Jon 12:9-42 in Amanab

⁹ Afa Sisas Betani la gafena afa kaksag Ju el enam higinim asa afu Sisasim nanguni. Afa ogna Lasarusim gafa nangu asa lahagba Sisas ehem ilafona.

¹⁰ Asa saglag pris mo sihiagini ogna Lasarusim gafa tigi.

¹¹ Asa ehena yi kaksag Ju el ehengelni misog elim fwatigim asa Sisasim olug onigini.

¹² Afa ming osuna kaksag el buyis nangugim ambegona afa higinim og Sisas hwa mina Jerusalem gam blo ikafe.

¹³ Asa ehengel komb figeg totoaginim afunam ehem uflinim asa enaig esogona og; Godna unehlag kwania feg. Enag el God asa ningihiag sama God ehem suialafia flai. God sama Ju elni misog elim suialafia flai.

¹⁴ Afa Sisas donki flanam afa kuka ganam asa ikana. Afa maia ehe enaig esenaba asa Godna mo nufunam pugug. Autunam Godna mo ati enaig ginofi fwahini;

¹⁵ Jerusalem la nai el, sa hig. Nofeka embefig, sa nangu, nengelni misog el donki la sisi oblo.

¹⁶ Afa enanam heafna patalfuiag el enag mo mas onigini mo. Afa autunai la Sisas lahanam afa buihianam alag nangum pese kukafe asa enanam ehengel enag mo anwenafifi eba Sisasim sunig afa ehem kwefunim enaig esini.

¹⁷ Afa el Sisasim nanguni maia Lasarusim ilafonaba biteg fenai asa enag mo sihiageafuna.

¹⁸ Afa kaksag el enag kigmog mo higinim asa ambenam Sisasim mina la uflini.

¹⁹ Afa farisi el hefum sihiageni og, “Bigel mas ehem kwenig mo. Sa nangu, kaksag el bigim fwatigim ehem patalfug!”

²⁰ Afa mingnag Grik el Jerusalem gam afuna. Ehengelbi afwambanai el ogna buyis ambenam asa Godna unehlagim fingi fini.

²¹ Afa ehengel ambenam Filipim sahni og, “Saglag kagel ogna Sisasim nangu.” Afa Filipna Kembig Betsaida Galili la nai.

²² Afa Filip Andrum sihinagim ikana asa eheningi Sisasim ahsihina.

²³ Afa Sisas esona og, “Glauwaba asa God elim ogfunife Nufunam el eba kwania feg.

²⁴ Kike enaig kon fug lofug fe, kon gug enaig eseg afa ne mungu esug ningana flagiafiba eba gwenaig mungu fifife. Afa enag ne bite megam kumhlaiba asa noginam asa nog pugufe enag mungu lig yi kaksag gug fefe.

²⁵ Afa amban el hefim fwina onigkafife enag el eba awaiye fe. Afa amban el mas bitenaim fwina membeg mo afa heafna nofkenagag oksig asa enag el wahkig nofkenagagim numwehiageg.

²⁶ Afa amban ne kana gafugag esenag ehe sama kana onigigim patalblui. Asa ka hanai yi feg eba kana gafugag el gafa gwenanai yi fifife. Afa amban el kana gafugag eseg asa kana alag ehem suialag onafe.”

²⁷ “Afa kana lahag muhla ofe asa kana olug kinig feg. Haig sihi ka fefe. Hwa kinig eba mog feg na ka blog. Asa masa ka enaig esofe, ‘O Api hwa kinig masa ne kana ninga la fwahafe.’

²⁸ Afa ka enaig esofe, ‘O Api, sa ne nimbiafna unehlagim fingi fe!’” Afa God of la lagofena og, “Ka ati kiafna unehlagim fingi feg afa ka gwenaig pese esefe.”

²⁹ Afa kaksag el afofenaba enag mengigim higini. Afa mingnag el enaig esogona og, “Eba hug moasig!” Afa mingnag el enaig esogona og, “Amo, eba of la nai el ehem sihinago!”

³⁰ Afa Sisas ehengelim sihini og, “Enag mo mango kam kwefwag mo eba nengelim kwaganigim.

³¹ Afa enanam God bitenai elim kwefihiagefe asa ehe bitenai misog elim filafatife.

³² Afa maia el kam sisi kahlibi afa ka mungwali elim lambiba asa kam ambe muhlafinife.”

