Jon 13:11-29 in Amanab

¹¹ (Sisas ati anwenafeg amban el afa ehem angoluwag elni ninga la fwahafe asa ehe enaig esog, “Nengelbi mungwali ambug afohie asa mungu el nengel nai mas enaig goh mo.”)

¹² Afa Sisas ehengelni mong gigiafe fwahinim afa lofug pese fatinam afa sime gam ikanam asa ehengelim sahtigini og, “Atiaho ne hwam anwenafig sa ka nem esenig?

¹³ Afa ne kam enaig sefli fig Tisa afa Ainiyag eba ne suiala sihifeg asa kike enag elbi feg.

¹⁴ Sa nangu! Kaba Tisa afa Ainiyag ka nengelni mongim buna gigiafenugeg asa ka esug gafugag elni gafugam esenig. Afa ne gafa nimbiafgelni nai elni mongim sa ne gigiafe gonugibi enaig eba suialafeg.

¹⁵ Afa kati nem minaba ogfunig asa ka nem esenig sa ne mingnag elim enaig esegoni.

¹⁶ Eba nufunam feg. Afa gafugag el mas gose eba misog el gose fakafe. Afa el asa mo flablug enag el mas gosei eba el asa ehem ningihiag enag el gose fakafe.

¹⁷ Glauwaba ne enag nufunam mo anwenafig afa ne enam patalkuiba asa ne sifakali.

¹⁸ “Kana mo mango nengelim mungwali esoni mo. Ka nengelim awamonigim asa ka nengelim ati anwenafenig ne haig el maia. Afa Godna mo enaig sihifeg ‘Enag el ka fane mungwawli ahneule ehe kam amtakwalinagim.’

¹⁹ Ka nengelim hwa mo osihini afa maia enagba puguiba nengel kam olug onigifie kike i afa kiafna mo i wahkig ka ahgofife.

²⁰ Eba nufunam feg. Ka elim ningitigi afa amban ehengelim awamogonibi eba kam gafa gwenaig esenig. Afa amban kam awamonaiba eba kana elim gafa gwenaig esigonug asa ka ningitigig.”

²¹ Afa enag mo sihi fwahanam afa ehem olug kinig fenam asa ambala sihina og, “Eba nufunam feg nengelnai mungu kam angoluwagna ninga la fwahafe.”

²² Afa patalfuiag el hefum fanangu feaginim afa etetiagini og ehe amban elim esonag.

²³ Afa patalfuiag el mungu Sisas asa ehem fwina membenag enag el Sisas i muhla ahwag fena.

²⁴ Asa Pita ehem mingigna sehneina og, “Sahna ehe ambanim esonag?”

²⁵ Asa enag el Sisasna elig nai yi muhla gafena afa enag sahna og, “Ainiyag, eba amban maia?”

²⁶ Afa Sisas wahigig sihina og, “Ka amba fane bug la fatinam elim faiba eba enag el kam esenafe.” Asa ehe amba bu la fatinam Judasim faina. Judas eba Saimon Iskariotna leg.

²⁷ Afa enanam Judas amba flanam afa ikagna Satan ehem simbagahlana. Afa Sisas ehem sihina og, “Afa ne mangwal enaig esofefiba sa ne ikagna ese.”

²⁸ Afa mingnag patalfuiag el auguiafena afa enag mo mas anwenafini mo haisegba Sisas ehem enaig sihifena.

²⁹ Afa Judas ehe kigim kehlag asa mingnag patalfuiag el enaig onigifini og Sisas ehem ningihiag ma ka buyisna fane lambi. Afa mingnag enaig onigifini og Sisas ehem ningihiag sama gawig fwainig elim kwagani.

¹¹ (Sisas ati anwanafeg aman el afa ehem angoluwag elni ninga wa wahiaf eso ehe enaig esog, “Nengelbi mungwali ambug agfohie eso mungo el nengel nai mas enaig goh mo.”)

¹² Afa Sisas ehengelni mong sufuhiage wahinim afa lofug piske fatinam afa sime gam ikanam eso ehengelim sahtigini og, “Ateaho ne ohnam anwanafig so ka nem esenig?

¹³ Afa ne kam enaig sefi fig Tisa afa Ainiyag eba ne lahla sihifeg eso kike enag elbi feg.

¹⁴ Sa nangu! Kaba Tisa afa Ainiyag ka nengelni mongim buna sufuhianugeg eso ka isug gafugag elni gafugam esenig. Afa ne gaba nimbiafgelni nai elni mongim so na sufuhiage gonugibi enaig eba lahlafeg.

¹⁵ Afa kati nem minaba wagfunig eso ka nem esenig so na mingnag elim enaig esegoni.

¹⁶ Eba inim feg. Afa gafugag el mas gosu eba misog el gosu fakaf. Afa el eso mo fabug enag el mas gosui eba el eso ehem ningihiag enag el gosu fakaf.

¹⁷ Yawaba ne enag inim mo anwanafig afa ne enam pahlukuiba eso ne sifakali.

¹⁸ “Kana mo mang nengelim mungwali esoni mo. Ka nengelim awamonigim eso ka nengelim ati anwanafenig ne ahanaig el mahim. Afa Godna mo enaig sihifeg ‘Enag el ka fane mungwali ahneule ehe kam amtakwalinagim.’

¹⁹ Ka nengelim ohuna mo osihini afa mahim enagba puguiba nengel kam olug onigif kike i afa kiafna mo i higeg ka ahgofuf.

²⁰ Eba inim feg. Ka elim ningitigi afa aman ehengelim awamogonibi eba kam gaba gwenaig esenig. Afa aman kam awamonaiba eba kana elim gaba gwenaig esigonug eso ka ningitigig.”

²¹ Afa enag mo sihi wahianam afa ehem olug kinig fenam eso ambagwa sihina og, “Eba inim feg nengelnai mungo kam angoluwagna ninga wa wahiaf.”

²² Afa pahlukuiag el hefum fanangu feaginim afa etetiagini og ehe aman elim esonag.

²³ Afa pahlukuiag el mungo Sisas eso ehem hugna membenag enag el Sisas i muhwa ahagag fena.

²⁴ Eso Pita ehem mingigna sehneina og, “Sahna ehe amanim esonag?”

²⁵ Eso enag el Sisasna elig nai yi muhwa gafena afa enag sahna og, “Ainiyag, eba aman mahim?”

²⁶ Afa Sisas wahigig sihina og, “Ka amba fane bug wa fatinam elim faiba eba enag el kam esenaf.” Eso ehe amba bu wa fatinam Judasim faina. Judas eba Saimon Iskariotna leg.

²⁷ Afa enanam Judas amba fanam afa ikagna Satan ehem simbagahlana. Afa Sisas ehem sihina og, “Afa ne mang enaig esofefiba so na ikagna ese.”

²⁸ Afa mingnag pahlukuiag el auguiafena afa enag mo mas anwanafini mo asegba Sisas ehem enaig sihifena.

²⁹ Afa Judas ehe kigim kehlag eso mingnag pahlukuiag el enaig onigifini og Sisas ehem ningihiag ma ka buyisna fane wambu. Afa mingnag enaig onigifini og Sisas ehem ningihiag soma gawig hwainig elim kwagani.