9 Eme iy badih badu Samariya asehek sahou i tan i buku doh: “Ou badu Juwis, jo badih badu Samariya. Buku sah handru ou ndremenya jo ta gwa?” (Iri Juwis badeh winiyan bala hawe iri Samariya bwe.)
10 Jises eme asumon sahou tan ja i buku doh, “Buku ou tanam boto-on ta Kindrei, ma are lau nane ndremenya ou ta gwa, ou winiyan ndremenya iy, iy winiyan edeu wa-im gwa kohan handru udu aliy.”
11 Butuhu Samariya dah anya, “Ndramak tinan, ou akohok wa-im gwa kohan udu aliy badeh, badu heh handru? Gwa kede-eh munun lawe-en labai, ma ou tam ari kawau ta a-us wa-im gwa kede-eh bo-oh.
12 Sebwe ou kabin are loken labai ja ta tama ahi Jekop nadeh? Iy atehei gwa kede-eh eme tahi. Iy amwenen a-un gwa badu aliy; nadun oro ma iri bulumakau tan hawe iri sipsip tan a-un gwa dah ale.”
13 Jises tiye i tan ja i buku doh, “Lau marakon a-un gwa dah, bale iri kameh amar ja.
14 Buku are lau a-un gwa, jo edeu i wa-in, balen kameh winiyan bamar ja bwe. Gwa nane jo edeu i wa-in doh kameh asahan i buku gwa mulin udu bolo odan eme loken ma edeu kohan handru ta winiyan bano bwe, kameh ta udu le buku doh.”
15 Butuhu Samariya tiye i ta Jises ja i buku doh, “Ndramak tinan, wa-ik se gwa badeh. Ma balek kameh winiyan bamar ja bwe. Ma jo kameh winiyan bame hamon ba-us gwa dah ja bwai.”
16 Jises tiye i ta butuhu Samariya ja i buku doh, “Ou ala aloh udum, ano ah ma la-uh kame dah.”
17 Eme iy badih nane dah anya, “Jo ari uduk bo-oh!” Jises tiye i tan ja i buku doh, “Ou asehek handru, ou ari udum bwe.
18 Handru, ou atasou a toro mwan ma limeh. Arile, iy mwan ou an hawen kede-eh badeh, udum handru bwe, ou asehek sahou handru.”
19 Iy badih asehek, “Ndramak tinan, jo ndranyolom ai, ou badeh, propet.
20 Tama ahi iri badeh, atudun nyara Kindrei udu bwele-e mandrei kodo-on. Arile aha Juwis asehek Jerusalem badeh, kon ta atudun nyara Kindrei.”
21 Jises asehek i tan anya, “Ou badih kede-en, ou atehei budon tam marakon keme le tek. Len hamon eme kameh aha winiyan batudun tama taha Kindrei winiyan bado bwele-e mandrei dah bwe, ma iri Juwis ale winiyan batudun iy bado bolo Jerusalem bwe le.
22 Aha Samariya atudun lakou, aha bala tana aha iy bwe. Ahi atudun saba lakou ahi tanan. Tasah lahou ta Kindrei ta akohok taha ame len ta kandriyen ndra-in badeh, asahan tahi Juwis.
23 Len eme, ma ndrasahan ai. Idah kameh iri lau ta atudun iy handru, iri kameh atudun tama i san ta Malawin Ndrabun, ma ta kandriyen handru. Tama badeh, aso-ok iri lau marakon katudun iy le ari.
24 Kindrei badeh, iy Malawin Ndrabun. Are lau atudun iy badeh, ki-in hamon ta san ta Malawin Ndrabun, ma ki-in hamon ta sahou handru.”
25 Badih badu Samariya asehek i ta Jises ja i buku doh, “Jo tanan, idah kameh Mesaya eme, iri aloh iy Krais. Buku iy eme kameh iy barasehek lakou marakon barame tataha.”
