Jon 21:7-17

⁷Be ngua i ma Iesus aa arlem never a ngua, dai ngua lu liina. Be ngua ruqun ma Pita ma’, “Guakka katikka luqa dai auur a Slurlka.” De ma Pita qe narli ngua sil ne liina, de qat drlem ai ma Iesus aa. De qa man mer aa serlapki i sa qa matna be verleset. Be aiv aa de qa meranas sep ma qerlap, ip ke ruirl sagel ma Iesus.

⁸Dav uut iari ama risura, dai uut mit dama siviini sa dengerlking. Be uut kiarlet ne ama segenaqi se ama serlik i buup. I na dengerlking dai quasiq ai qurl uut sangis.

⁹Be sa aiv uur aang sa dengerlking, de uut lu ama altingki i ama ualsaing naik. I ma Iesus ke nin ama serlik ngen ama plaua ver ama ualsaing.

¹⁰De ma Iesus ka ruqun na uut ma’, “Ngen den se iang ama serlik namer ama segenaqi.”

¹¹De ma Saimon Pita qa sik sa de ama siviini de qa qiat ne ama segenaqi se dengerlking. I ama segenaqi dai maikka buup ki ne ama serlik ama slurlnget. I lungera ama serlik dai ama 153 na nget. Dap maikka re nanses i maikka ama serlik i buup na nget. Dav ama segenaqi dai quasiq ai bingmet na qi.

¹²De ma Iesus ka ruqun na uut ma’, “Ngen den ip ngen dres.” Ka taqen taqurla dap kuasiq a qek never a uut ka snanpet na qa ma’, “Nemka na ngi?” I raquarli uut drlem ai qa dai auur a Slurlka na qa.

¹³Taqurla de ma Iesus ka aang sagel ama asmes be qa mer ama bret ngen ama serlik de qa qurl a uut.

¹⁴I qatikka liina i qa reqerl nanas bareq aa risura, dai ip ma depguas niirang. I naset liina i ama Ngemumaqa qa maarl na qa naver ama aapngipki.

¹⁵Baiv uut mes be verleset, de ma Iesus ka ruqun ma Saimon Pita ma’, “Saimon i ngi i ma Jon aa uimka, dai maikka quarl ama revan i ngi rarlik ngua veviit daleng lura ngen ne liirang aa?” De ma Pita qa virliit ma’, “Ii, gua Slurlka ngiat drlem ai gua arlem never a ngi.” De ma Iesus ka ruqun ma Pita ma’, “Diip ngi taqa uas te gua sipsiv-iirang ama giliirang.”

¹⁶De saqiaskerlka ma Iesus ka ruqun ma Pita ma’, “Saimon i ma Jon aa uimka, maikka qua ngi rarlik ngua veviit?” De ma Pita qa virliit ma’, “Ii, gua Barlka ngiat drlem ai gua arlem never a ngi.” De ma Iesus ka ruqun ma Pita ma’, “Diip ngi taqa uas te gua sipsip ama barl nget.”

¹⁷De saqiaskerlka ma Iesus ka snanpet ip ma depguas niirang ma’, “Saimon i ma Jon aa uimka kua gia arlem never a ngua?” De ma Pita dai maikka ama arlemigl na qa. I raquarli ma Iesus ka snanpet na qa ma depguas niirang ma’, “Maikka qua ngi rarlik ngua?” De ma Pita qa ruqun ma’, “Gua Barlka maikka ngiat drlem auur a tekmeriirang mai. Be maikka ngiat drlem ai gua arlem never a ngi.” De ma Iesus ka ruqun ma Pita ma’, “Maikka ngi taqa uas te gua qaqet ip taquarl ama sipsip ama barl nget.