³³ Afa Sisas enag mo enaig sihifeni eba ogfug heafna lahag enaig esefe.

³⁴ Afa ehengel esogona og, “Godna buk enaig sihifeg Godna Gisfu Fwahag El wahkig gafife. Haisegba sa ne enaig sihifeg Nufunam Elim sisi yi kahlife? Kagelim sihini Nufunam El amban maia?”

³⁵ Afa Sisas sihina og, “Ombusug nengel nai yi mas wahkig gofi maia enag ombusug gofiba sa ne ati ika masa nem sikulufenafe. Asa el sinaini fakafe ehe mas anwenafe ehe asim ako.

³⁶ Afa ka enag ombusug nem faig. Afa maia ka nengel nai yi gofiba sa ne kam olug onigini asa nengel enaig fi asa el ombusugni fakafe.” Afa Sisas enag mo sihi fwahanam asa lasanam ikana afa mas ambala gofena mo.

³⁷ Afa Ju el kaksag kigmog nanguni asa Sisas esena asa ehengel ehem mas olug onigini mo.

³⁸ Afa ehengel enaig esini asa Aisaiana mo nufunam puguna. Ehe Godna mo fla sihiaule el afa autunam ehe enaig esona og; O Ainiyag, ne ati nimbiafena kigmog ogfug asa kagel neana mo sihigonugbi afa ehengel mas higig mo.

³⁹ Afa ehengel mas Sisasim olug onigini mo asa Aisaia ming mo pese sihini og;

⁴⁰ God ehengelni nofugim kagfonig asa ehe mas nofihiagini mo afa onigigim kikisenig asa mas numwehe anwenafi. Afa God enaig esog afa ka enaig ese fwainigba eba ehengel kam pese oniginife asa ka ehengelim ugwetifefe.

⁴¹ Autunam God Aisaiam itila ogfuna asa Sisasna wasneigim nanguna asa enag mo ehem sihinag.

⁴² Afa farisi el enaig sihifini amban ne Sisasim olug oniginafe asa nofeka laskuhlag lala gam ambe go. Afa kaksag Ju elni saglag el Sisasim olug onigini. Afa farisi elim embefegoni asa enag mo mas ambala sihiagini mo.

⁹ Afa Sisas Betani wa gafena afa enaksag Ju el enam higinim eso ahu Sisasim nanguni. Afa ogna Lasarusim gaba nangu eso wahagba Sisas ehem ilafona.

¹⁰ Eso amunai pris mo sihiagini ogna Lasarusim gaba tigi.

¹¹ Eso ehena yi enaksag Ju el ehengelni misog elim hwatigim eso Sisasim olug onigini.

¹² Afa ming osuna el numb buyis nangugim ambugona afa higinim og Sisas ohuna mina Jerusalem gam bo ikaf.

¹³ Eso ehengel komb figeg tutoaginim ahunam ehem ufinim eso enaig esogona og; Godna unehlag nalig feg. Enag el God eso ningihiag soma God ehem lahlafia fai. God soma Ju elni misog elim lahlafia fai.

¹⁴ Afa Sisas donki fanam afa fukoka ganam eso ikana. Afa mahim ehe enaig esenaba eso Godna mo inim pugug. Autunam Godna mo ati enaig ginofi wahini;

¹⁵ Jerusalem wa nai el, so hig. Nofeka embefig, so nangu, nengelni misog el donki wa sisi obo.

¹⁶ Afa enanam heafna pahlukuiag el enag mo mas onigini mo. Afa autunai wa Sisas wahanam afa bihianam awag nangum piske kukaf eso enanam ehengel enag mo anwanafif eba Sisasim sunig afa ehem kweagfunim enaig esini.

¹⁷ Afa el Sisasim nanguni mahim Lasarusim ilafonaba bitek fenai eso enag mo sihiageahuna.

¹⁸ Afa el numb enag kigmog mo higinim eso ambugonam Sisasim mina wa ufini.

¹⁹ Afa farisi el hefum sihiageni og, “Bigel mas ehem kwenig mo. Sa nangu, el numb bigim hwatigim ehem pahluhug!”

²⁰ Afa mingnag Grik el Jerusalem gam ahuna. Ehengelbi afwambanai el ogna buyis ambugonam eso Godna unehlagim fingi fini.

²¹ Afa ehengel ambugonam Filipim sahni og, “Amunai kagel ogna Sisasim nangu.” Afa Filipna Kimbig Betsaida Galili wa nai.

