43 Namih na iu e biing aiwa, Iesu ka la una Galili.
44 Iesu tom ka use famalal u le, nenge poropet, biil ri bulat la lo na maleh kia tom.
45 Isau le, aunbiing Iesu ka tapiek na Galili, fan Galili ri ka somangat pes u. Ri ka par ta foron matngan fakileng tikii i fatapiek ta u na Ierusalem, wara le ri sabin ri la tah na Inen na Liuliu Kulef.
46 Ka tapiek fis sabin na Kana, na falifuh na Galili, na maleh ae i soikis ta dan una wain. Ma i mel e nenge tom foim ken king, kalalik kia i sasem na maleh na Kapernaum.
47 Aunbiing kaltu ae ka ongen u le Iesu ka la tah tina Iudaia una Galili, ka la una aisa ma ka sising pes u le in la una Kapernaum ma ik faliu pes ke kalalik fatat in met.
48 Iesu ka fas u aragii, “Male biil gam par foron rakrakai na fakileng ke foron tier an fabitit, biil gamen unune.”
49 Kaltu ae ka fas u aragii, “Ier, kara mang, tarama keng kalalik in met.”
50 Iesu ka fas u aragii, “La mang. Kem kalalik in liu.” Kaltu ae ka unune na orek ke Iesu ke ka la.
51 Biil biitom i tapiek na Kapernaum, ke foron tom fafauun kia, ri ka tafe u na sal ini orek le, “Kem kalalik ka liu mang.”
52 Ka diik ri isi aunbiing sah tom, i liu rokap e ke kalalik. Ke ri ka fas u le, “Gogor i rop kuseng u nabiing na i tikii e aunbiing na efef.”
53 Namih, taman kalalik ae ka wol pes u le, i e aunbiing tutus ae, Iesu i fas ta u le, “Kem kalalik in liu.” Pesu i ke foron fanu tikii na fel kia, ri ka unune.
54 Igii, e fawu e rakrakai na fakileng Iesu ka fatapiek u na Galili aunbiing i la tah tina Iudaia.
