1 Ariya fati amugou, Bori eringe hamba dewei uwa, agugu oruwa Maria Makdalaha, no matmat langa goyai. No goidu bona, matmat langa megebu ete u-u hao sesemu wane waha, isebuwou inyi gainga urai.
2 Onodu bona, no ege guriyedu goi Saimon Pita, disaipel ete, Yesus no gaude tugai waha ngare benou lenirai, “Nere Anyakaro nomo gogala matmat langaha tane. Onodu bode, nere alanga tafane waha, ere ada isiya.”
3 Ono wainga, Pita no Yesus nomo disaipel waha ngare, nere matane awadu bodere, matmat langa goyare.
4 Nere gaara gurarudu goi bodere, Yesus nomo disaipel ete wa, no ilibumu Pita feiya tudu bona, no amugedu goi matmat langa heigai.
5 Onodu bona no oogudu, matmat huwanya langa feeledu bona, ogola hilobainga nere Yesus gogala ngara wane wahanga inyi gainga urai. Onowai wa, no huwanya goyei uwa.
6 Ono gainga Saimon Pita no iinga huunta maidu bona, no tigininga matmat u-u gamu goyai. No goidu bona, ogola inyi gainga urai.
7 Onodu bona, no ogola ete nere Yesus mora langa dage fuwane waha, ila inyane waha bagu, arotenga inyigane urei uwa. Ogola waha no nogo fere, fai olilidu fere tafou dorofe inyi gainga urai.
8 Ono wainga, Yesus nomo disaipel ete, no amugedu bona matmat langa goi heigai waha, no fere matmat u-u gamu la goyai. No goidu bona, dada waha nerigedu bona, no huwanya ngalengawai.
9 Ariya, saini waha langa, nere beele Itou nomo buk langa inyina waha, nere foode nigei uwa. Wa Yesus no matmat langa ege gidu jayonbona waha.
10 Onodu, nere disaipel nga wa, ege gidu matane goyare.
11 Ariya, Maria no matmat u-u waha hinomu langa mere bona, malala langa otowai. No onou merenga bona oogudu, matmat u-u gamu langa feelewai.
12 Onodu bona, no ensel nganononga kolos kaamba bagu, Yesus nomo gogala amina inyai waha langa yafagare nerirai. Ete, no haumu mora inyai waha langa yafai. Ete, no haumu afo inyai waha langa yafai.
13 Onodu bodere, nere Maria benou isoki tuware, “Aita, ne taate boni mereni?” Ono warenga no lenirai, “Nere yame Anyakaro taane. Nere tedu alanga tafa tuwane waha, ji alai uwa,” nirai.
14 No onou lenirisu bona, no ubuludu, Yesus oto gainga urai. Onowai wa, Maria no wa Yesus iiwou, no alai uwa.
15 Ono wainga, Yesus no benou isoki tuwai, “Aita, ne taate boni mereni? Ne faiwe kuruni?” Ono wainga, Maria no ninau isai, no haga beha oofagou fai iiwai. Onodu bona, no letuwai, “Fai anyakaro, ne tedu togoi haumu alanga tafa tunaha wonga, ne ji lehiyahenga, ji goidu no tonboni.”
16 Ono wainga, Yesus no lewai, “Maria.” Ono wainga, Maria no ubuludu, Hibru beele langa benou letuwai, “Rabonai”. Beele “Rabonai” wa, “Isisi higigou fai.”
17 Ono wainga, Yesus no benou letuwai, “Ne ji adai yaasu hiyau, taate bona, ji ouwe la yame Jijei bagu manei uwa inyina. Ariya ne yame baabo gane bagu goidu bonahe, benou lenigau, ji ouwe langa manon boni, ji yame Jijei bagu tebere ametege bagu la manini. Onodu ji yame Itou bagu, tebere Itou bagu la manini.”
18 Ono wainga, Maria Makdalaha no goidu bona, nere Yesus nomo disaipel benou lenigai, “Ji Anyakaro amina urenaha,” nigai. Onodu bona, beele Yesus no tuwai waha, no nere lenigai.