²² Afa Filip Andrum sihinagim ikana eso eheningi Sisasim ahsihina.

²³ Afa Sisas esona og, “Yawaba eso God elim wagfunif Inim el eba nalig feg.

²⁴ Kike enaig kon fug lofug fe, kon kug enaig eseg afa ne mungo isug ningana faguafiba eba gwenaig mungo fifuf. Afa enag ne bite megam kumohlaiba eso noginam eso nog puguf enag mungo lig yi enaksag kug fef.

²⁵ Afa aman el hefum hugna onigkafuf enag el eba awaiyef. Afa aman el mas bitenaim hugna membeg mo afa heafna nofkenagag kusig eso enag el higeg nofkenagagim numwehiageg.

²⁶ Afa aman ne kana gafugag esenag ehe soma kana onigigim pahlubui. Eso ka ahnanai yi feg eba kana gafugag el gaba gwenanai yi fifuf. Afa aman el kana gafugag eseg eso kana awag ehem lahlag onaf.”

²⁷ “Afa kana wahag muhwa ofe eso kana olug kinig feg. Ahnaig sihi ka fef. Ohuna kinig eba mog feg na ka bog. Eso masa ka enaig esof, ‘O Humuan ohuna kinig masa ne kana ninga wa wahiaf.’

²⁸ Afa ka enaig esof, ‘O Humuan, so na nimbiafna unehlagim fingi fe!’” Afa God of wa wagofna og, “Ka ati kiafna unehlagim fingi feg afa ka gwenaig piske esef.”

²⁹ Afa el numb agfofenaba enag mengigim higini. Afa mingnag el enaig esogona og, “Eba hug moasig!” Afa mingnag el enaig esogona og, “Amo, eba of wa nai el ehem sihinago!”

³⁰ Afa Sisas ehengelim sihini og, “Enag mo mang kam kwegfwag mo eba nengelim kwaganigim.

³¹ Afa enanam God bitenai elim kwefihiagefe eso ehe bitenai misog elim filafatif.

³² Afa mahim el kam sisi kahlibi afa ka mungwali elim wambuiba eso kam ambugog muhwafinif.”

³³ Afa Sisas enag mo enaig sihifeni eba wagfug heafna wahag enaig esef.

³⁴ Afa ehengel esogona og, “Godna buk enaig sihifeg Godna Gishu Wahiag El higeg gafif. Ahnaig esegba so na enaig sihifeg Inim Elim sisyi kahlif? Kagelim sihini Inim El aman mahim?”

³⁵ Afa Sisas sihina og, “ Afwambusug nengel nai yi mas higeg gofi mahim enag afwambusug gofiba so na ati ika masa nem sikikfinaf. Eso el sinaini fakaf ehe mas anwanafe ehe asim aka.

³⁶ Afa ka enag afwambusug nem faig. Afa mahim ka nengel nai yi gofiba so na kam olug onigini eso nengel enaig fi eso el afwambusugni fakaf.” Afa Sisas enag mo sihi wahianam eso wasanam ikana afa mas ambagwa gofena mo.

³⁷ Afa Ju el enaksag kigmog nanguni eso Sisas esena eso ehengel ehem mas olug onigini mo.

³⁸ Afa ehengel enaig esini eso Aisaiana mo inim puguna. Ehe Godna mo fa sihiaule el afa autunam ehe enaig esona og; O Ainiyag, ne ati nimbiafena kigmog wagfug eso kagel neana mo sihigonugbi afa ehengel mas higig mo.

³⁹ Afa ehengel mas Sisasim olug onigini mo eso Aisaia ming mo piske sihini og;

⁴⁰ God ehengelni nofugum kagunig eso ehe mas nunofihiagini mo afa onigigim kikisenig eso mas numwehe anwanafi. Afa God enaig esog afa ka enaig ese hwanigba eba ehengel kam piske oniginif eso ka ehengelim lahlafetifef.

⁴¹ Autunam God Aisaiam itiwa wagfuna eso Sisasna kifutigim nanguna eso enag mo ehem sihinag.

⁴² Afa farisi el enaig sihififni aman ne Sisasim olug oniginaf eso nofeka nuwagig lala gam ambugog go. Afa enaksag Ju elni amunai el Sisasim olug onigini. Afa farisi elim embefegoni eso enag mo mas ambagwa sihiagini mo.