1 Te nosali Jisas aga bidi dabego gedude ma pedalai, augwali te sigi ąį nogi Taiberias pąde bidibadi te aga ma pedalai, augwaligo aga suai. Aga augwali pageba te tiwai pedalai.
2 Te bidi dabe nogi e tama wai, Saimon Pita, te me Tomas te agai gasa nogi me Didimus, te Nataniel aga bulu nogi Kana, te Galili tǫ pedai bulu, tama te Sebedigo ogwa si dali, te Jisas wali pabo bidi me si me, augwali hodobo bidai, te sigi ąį nogi Taiberias pąde.
3 Tama Saimon Pitago augwalibolo te po wai, “Ena sųgų gegegibu pobao,” wai. Tama augwaligo Saimon Pita agabolo te po wai, “Da me nage dali paio,” te po wai. Tama augwali pelama, te gebaba holai. Augwaligo te sogo hulide te sę yali goli, sųgų me sabeo.
4 Tama te giliga pedalainogo ebode, tama Jisas te sigi ąį sanide aga dolalubo augwaligo suai. Tiali goli augwaligo aga koneyu, tama aga Jisas dao, te homu augwaligo ebeo.
5 Tama Jisasgo augwalibolo hanalubo po olama i weyu, te po wai, “Abagi dede, dagego sųgų meba saliwe?” te po wai. Tama augwaligo aga dali po wei ponoyu, te po wai, “Menio,” te po wai.
6 Augwaligo te po olama, tama agai augwalibolo te po wai, “Dagego te agane wa te dagego u badu te dolo nogo badu te sųgų sabo wa te ąįba sąyao,” te po wai, “tama dagego sųgų meba saibao,” te po wai. Tama tibaso, augwaligo te wa agai te wali te dolo te wa aiyaba sąwai. Tama sąnama, augwaligo sųgų hauwa mu sai, tama augwaligo te wa ugwaba ma kegabo usu ebeo.
7 Te bidi me Jisas agai godolo ebo bidi, agai Pitabolo te po wai, “Te aga dago Genuai Bidi dao,” te po wai. Tama Saimon Pita aga ugwa dabe pebeda munama, te sę yai. Tama agai te po odai, “Te bidi aga dago Genuai Bidi dao” wabo, te po odobaso, Pita aga ugwa bea selama, tama aga te ąįba samonai.
8 Tama te Jisas wali pabo bidi meba augwali te gebadu asai, te ąį saniba. Tama augwaligo te sųgų dabe te wa dali kegasa asai. Augwali digibulu gana bidibeo, te augwali bidali usu sabo te pąde gana tamao, tama te sigi ąį saniba asai.
9 Tama augwali te gebadu aselama, te ąį sani badu sabolama, tama augwaligo suali, sia tede dabo suai, tama te siade sųgų ulalubo suai, tama te tubo nai bret me tede munalubo augwaligo suai.
10 Jisasgo augwalibolo te po wai, “Megi dagego te sali sųgų, te dagego meba eba sesao,” te po wai.
11 Te Saimon Pita te gebaba holama, tama te sųgų wa agai ąį saniba kegasa asai. Genuai sųgų hauwa mu te wade pągąnaluai, tama te 153 te tama sųgų te sųgų sabo wade bidai. Te sųgų hauwa mu 153 tamao digi, te wa bono togobeo.
