39 A susut na te Samaria tagun a tamon ra, det nurnur un o Iesu. Det nurnur kibino una wasiso anun a ino, ra i watungi tandet lena, “I inanos iau una kum utna rop ra a sa pam tari numugu.”
40 Ra a taro Samaria det wan torom o Iesu, det saringi sur in kis nisandet, ra i kis pas aru bung tiro iai.
41 A susut melet det nurnur, kibino una nun a wasiso.
42 Det watungi tan a ino ra lena, “Uniri met sa nurnur, awu sur una wasiso kut ra u watungi un o Iesu, awu. Met ut, met sa longoro i, ma met sa tasman mulusi lena, i a Tene Ulaun anun a rakrakon bual.”
43 Ra aru bung i sa rop, o Iesu i wan utong o Galili.
44 O Iesu ut i sa watung tar a wasiso lenri, “A poropet, a taro una nun a tamon ka det ser ru i.”
45 A taro tagitong o Galili det sa wan pas una labino bung na lotu na Wanlakai sapat o Jerusalem, ma det sa tama tar a kum utna rop ra o Iesu i pami sapat iai. Ra o Iesu i wanpat tong o Galili, a taro det gas pasi.
46 O Iesu i wan melet utong o Kana una papor Galili, a tamon ra i pukus tar a danim sur a wain iai. Ara mugumugu tagun a gapman, ra i papam utuntudu ina king, o nutunulik a musano i misait tong o Kapernaum.
47 I longoro i lena o Iesu i wan tagisapat o Judia utong o Galili, ra i wan toromi, ma i saringi sur in nan utong o Kapernaum sur in ulangolango pas o nutunu a musano, i milau mo sur in mat.
48 O Iesu i watungi tano lena, “Ra ka mot tama a kum utna na ukisin ma lako kum ukinalong, ka mot in nurnur ut.”
49 Ra a mugumugu anun a gapman i watungi lena, “Labino, dar in nan lakit sako o nutunglik in mat.”
50 O Iesu i watungi tano lena, “Un nan kut, o nutumlik in laun.” A musano ra i nurnur una wasiso anun o Iesu, ra i wan.
51 Ra ke wanpat utmakai, anun a kum tultul det wan barato i ra det inanosi lena, “O nutumlik i sa langolango.”
52 I ting det lena, “Asi na du bung mulus ra o nutunglik i langolango melet uni?” Det balu i lena, “Nubung, una ara pakano bung una lirop a mararong i rop gusuni.”
53 A taman a nat i nuk melet pas a du bung ra o Iesu i watungi toromi lena, “O nutumlik in laun.” Ra i tasman lele i lena, a du bung ut ra o Iesu i wasiso uni, a mararong i rop. I mo ra det tamtamano rop det nurnur maragom un o Iesu.
