1 Namih Pailat ka ta ufu Iesu usuf foron tom fapaket ke ri ka pis u.
2 Foron tom fapaket ri ka tel nenge bangbang ini finau ae imel e si ma ri ka luun u na paklu. Ri ka fakilkiliis u ini nenge dolon kaen melmelek.
3 Ke ri ka famam tatkau usuf i ma ri ka tara sing i le, “Ier, wo sau o king ken fan Iudaia!” Ke ri ka pose u na posong na mata.
4 Pailat ka suuh fis sabin ke ka fas fan Iudaia aragii, “Gam par u, ian lame fasuuh u usuf gam isi gamek usum le biil ia tiu u, le i tel fager ti tier, isi iak nagogon u.”
5 Aunbiing Iesu ka suuh ini bangbang ae ri tel ta u ini finau imel e si turan kaen melmelek, ke Pailat ka tara sing ri aragii, “Par u, igii mang e kaltu ae.”
6 Ma aunbiing foron laulaumet na pris ke foron tom parpar kale Felun Sising ri par Iesu, ri ka perek aragii, “Fakulkulik u! Fakulkulik u na aupaket!” Isau le Pailat ka kiliis ri aragii, “Gam tom gamek telpes u isi gamek fakulkulik u na aupaket. Biil ia tiu u le i tel fager ti tier, isi iak nagogon u.”
7 Fan Iudaia ri ka kiliis fafis u aragii, “Imel e nenge nagogon kimem, ae i use u le in met tom, wara le i tara le i e kalalik ke God tom.”
8 Pesu aunbiing Pailat ka ongen ta u arae, ka lala sokeh mang tom.
9 Ke ka kau fis una fel. Ke ka diik Iesu aragii, “O la tingah?” Isau le Iesu biil i kiliis u.
10 Pailat ka tara sing i aragii, “Isi sah biil o kiliis iau? Arafah, biil o usum le imel e rakrakai kiak una puk ufu wo ke una fakulkulik wo?”
11 Iesu ka kiliis u aragii, “I mel sau e rakrakai kiam una nagogon iau, wara le God i ta u tinbae usuf wo. Isau le kaltu ae i ta ufu ta iau una limam, sinang laulau kia i laumet na sinang laulau kiam.”
12 Aunbiing Iesu ka use ta u arae, Pailat ka tof u le in puk ufu Iesu tina kamkabet, isau le fan Iudaia ri tongon tautau biitom le, “Male on puk ufu kaltu igii, ke biil o tala Sisar. Seh i tara le i tom e king, i tuui ke Sisar.”
13 Aunbiing Pailat i ongen u arae, ka fasuuh Iesu ke ka kiis na nian kiiskiis una nagogon na falifuh ae na orek Ibru, ri foteng le Gabata, kamtinan orek ae le falifuh ri tel u ini fat.
14 I e biing una geges isi tel inen na Liuliu Kulef. Ma na sangful ini u e aunbiing, Pailat ka tarah sing fan Iudaia aragii, “Igii e king kimi.”
15 Isau le ri ka tautau le, “Lame ufu! Lame ufu! Fakulkulik u na aupaket!” Pailat ka diik ri aragii, “Gam ier le ian fakulkulik king kimi na aupaket?” Foron laulaumet na pris ri ka kiliis Pailat aragii, “Biil ti king kimem, Sisar sau i e king kirer.”
16 Ke Pailat ka ta ufu Iesu mang usuf foron tom fapaket isi rik fakulkulik u na aupaket. Ke ri ka lame ufu Iesu.
17 Iesu ka kusep aupaket kia tom, ma ka la una falifuh ae na orek Ibru ri foteng u ini Golgota, ma kamtinan as ae le, salan tuan paklun kaltu.
18 Aiwa ri ka fakulkulik Iesu turan iu e kaltu na iun baba, ma Iesu na fatpoto ruh.
19 Pailat ka siit ta nenge sun orek ma ri ka kabet ta u na olon aupaket. Sun orek ae i tara aragii:
20 I fuun e fan Iudaia ri wes sisiit ae, wara le falifuh ae ri fakulkulik Iesu lo i fatat isi Ierusalem. Sisiit ae ri siit ta u ini orek Ibru, Latin ke Grik.
21 Foron laulaumet na pris ken fan Iudaia ri ka ta rakrakai na orek usuf Pailat le, “Gong o siit u le, ‘King ken fan Iudaia,’ isau le on siit u aragii, ‘Kaltu igii i tara le, i tom i King ken fan Iudaia.’”
22 Pailat ka kiliis ri aragii, “Sanih ia ka siit ta u, ia ka siit ta u.”
23 Aubiing foron tom fapaket ri ka fakulkulik ta Iesu, ri ka kep foron kaen ae i afit kale foron kilkiliis kia la ini, ke ri ka tem u una ifet. Neng usuf temtem tikii lo ri. Ke ri ka kep kaen sabin ae i fis u la. Kaen ae biil ti tungtungus lo, i dolo sikit sau.
