3 Amratperhan Jisas oh Epe. Gin ihir ihtin meng oh amraya ma hapat dahapat Judia mong oh mandama nuhur it Gariri mongnong pipa.
4 Gariri mongnong sonmat oh Dir munun mandap moh na saprohemur. Samaria mong mutuh gateng mandap morhor kapkap saprohemur rim Samaria mong kat orhor pipa.
5 Susa mongsut hat patin orhor Samaria mong ohe Sikar aptei oh kotpa. Sikar aptei oh nure puh Jekop ohe mon Josep ohnong mong amdatip ohe kakduup mong oh kotpa.
6 Koriyaoh Jekop ohe mong pohmat pihip tom tem oh patgop. Pathan Jisas oh ruumsan sori tei ohoh na son ham tupetporo rim tom tem duup oh tongnongop.
7 Tongnotporhan nuhur den mohotperim ap mutuhnong pipa. Nuhur saperhan oh patin Samaria kuu tit tom yohom apingopri. Apriporhan Jisas oh Tom oh ti namdina potipri.
9 Potporhan uh Go Juda gurmuro. Go Samaria nuhursi mahaw hat pati ohoh ihan go kianorim nohnong Tom ti namdina naporo pongopri.
10 Potporhan oh Es. Go Got orhe gonong napin han oh go hanhan haho deip nahah han nohnong hanhan haho hahmur. Gomdapat am hahneng nohnong Go tom ti namdina napornengmur. Naporneng noh dasi tom oh namdenengmur potipri.
11 Potporhan uh Dasi tom oh ma napor moh tom uup tem marapat tomnong ginaporkin dahama ohnong Hanipyaha. Go tomsan timbas pat moh tom oh dah maham pat moh ihan go de teimdapat dasi tom oh yohom namdiproh.
12 Dire aw Jekop oh tom tem moh pohmara orhor deo orhe nita ihir dayao ire sahapti han ihir dayao hashemur. Mama pohmatip han oh han kasipnap hanmuro. Gin go ohe kasipnong gwe hrepnong mat papatim nohnong kasip tom oh namdiprohmur naporda pongopri.
13 Potporhan Jisas oh Hanip tom pohmatpa tem moh dayahanoh it komdapathe tom din haptimura;
14 nohe ma ri tom oh namdiporhan dayahanoh it komdapathe tom din dahe na haptimur. Tom din da na hat patin tom uuptem ohdapat marapat orhor hatin hat hanip mutuh oh ihat patin dipwi paten dasi haptimur potipri.
15 Potporhan uh ihan Hanipyaha. Gwe ma ri tom oh ti namdina. Namderit noh dama it tom na din hama tom yohom na aprisipramur pongopri.
16 Potporhan oh Er da hat sapat kuu moh urhe er da hat ma sapat oh ha mandatinoh. Ihan imap ohe meng oh potpor daham Go giri oh ihan susa gorhe imannong ambura nohe pat tei moh it aprin potporhan
17 uh Noh han timbas kuumur pongopri. Potporhan oh Go Noh han timbas ma ri oh arpin meng rimur.
18 Go han hanen gon dara mandatipmur. Ginhe gosi ma pat han oh gwe han basmur. Ihat pat ohoh ihan Go noh han timbas kuumur ma ri oh arpin meng rimur potipri.
19 Potporhan uh Hanipyaha. Go nohe han dara mandapat ohe meng oh arpin meng napor ohoh ihan noh gin Go propet hat pat hanhe dahahmur. Go ihat propet hat pat ohoh ihan go mama meng moh napotina.
20 Nure awher ather ihir mama yei moh rus Got orhe danong ham armi maro haptimur. Juda bap gurhe Jerusarem ap mutuhnongwi aprisa Got ohe danong ham armi maro henmur riptimur. Ma ihapti oh gin de mengnong oh dimtin ina meng hat pat por dahandeingopri.
21 Por dahamtiporhan oh Kuua. Go nohe ma napotiproh mengnong arpin menghe dahatinmur. Kaput hanip ihir yei kanong ruyao Jerusarem ap mutuhnong sayao ham Got ohe danong ham armi maro na haprimur.
22 Samaria gure ohe danong ham ma armi maro hapti han oh gur hanhan hat patim ihaptimur. Got oh Juda nuhurnong oh Gure mutuhnong gure namburin han nadarhetipramur rit natip han oh Juda nure mutuh apris pat ohoh ihan nure ma ohe danong ham armi maro hapti han oh nuhur orhornong wamar am hat patim orhor ihaptimur.
23 Ihtin orhora; gin mama pati dik moh arpin Got orhe danong hat patim ma armi deipti oh damdapat orhorwi arpin armi matin ohe da ohsi hat patim armi deiptimur. Amaru hat patim orhorwi Got oh Nohnong armi nahat ha napaptengwe dahapatmur.
