19 Jon i orek malal, aunbiing foron famfamu ken fan Iudaia tina Ierusalem ri wuun fal e pris ke foron Liwai isi rin diik u le, “Wo seh?”
20 Jon biil i fun ti orek una kiliis ri. I use famalal u tom le, “Ia biil e Mesaia.”
21 Pesu ri ka diik u le, “Wo seh, wo Elaisa?” Ka kiliis ri le, “Ia biil e Elaisa.” Ke ri ka diik u sabin le, “Kol wo mang e poropet ae Buk na Gogoh i fafas ta ini?” Ka kiliis ri aragii, “Ia biil.”
22 Namih ri ka diik u tala aragii, “Wo seh? On fas kemem ini ti orek isi kemek kep fafis u usuf fanu ae ri wuun ta kemem. O tara le wo e seh tom?”
23 Ke Jon i kiliis ri ini orek ae na buk ke Poropet Aisaia le, “Ia kinen nenge kaltu i tautau na falifuh foes aragii, ‘Fatortores sal sala Kumguui.’”
24 Foron Farasi ae ri wuun ta ri usuf Jon,
25 ri ka galte u aragii, “Le biil wo e Mesaia, le wo Elaisa, le poropet, isi sah o ka baptais fanu?”
26 Jon ka kiliis ri aragii, “Ia baptais fanu ini dan, isau le awii na fatpoto gam e kaltu ae biil gam usum lo.
27 I mang e ier ae in la sau na ming, i kalkaluu, pesu biil i fasih ian tel ufu su tina keke, wara le biil ia kalkaluu.”
28 Foron tier tikii igii i tapiek na Beteni na nenge baban dan na Ioridan na falifuh ae Jon i tel bapitaiso lo.
29 Na biing namih, Jon ka par Iesu i la usuf i ke ka tara aragii, “Gam par u! Apiek e natun sipsip ke God ae in tel ufu sinang laulau ken fanu tikii na piklinbat.
30 Igii mang e ier ae ia use ta u le, ‘I mih pes iau, isau le i laumet lo iau, wara le i liu famu ta tom lo iau.’
31 Iau tom biil ia usum ta le i e seh, isau le wara ia ka baptais fanu ini dan, isi iak famalal u usuf fan Israel tikii.”
32 Ke Jon ka ta orek an famalal kia aragii, “Ia par Tanwa Kalkaluu i filau puh arae bun tinbae na kukulii ma ka kiis lo.
33 Biil i fasih le ian usum ta lo, isau le, God tom ae i wuun ufu ta iau isi baptais fanu ini dan, i fas ta iau le, ‘Kaltu sah on par Tanwa Kalkaluu in filau puh ma ka kiis lo, i sau e ier ae in baptais fanu ini Tanwa Kalkaluu.’
34 Ia ka par ta u ke ia ka famalal u le, i e Kalalik ke God.”
35 Na biing namih Jon ka fis sabin turan iu e kalalik na fafausum kia.
36 Aunbiing Jon ka par Iesu i liu ufu rituul, ke ka tara aragii, “Kamu par u! Ae kol e Natun Sipsip ke God.”
37 Aunbiing iun kalalik na fafausum ae ru ongen Jon i use ta u arae, ru aptih sau ke ru ka mi lo Iesu.
