Jon 20:13-24

¹³Ihat tongnot patimdapat uhnong Go kinham yimapat potperhan uh Nohe hanipyah ohe sein moh timbashan denong matao rim yimapatmur ama potip oh.

¹⁴Pora tandapurkes rim wandeioh Jisas oh ama pat hatip oh. Pathan uh ama hanhan matip oh.

¹⁵Hanhan matporhan oh Kuua. Go nihnong angmar yimapat potporhan uh Mama han moh ru nita han ohkin daham uh Hana. Go sein oh pisus wan tei ithanoh ma it tei oh napotinmur. Napotporhan noh dar itiprohmur ama potip oh.

¹⁶Potporhan Jisas oh Maria potporhan uh orhor ma hapat daham potahat tamburkes rim Hibru ire mengtei Raponai ama potip oh. Raponai ma poripti oh Grik ire mengtei tisa poriptimur.

¹⁷Raponai potporhan oh Noh at ohe patnong it na ruhum pat ohoh ihan go nohnong namarindipra. Go susa norhe namgit napisapat han ihirnong Oh it nohe atsi; gure itasi nohe Hanisipsi; gure Hanisipsi ohe patnong it rupatmur rihe potinmur ama potip oh.

¹⁸Potporhan uh aprisa Nuhurnong Noh Hanipyah wandeimur napora urhe wandei mengo ohe por mengo oh orhe han nuhurnong napongop.

¹⁹Gahan Sande orhor kwihan Jisas orhe namgit napisapat han nuhur ap rosa Juda ihirnong kas ham ap oh pomat taputpa. Tapura patin Jisas oh nure mutuh moh pitap ham tandeit patgop. Tandeit patdapat We. Gure da oh kas hamo hapri. Gure da oh watahpei ham kimirit patenmur napongop.

²⁰Napora orhe bes sur apito atoheitem ban temo oh namgingop. Namgitporhan nuhur wamara orhor ma hapat daham da yah hama amam isipnap tit hatpa.

²¹Hatperhan oh it Gure da oh manap ham kimirit orhor patenmur. Nohnong at oh Go nohe meng moh pot pisonmur napor ma nadarhetipru mat orhor gurhe ihat nohe meng mohsi pot pisonmur napor nadarherpatmur napongop.

²²Napora orhe nah pupuka oh pamrasa nuhurnong naprisa Gin noh gurnong Got orhe Yahsup oh napirmur.

²³Gurnong Yahsup mama napir ohe pe oh gur susa ihirnong Got oh ire er hat sapti ohe yan oh dat amdama it yansi na matipra ma hapat dahaya kuuhan ihirnong oh Gure er hat sapti ohe yan oh Got oh gurnong it er yan oh na napripramur porinmur. Poriyahan arpin ire er hat sapti yan oh dat amdama it yansi na deipramur. Gurdapat ire er hat sapti yan moh Got oh yan apripra ma hapat dahaya kuuhan ihirnong oh Gure er hat sapti ohe yan oh pat ohoh Got oh it guragurnong napripramur poriyahanoh arpin Got oh ama giporiya ihirnong apripramur napongop.

²⁴Jisas oh kopenat nure mutuh ma pitap hatip oh orhe namgit napisapat han nuhur tit han Tomas Ditimas oh na patin pitap hatipmur.