas lahlafeg mo.”

⁴³ Afa Sisas sihina og, “Afwai, nofeka nimbefum memtog mona sihiagahufum.

⁴⁴ Sa higi, afa el ehe mas kam pahlu boi eba kana Awag ehem awamonam eso ka nangum wani buf. Afa ka kwefihiageg osuna ehem ilafuf.

⁴⁵ Afa aman el kana Awagna mo higinim afa heafna mo kikehlig eso enag el ka nangum ambugof. Eba enaig Godna mo fi sihiaule el eso ginofini og, ‘God ehe mungwali elni tisafef.’

⁴⁶ Nofeka nengel onigifi kana mo enaig esog el kana Awagim nangug. Mungo el ehe kana Awagim ati nangug eba enag el God i ahagafena eso ehem ningihiag.

⁴⁷ Ka nem inim sihinig aman el kam olug oningig eso enag el higeg nofkenagag fag.

⁴⁸ Kaba enag aba eso elim inim nofkenagag faig.

⁴⁹ Nengelni simbianinga bite bihig wa mana ahganam eso mas nofkenagag fini mo afa muhuna feskofenam eso pigina.

⁵⁰ Enag aba mang mana lofug mo. Eba heven wa nai aba afa el enag ahgaiba eso ehengelim mas pigi.

⁵¹ Eba kike enag heven wa nai aba. Afa el enag aba neba eso ehenai yi higeg nofkenagag gofif. Enag aba eba kana elig. Afa ka kiafna elig bite nai elim faig eso bite nai el soma nofkenagag fi.”

⁵² Afa Ju el hefum mo soagini afa enaig esogona og, “Ahnaig esegba sonag el heafna elig bigim faif eso big enag ahgaf?”

⁵³ Afa Sisas ehengelim sihini og, “Eba inim feg afa ne Inim Elni elig i afa heafna taf i fi hwanigba afa nofkenagag mas nengelni go mo.

⁵⁴ Afa ne aman kana elig i afa taf i neba eso higeg nofkenagag ehenai yi gofif. Afa kwefihiageg osuna eso ka ehengelim ilafo tiginam nofkenagag faif.

⁵⁵ Afa kana elig eba inim fane afa kana taf eba inim bu.

⁵⁶ Afa ne aman kana elig i afa taf i neba eba ehe ka i ahfeg afa ka ehe i ahgofuf.

⁵⁷ Kana Awag nofkenaga afa ehe kam ningihiag eso heafna kifutig kam nofkenagag fai. Eso aman kam ne ba eso kana kifutig ehem nofkenagag faif.

⁵⁸ Afa enag aba of wa nai bog eba mang mungo lofug aba mo eso nengelni simbianinga ahgana afa sum yi pigina. Afa aman ne enag aba neba eba ehe higeg nofkenagag fafe.”

⁵⁹ Sisas ohuna mo sihini nuwagig lala Kaperneam wa.

⁶⁰ Afa el numb Sisasim pahlukuiaule ohuna mo higinim afa esogona og, “Enag mo bigel mas numwehe anwanafi. Aman so enag moba kikehlaf?”

⁶¹ Sisas ehe ati anwanafena mingnag el ehem eso pahlukuna hefum memtog mona sihiagini eso ehengelim enaig esoni og, “Ateaho ohuna mo nengelim kinig faig?

⁶² Mang kinig so na fif afa ne nanguibi Inim El of gam piske kwakofiba eso ehe enanai bona.

⁶³ Godna Sungwag inim nofkenagag elim faig. Afa elni elig mas elim kweagfui. Afa mo ka nem sihinag enag mo soma nengelni sungwagum kweagfui afa inim nofkenagag nem faif.

⁶⁴ Afa nengel mingnag kana mom mas onigini.” (Afa yuwanam Sisas ati anwanafeg aman mas ehem oniginig mo afa aman el eso ehem angoluwagna ninga wa wahiaf.)

⁶⁵ Afa Sisas piske sihini og, “El mas kam onigig mo enagba mog feg autunam ka nem sihina kana awag elim kifutig faig hwainig ba afa enag el ka nangum mas boi.”