26 Jises tiye i tan, “Jo le asah idah, iy ndramak nane ta udu le buku doh. Jo le adeh asehek sahou ewek tam dah.”
27 Iy udu, ano le badeh, oro lau tan are kon tinan ame hamon ame hawen. Eme ma mani oro atur ta atou iy asehek sahou hawe badih ari. Ma oro ame abudon solo-an. Arile, oro bandremenya Jises bala buku doh bwe, “Ou aso-ok saba lakou handru?” o, “Tasah handru ou asehek sahou hawe iy badih kede-eh?”
28 Butuhu Samariya eme ruwani bwisi gwa tan irek na gwa udu andri udu. Iy eme iu ili hamon ili kon, ma iy ili asehek nyala iri lau,
29 “Ei, aha kame katou iy ndramak ari kodo-oh. Iy eme asehek iri kandriyen tek mene jo amekes ndra bwena ndra-au on! Iy sala Krais?”
30 Ano iri ado bolo kon tinan adek ame len ame atou Jises.
31 Iri lau adek kahis le, oro lau tan asehek sahou boto-on ili tan, “Ndramak ta leheya, ou aimon se nyamon.”
32 Iy eme asehek i toro i buku doh, “Nyamon tek in aliy. Ado tanan nyamon doh bwe.”
33 Eme oro lau tan suburuk i toro ari ari anya, “Kora-on ari ndramak ndrame ndratiye nan nyamon, nadeh.”
34 Jises asehek sahou ili toro lau tan i buku doh, “Nyamon tek badeh, ta jo ki-in hamon ta budon ta Kindrei. Iy nane suni jo eme ta amekes gok tan, ma iy aso-ok jo kabwidi marakon kano.
35 Ado asehek i buku doh: ‘winiya bun hahuw ja, nyamon badu bilin buruni.’ Jo katiye tado, mada ado kasak, ado kanyolom kili bolo bilin. Nyamon marakon ndruni.
36 Iri lau abo gok ta a-eh nyamon badu bilin, iri badeh, akohok sihine iri. Ma iri atukum nyamon ta koha taha handru kameh udu le buku doh, winiyan bano bwe. Buku iri lau ta atah nyamon badeh, kala le hawe iri lau nane ta asoh nyamon, iri marakon kasekesek.
37 Sahou tataha asehek badeh, handru, ‘Ndramak ari ta atah bilin, iy ari ja ta asoh sali nyamon.’
38 Jo suni ado ala ta asoh nyamon badu bilin, ado mene babo gok ta aliy bwe. Arile, ado ala bolo bilin ja asoh nyamon nane iri lau rayah ja awoyah ta aliy.”
39 Iri lau solo-an badu bolo kon tinan Samariya badeh, ndratehei budon tiri ndra tan. Tasah, iy badih badu Samariya nane ndrasihidiy ndrala tiri i buku doh, “Iy badeh, asehek iri kandriyen tek marakon bwena jo amekes ndra-au on!”
40 Eme iri lau badu Samariya ame hawen. Iri asehek sahou boto-on i tan ta iy kudu hawe iri sese op. Eme iy in hawe iri winiya len la-uh.
41 Ta sahou tan le badeh, bwidi iri lau solo-an labai atehei budon tiri ili le tan.
42 Iri ame tiye sahou i ta butuhu Samariya i buku doh, “Ma bwena badeh, ahi atehei budon tahi ili le ta Jises, tasah ou ame asehek tahi. Arile, na dah ja badeh, ahi ndratehei budon tahi ndrala tan, tasah ahi ndranuhun udu ndranye ahi amwenen. Ahi ndratanan, iy ndramak kede-eh, iy kameh akohok taha lau marakon badu kon munyak ame hamon.”
43 Jises udu hawe iri Samariya len ma la-uh, ano iy eme edek iu ili Galili. (
44 Jises amwenen mene ndratiye toro, “Iri lau badu bolo kon tiri propet amwenen badeh, winiyan banoh iy bwe.”)
45 Jises edek ili isos Galili. Iri lau ame sekesek ta atou iy, tasah iri ndratou iy amekes lakou marakon udu kala len ndrabun iri aloh Pasoba, ma nyamon tinan udu Jerusalem, iri badeh, ado aliy ale.
